Ziang a lang theu?

Moses kha thukham 10 Pathian in a pek laiah, Pathian kiangih caan a mawi tawk a hmang ruangah, mipi hnenih a va kir sal tikah a hmai cu tleunak in a khat! Pathian sunparnak a parah a lang!

Nitin kan nunnak ah zo thawn caan kan hmang tam bik? Pathian thawn caan hmangtu kan si ahcun, sim tul loin mi in nitin kan nun, kan tongkam, kan mithmai le um dan ah Bawipa sunparnak an hmu ding! Caan kan pek tam bikmi ih mizia kan nun in a kengcem ringring!

Nupa hman umtlangnak a rei cun theilo karah kan mizia kan copy aw theu! Moses vekin kan nun ah Pathian sunparnak lang thei cio ding in Pathian in lam in hruai cio hram seh!

Luh nak/ Lut man!

Phunsang tlawng kai thei ding ahcun, a tlangpi in High School ih GPA tha zet ngah a tul. Ram dang ih sin zir duh hrangah an qualify le qualify lo entrance exam le test tivek a tlangpi in a um lala. Cucu an duhmi phunsang tlawng kai theinak le luh theinak ding ah a si!

Cuvek thotho in, ram tampi hrangah USA ra ding cun visa apply tul. USA ummi ramdangmi USA citizen apply tik khalah, interview an ong/pass tengteng tul!

A langte kan umnak leitlun ih tlawngkainak, ram picang tlawnnak le rammi sinak hrangah cun neihsiah cem le teimak suah in tang lak tul theu. A qualify an timi lawng ih ngah a si!

Sinan, kumkhaw nunnak hrang le vanram kan luh theinak dingah Pathian cun kan qualify le qualify lo zoh sawnloin, qualify lo ciami sawn kha Fapa Jesuh thisen thawngin qualify ah in cang tir!

Nang le kei ih kan tuah tul mi um sun cu, “Bawipa ka qualify theilomi rundamnak a lakin in pek ruangah ka lungawi” ti ding lawng a si! Pathian ih kan phulo rundamnak laksawng sunglawi in pekmi cu minung felnak, zuamnak, thiamnak, teimaknak le sumpai ih lei theih le ngah theih lomi a si!

Amen!

Glorified body

I Kor. 15:42:44;” Miithi pawl thihnak ihsin thawhter an si tikah cubangtuk in a si ve ding. Taksa pum cu phum a si tikah a thi theimi a si; thawhter a si tikah a thi thei lomi a si ding. Phum a si tikah a mawi lo ih a ṭawnṭaizet; thawhter a si tikah a mawizet ding ih a cak zet ding. Phum tikah taksa pum a si; thawhter a si tikah thlarau pum a si ding. Taksa pum a um bangtuk in thlarau pum khal a um a si.”

Minung ih mawinak hi kan taksa, kan ruangpum zohin “a mawi, mawilo” timi thuthluknak kan tuah ṭheu. Ruangrai mawi rengreng hi cu a tlangpi in mawi kan ti cio. Sinan, cu tiih, ruangrai mawi zet nei dingin mipakhat in ziang tlukin zuam a ṭul, tikcu pek a ṭulih teimak suah le sumpai cem, ei in sup awkin lek le tuah a ṭul timi kan hngilh ṭheu. Thlakhat hnih men caan pekih rak cang suak theimi thil a silo. A kum telih teimak suahnak zarih rahsuahmi sawn a si.

Kei tla tleirawl pek ihsin teimak suahin lek paih zetmi ka siih, mah le tawkah ka tak ruangrai mawi dingin le harhdamnak dingah discipline nei zetin kum tampi gym ih lektu ka si tikah a harsat zia ka thei tawk zet ve. Pheh aw lo ten thlalang ih zoh awk tikah, tikcu pekih ka rak lek rero mi ih a rahsuahmi “muscle” pawl hmuh tikah hna a ngamih mah le mah rinsan awknak a suah tir ṭheu.

Cuvek thothoin, zumtu kumkhua kan nunnak dingih kan neih dingmi kan taksa (glorified body) hrangah teh ziangtlukin teimak suahin caan kan pek, caan kan hmang timi a thupi zet. Thih hnu larnak a hmumi hrekkhat ih ca nganmi ka siar mi pawlah kan thih hnu ih kumkhaw nunnak hmun va thlen cun, tuih leitlun ih kan nunnak hi cu manglam vek men a si,a tak a silo zia a lang an ti. A tak cu kumkhaw nunnak vanram ah a um mi a si. Cumi ih kan taksa ding cu Bible ah tampi a sim mi sung ihsin I Kor 15:42 ah khal fiangten in sim.

Cumi a thlengawk danglam dingmi, kumkhaw daih, a siat a ṭawt thei nawnlo dingmi, mawinak thawn kumkhua a hmun dingmi kan taksa (glorified body) hrangah cun, kum malte sung lawng daih dingmi kan taksa pum kan kilkhawi hnakih a let tampi sawnin a thupimi a si! Cuvek taksa ruangpum nei dingah na ready zo maw?

 Mirang in Mirang a kapthat tikah buainak um lo.

Midum in Mirang a kapthat tikah buainak um lo.

Midum in Midum a kapthat tikah buainak um lo.

Midum in Asian mi a kapthat tikah buainak um lo.

Mirang in Midum a kapthat tikah buainak a thleng!

USA khalah justice system le law & order hi a dik tawk lo!

ငဖြူကငဖြူကိုသတ်ရင်ပြသာနာမရှိ

ငမဲကငဖြူကိုသတ်ရင်ပြသာနာမရှိ

ငမဲကငမဲကိုသတ်ရင်ပြသာနာမရှိ

ငမဲကအာရှသားကိုသတ်ရင်ပြသာနာမရှိ

ငဖြူကငမဲကိုသတ်ရင်ပြသာနာတက်ကုန်ရော

အမေရိကမှာလည်းတရားမျှတသောဥပဒေဆိုတာမရှိနိုင်ရှာ။