Himi ka nganmi hi, article
hrekkhat ta le news pawl lakkhawm hnu ih keimah bulpak ruahnak ka nganmi a si.
Kan thei cio vekin USA ram hi ram zalen zet le ramnuam pakhat a si. Kan dung kum ih midum misual pakhat (G.F), a hmin pum ka ngan duh lemlo palik kutin a thi laiah, mipi tampi lamzin zawhin rampi lawng siloin, leitlung a hni tir thei.
Taktak ti ahcun a thipa kha misual ngaingai, criminal record tam tuk neizo mi a si. Palik pa ih a hngawngih a nen lai khalah rit theih sii a rimi a si. Palik pa ih tuah dan kha cu a luan deuh rori. Sinan, misualpa kha mi hratkhawkeng (hero) a si hrimhrimlo. Sinan, hero vekin a thih hnu ah an cawimawi ciamco. A thih ruangah a sungkhat unua pawl millionaire ah an cang ṭheh. Palik pa kum 22 le hrek thawng tla dingin dan an pek. Hipa thih ruangah khaw tampi ah billion tel sungin inn le lo an siatsuah ih an ur kaang. Palik tampi hnaṭuan an suak phah. Thilṭha hnakin ṭhalo a suahpi tam sawn.
Culawng siloin tubai, June ni 26, 2021 USA ih Olympic lehnak ih tel dingmi midum nunau pakhat thirhlum den (Hammer throw) zuamnak ih pathumnak ngah nu (G.B) in USA rampi hla sak lai le thantar cu zianghman siarloin lehlam hoih san in a um. USA mipi an thinheng zet. Mi tampi in “USA ram aiawh ih zuammi in kan rampi hla le thantar upat hna a thiam lo ahcun, tel hlah seh, a dam sung lek nawn hlah seh, a duh nak ramah kir sal seh” titu tla an um.
Hinu in 2019 Lima, Peru ih an zuam awk lai laksawng lak lai khal ah a kut tum tlun lam ah a rak thlir dah ih kum khat sun an rak cawlh (ban) tir dah zo mi a si. Tuṭum a thil tuahmi thawn pehparin Senator Ted Cruz cun “USA in thil sual kan tuahmi a tampi ko, sinan leitlun ih mipi zalennak pe tam bik ram, mipi harsatnak ihsin khaikiang tambik ram le zalen nak hrangih thisen luangih nunnak liam tambik ram kan si” a ti.
America ih rak um hmaisabik pawl Native American pawl hrangah khal “The Civilization Fund Act of 1819” timi an rak tuahih an fale pawl tlawng ṭha ten kai thei dingin an rak tawlrel nan, Native pawl lala in an duh thei cuanglo ruangah 1970 ah himi dan cu an ṭhiatbal sal. USA acozah cun a cang thei tawkin mibanglo tete le harsa deuh pawl a cang thei tawkin bawm a tum ringring.
Hitawkih ka sim duhmi cu USA hi ram famkim a silo, a tawk mawi in hnam thleidan nak an nei ko. Sinan simtlak a si lemlo. A tlunlam ih thilcangmi a bikin misual palik kutih a thipa kan zoh asile, taktak ti ahcun dinthluk lairelnak a um lo. Palik pa kha a mawi tawk dan pe ding cu a phu ko. Sinan misual thi pa kha hero a si hrimhrimlo. A thih hnu ah Newark city le New York pawl ah a lem an tuah betbet.
Khat lam ah USA khal ram
picang a sinan, dinthluk lairelnak taktak hi, mipi in asilo zawng (Emotional
based) in le a hnam zawngin (Racism) an fehpi sung ahcun a um theilo ticu a
fiang.
