Ka Ngai Ka Sem Nak!!!

By: Piangte
A cann cu thlatang lai a si ih, Falam khua cu mero cumci zam phah in a dai zet. A tikcu cu sun le zanglam kar lak hrawng a si. A dai deuh ruang ah maw thei hlah, vate awn mawi zetzet pawl tla an awn theih ding a um tuk lo. Nii cu a tla zik rero ih duh vek in taksa a hlum tir thei nawn lo. Thlatang thlifim mal tete a hrang phahphah ih a dai nawn. Cu lai fang ah Vankau tlang sizung pi piah lam ah Salai le Mawite cu Var lilawn pi le Lumbang khua thlir phah in duhdawt nak thu an ruah aw rero. A cann cu 1987 December thla a si ih phunsang tlawng ta pawl tlawng kai ding ah kawl rawn lam ih an feh rero can a si. Salai khal feh ding a cu zo nan, a duhdawt zet mi Mawite ruang ah feh thiam hrih lo in a um.
Mawite cun, “Salai nang cu Rangoon lam na thleng ih, fala mawimawi na hmu tik ah in hngilh ding ka phang”. A hun ti. Salai cun, “Mawite, kei cuvek mipa ka si lo pi, ka dam sung nangmah siar lo zohman ka duh thei nawn lo ding, Tlawngkai ka thet veten kan thit aw ding ti thei ringring in, rin um zet in, in rak hngak aw la maw” tin Mawite cu kuah phah in a hun sim ve. Salai le Mawite cu an duh aw nak a rei zo nan, Salai nu le pa in Mawite an duh lo, ziang ah tile hnamdang le cathiam a si lo bak ah an nun a har deuh. Salai te cu Falam ah mi neinung lam le cathiam sung an si ruangah an thuhla hmang Salai nu le pa hnen ah tha ten an thei tir ngam lo. Rei nawn an pahnih in tawng ding thei lo in an um hnu ah, Salai in, “Thaizing U Kemsi te in kiangah in rak thlah man lo ding maw?” a ti. Mawite cun sup thei nawn lo mi mitthli hlum, fim te thawn, “Lo thlah cu ka duh tuk nan, na nu le pa, u le nau pawl in an lo thlah zik fawn ih, in hmu le cu an thin a nuam lo pang ding” tin a let sal. Cu ve te cu, Salai khal sang dan ding thei nawn lo in makeup hmang tul lo mi Mawite biang sen te par ih a luang mi mitthli fimvar te cu a kut daizet thawn a hnul sak. Reinawn lai an pahnih in tawng lo in an um ih, a tawp ah Salai in “Mawite kan duh aw nak hi zonih hmang in then thei lo ding ti thei ringring aw, fel ten in, in rak hngak aw maw” a ti. Mawite cun, “ Salai kei tla nang lo cu zo hman ka duh thei nawn lo ding, felten um ve aw la, …… a ti ih a tawng cem man hlan ah, Salai cun rose par sen zerzi vek ih mum mi Mawite hmur cu a vun hnam. Mawite hmur rim cu hmur sensi man awl bik pawl rim te a nam nan, Salai hrang ah cun leithlun ih rim thaw bik, paisa ih lei thei lo mi thil man khung tluk a si. Culai fang ah Falam khau sung cu meisa a vang zo ih, thlatang cumci pawl thawn zoh a mawi in thinlung a nuam tir zet. Vankua tlang veng in fala le tlangval hrek khat pawl tla cu Video zoh ding in khawsung lam ah an feh phahphah thlang.
A thaizin a kim ih, U Kemsi te in kiangkap cu mawtaw an awn celcel. Hrek khat engine start thei lo ih, Dr. Akui inn lam tiang va mawn na, hrek khat horn an tum ciamco na in, Falam thlatang zingpit cu khual tlawng feh le, tlawng kai feh ding pawl thawn, Falam zingpit cu an hmuak cio. Salai khal cu a u le pawl thawn RTC lusau pawl par ah cun paih lo zet, thinlung um lo in a tak sapi lawng thawn a kai ve. An mawtaw to cu an tet nawn ih, to nak tha ngah ding ah mi hrek khat cu an cuh aw ciamco. Pasal, unau, fa le rak thlah na tin mi an kim zet. Salai cu Mawite in ra thlah ve pang pei maw tin khau a thlir rero nan, Mawite cu hmuh ban ah a um lo. Cu ti cun RTC lusau pawl cu Cinnmual tlang a liam ruahro. Zamual khaulu an tleng zik ah Vankau tlang lam cu Salai cun a hun cuan ih, mizan lam ih Mawite thawn an um tlang nak te kha mero cumcii zam phah in fiang lemlo in a hun hmu. Mawtaw a cawl ih, mawtaw spare pa in “Mawtaw man!” tin a au a theih in a thil ruat mi pawl tla cu an vai darh hlo thet. Cu ti cun, Bamboo camp ah rawl ei ding in an tum ih, Salai cu rawl tla ei thei lo in mawtaw par ah a it. A u in “Na dam lo maw si?” a ti ih, Salai cun “ Mawtaw ka ri deuh” a ti.
Cu ti cun, Salai cu Rangoon RC-2 ah cun, first year a kai ve. Mawite thawn cu ca an kuat aw ringring nan, an pahnih in an lungleng an tuar lo. Ni le caan a liam rero ih kawl ram buai nak a hun suak, Salai khal cu Kawl pawl ih dik lo zet ih in uk nak duh lo zet tu a si vek in March thla ah Main campus ah kaih nak a tuar ve. Rei lo te Insein thawng inn ah an thlak ih, an suah sal. Ram buai ruangah cu ti cun, Mawite thawn tla duh vek in an peh zawm aw thei nawn lo. June tla a hun thleng ih, tlawng a pit ruangah Salai cu, Mawite hmu ding in le, a nu le pa hnen ah tha ten an duh aw nak thu sim ding ah a suahsem nak Falam khua lam pan in Mingaladun airport ih sin Kalemyo ah vanzam in a tlung. Cu ti cun, kalemyo cu sun ah a tleng ih, riak hmang riak duh lo in, sumdawng pawl mawtaw thlun in Falam ah a lan.
Falam cu zann nawn ah an thleng ih, khua a fur thlang ruang ah ruah mal tete a sur phah phah. Lumbang in Falam a hun cuan cu, fiang lem lo in meivang tete thawn a mawi hle ce in a hmu. A thai zin ah cun, zohmang sim lo ten, Mawite leng ding ah cun, an dawr Falam bazaar mawitir bik le sunglawi tir bik mi FBA headquarter tang lam dawr tlar ah a va feh. Zingpit a si ih, Falam bazaar cu dawr zuar pawl le thil lei pawl thawn an khat na sa in an buai celcel zet. A hrek khat in “ar ti in lei aw” rak ti na, “antam tawm khat ngamu” rak ti na in an awn aw cu ngai a nuam zet. Hrek khat an ar zuar mi pawl an rak khuang celcel. Fur a si nan, ruah a sur lo lai fang te a si, lei cu a bek nawn. Ni a tlang ih Falam khua cu a fai in a thar hle ce zet a bang, mi thinlung tla a nuam tir hlece cuang. Rualpi hrek khat in Salai cu “Ziangtik ah na thleng , in rak leng aw” rak ti na “lakphak kan in pei cu rak ti na” in a rual pi pawl cun an biak celcel.
Mawite te dawr cu a lut ih, Mawite si lo in Mawite nau nu dawr kil lai a va hmu. Mawite nau nu cun “Ai! U Salai, ziang tik ah na thleng, na dam maw?” a ti in Salai khal cun, “mi zan ah ka thleng, ka dam” a ti ih, “Mawite teh?” a ti fang ah, Mawite nau nu cun, “Um hrih maw, Aksing te dawr ah lakphak ka va cah ta ding” a ti ih a suak. Salai cun thinphang nawn in a rak hngak rero. Mawite nau nu cu rei lo te ah Lakphak khu vutvo le sang phun thum, li lai thawn a ra lut. Lakphak an in phah cun Mawite nau nu cun, “ka u Mawi cu kumli sung Pathian hna tuan ding ah, CCOC ah pum a pe aw ih thlanglam Laitlang ah a feh zo” tin, Salai mithmai zohngam lemlo in a hun sim. Cu mi a theih ve ten Salai cu a lung a mit curco vek in a thei aw ih ziang tawng ding khal thei lo in milem vek in cang lo in a um ringring.
Caan le tik cu a her aw vivo ih, kawl ralkap pawl in ram uk nak an lak hnu ah Salai khal cu, kaih ding mi ah a tel ih India lam ah tlang ding in a tim a tuah aw ve. A rual pa thawn vankau tlang lam pan in an pawk ih, a hlan Mawite thawn an thlanleng nak hmun ten an thleng in, Var lam hei cuang phah in, a mit thlam ah cun Rangoon a feh zik zanlam ih an tawng te kha a hun mang cuahco. Salai cun a thinlung in “Mawite zianghmang nih in then thei lo ding kan ti nan, ram uk nak that lo ruangah duh lo cing in kan then aw ding si hi, Pathian in tawn aw nak caan tha in pe leh hram seh, damten mangtha” tin duh thu a sam rero lai ah a rual pa in a hei ko ih, Falam khuasung lam an hei cuang lala. A ni cu October ni 5, 1988 a si ih, ni khua a tha zet, mero ti vek khal hmuh ding a um lo.
Vankua tlang in Falam khua an zoh ih Falam khua cu ni dang hngak in a mawi cuang, a fai cuang a bang. Falam Baptist biak inn pi cangphuai cu ni in a tlet ih a tleu zet, diamond tum pi a bang. A khat tawk in Cinnmual lam in thirleng to pakhat, hnih an lang, mi khua lak leng mi pawl tla an hmu phah phah thei. U Khuanglam mawn mi Sizung mawtaw Jeep rang tla cu Dr. Akui lak ding ah khua sung lam a suk ih, lei khu le nau hngak pa hnih, thum lai in a dung lam in an dawi rero an hmu phah. Salai ih suah nak Falam sizung pi tla, tlangpar in an hei cuan cu a mawi hle ce cuang. Salai cun a rual pa cu hei zoh phah in, ” Falam hi ziang tik ah kan hmu sal leh pei aw?” a hei ti. A rual pa cun, “ sim thei a si lo” tin lungleng hmel pu zet in a hei let. Cu ti cun, an pahnih in Falam khua mawi deldi te cu tawng lo in rei nawn an hei cuang lai fang ah, an rualpi dang pawl an ra thleng ih “ra uh kan kim zo kan feh ding” an ti ih, cu ti cun Sunthla lam pan in Salai & Mai, kan lai mifim pawl, pacang tha, nupi tha, mi raltha pawl suahkeh nak le a duhdawt zet mi Mawite thawn an thlanleng theu nak Falam khua lipii cu, ui cing in le siang lo na cing in Salai cun a feh san ta.

(Himi cahram hi October 1988 ih Ralkap uk nak do le duh lo ih kawlral kap uk nak do sal ding ih Champhai camp, India ih a tlang mi Falam tlawngta pawl thei ringring nak ah)