Retheinak ram ihsin….Ramnuam ah

Ni sa lak hnaṭuan nak ihsin….Innpi sungih hnaṭuan nak ah

Meisa vang umlo nak ihsin…..Sunzan meisa vang nak ah

Tuhmui a kai ṭheumi kut ihsin….Motor steering kaimi kut ah

Duh kuahko cingih zir theilonak ihsin….Duhduh zir theinak ram ah

Disap inn se te ihsin….Tlakrawh inn pi ah..

A umlo mi sungin….Um tir theitu

Tlinglo cingih…..Laimi (Chin) khaisangtu

Bawipa nangmah na si….Ti in hngilh tir siang hlah

Kan ṭhanso kan tinak hi….tluangkhawng nak hmang loin

Na hmin sunlawinak le…. Na sunpar nak ah cang in

Tesin fa le pawl cinken dingah…Saduh ka thah!!!

*****************

Kum 125 Kim Nak-Falam

Suahsemnak khua, Falam

Hngilh ni um lo, Falam

Ka hrang khaw mawibik, Falam..

Hngilh thei hlang ee, October ni 5, 1988

Rambuai ruangih, sianglo cingten

Vankau tlang ih, ka suahsan ni..

1992-kum 100 kimnak

Tlunzai relthiam lawn, hramlak ihsin

Na hrinsuahmi fa le “Zalen” nak hrang…

Mitthli tla le haacang rial in,

Thlacam nak thawn, kum 100 kimnak

Khawthim lakah, ka rak hmang ve…

Kum 125, na kim ni tal,

Falam fa le rual, innpi hlumin,

Tlun ding ni caan, ka hngakhlap ee..

_________

Lai Kumthar...

Lai kumthar…pipu khawsia biak bang

Si lo hram seh,

Lai kumthar…khuangcawi nak fang

Si lo hram seh,

Lai kumthar….Khawzing Pathian mitthli tlak nak

Si lo hram seh,

Lai kumthar….pipu atnak, langtir nak men

Si lo hram seh….

Lai kumthar….pipu nunmawi, kilkhawi nak caan

Si hram seh

Lai kumthar….kan calai, nunphungṭha, awnmawi kilhim nak caan

Si hram seh

Lai kumthar….Lai nunmawi, Lai thuammawi pholang nak caan

Si hram seh

Lai kumthar….Khawzing Pathian lungawi nak caan

Si camcin seh tiah……

A Cu Zo!

.

Chin mi tla, cawimawitlak cawimawi ding

Zir a cu zo..

Chin mi tla, zoṭhimtlak cawisang ding

Tuah a cu zo...

Chin mi tla, upattlak upat ding

Fim a cu zo....

Chin mi tla, kau deuhin ṭuantlang

A cu zo…..