Agape Duhdawt Nak

 

 

Vancung sunglawinak

Sui lukhuh tanta in

Fihnungza tholung, eksia vek

Asimi nang le kei hnen ah run tlangin

Rundam dingih ra mi le

Hliamhma rapthlak, farah nak le

Ningzak mualphonak

Thihnak a tuartu, Mangbawi Fahniang

Bawi Jesuh ih

Pekawk nak le duhdawt nak thei fiang cun,

Minung lamih kan sam thei dingmi

Zianghman a umlo zia le,

Jesuh hrangih kan tuar tuk

Kan timi pawl cu, ningzak thlak

Le simtlaklo men an rak si sawn….



Thlaici..

Zumnak ruangah, inn le lo ur sak tuar in

Mitthli tlain, zumnak thlaici

Nan rak tuhmi, a laklo ee..

Thildang hnakin, Jesuh hrilin..

 

Nan fa le khal, san khuk daih tiang

Zumnak thlaici, nu le pa bang

Thlaici ṭha, tuh thei dingin

Jesuh hrilin, kan tim kan tuah....



Pekawk Nak

 

Moses cun, siangpahrang fa sinak tansan in

Matthai in a siahkhawnghna fehsan in

Peter khal in, a pursumnak tanta in

Samaria nu cun, a tikhai nak tlan sanin

Bawi Jesuh an thlun, an rian..

 

Nang le kei teh tansan, fehsan,

Tlansan mi nei in,

Bawipa kan rian maw?

Jesuh thlun le rian cu

Pekawk nak sunglawibik a rak si sawn…



Amai ruangah....

 

Keimah ten ka fel theilo

Keimah ten ka ṭha theilo

Keimah ten ka tuah theilo

Keimah ten ka nung theilo

 

Asinan, fel famkim Pathian ka nei

Ṭha famkim Pathian ka nei

Ziangkim tithei Pathian ka nei

Amah lawng ka nun nak

 

Felnak um sun, Amai ruangah

Ṭhatnak um sun, Amai ruangah

Tuahthei um sun, Amai ruangah

A rak si sawn….



Thuanthu Roling

 

Chin ram, Chin miphun hrang

Nunnak thapin, tumtahnak thawn

Kumpi kumli, nisa, ṭoruah sual in,

Sunmang maksak nei in….

 

Chin ih pumkhat si ding, rak au pi in

Mai duhnak le ṭulnak tan in

Thlanhri, mitthli le thisen thawn

Hacang rialin, miphun hrangah…

 

Nikhat khatah, nehnak thawn

Mipi in, pangpar ṭhi-mawi awrh tir in

In hmuak ding ni, rak thlir hmanning

Kim ni um lawn, caan a liam ṭheh zo

 

Ruahnak danglam, hrekkhat ruangah

Ka sunmang hmuah, lei ti tawih bang

Cang thiamlo in, an ziamral

A cuih ka thin…..

 

Ka suahsemnak, Falam khua le Rihzin

Unau cangkang, hmuthiamlo in

Lam phihsak ni, Falam a ṭap

Bawmtu nei lawn, a hran a tan..

 

An tumtahmi, an pitlin ee..

Kum tampi hnu, miphun le ram siatsuahtu

Mihratkhawkheng bang, cawimawi an hlawh

Thuanthu cu, hlawn le malh a theihlo….



Lairam Ahcun!

Ram thumnak um, nang le kei

Nun nuam in kan um laiah

Lairam ahcun, harsatnak mitthli a luang..

Hna ṭuan lawnglawng tiih, kan phunzai laiah

Lairam ahcun, ṭuan ding um lawn..

Ṭoruah le nisa lakah, lo rian an ṭuan

Zingzan ei in duhduh kan ei laiah

Lairam ahcun, ei khawp neilo

Sinfen neilo, retheinak ṭah aw in a khat…

Puanhlum te thawn, kan ih laiah

Lairam ahcun, sin daih neilo

Haacang rial in, khawsik an tuar

Computer thawn ca kan zir laiah

Lairam ahcun, lung cangan nak

Hman rero a si hrih ee….

Inn le lo ṭha kan hlum laiah

Lairam ahcun, disap thlam inn

Rawp hnianghni te, an hlum hnianghni….

Nun....

Ka tho, ka ei

Ka feh, ka ṭuan

Ka hawl, ka hmang

Ka tlung, ka cawl

Ka it, ka tho

Leitlun “Nun”…

Vanbawi Fapa

Thianghlim mi in, thianghlimlo mi hnenah

Sual neilo mi in, misual hnenah

Duhdawtnak a nei mi in, duhtlaklo mi hnenah

A famkim mi in, famkimlo mi hnenah

A sangbik ih um mi in, a niambik leitlun ah

Sunglawibik mi in, nautabik dinhmun ah

A tleubik mi in, a thimbik hmun ah

Huham thawn khat mi in, tangdawrhnak nun ah

Beidongnak neilo mi in, beidong nak tuar in

Ṭap theilo mi in, mitthli tlakin

Thi theilo mi in, thihnak tuarin

A tho sal zo, Vanbawi Fapa, Jesuh Khrih

Ton Sal Ni

Ka tum ṭheu, hngilh thei dingin…

Kan lennak sulhnu, Vankau tlangtluang

Kum 25 hnu, thlengsal tikah..

Sulhnu pawlin, an lo hlam ee…

Sianglo cingin, ka fehliam zaan

Sup theilomi na mitthlifim, Lungthin a luah…

Kham theihlomi tikcu le caan, herliam hman seh

Na hrang, duhdawtnak a hmun camcin!

Kum upa in, tleirawl nawnlo hmanning,

 Duhthusam peh sal ding ni, hngakhlap zetin..

Ton awk sal caan, thlen taktak ni,

 Ziang tinkim, a tlai ṭheh zo…

Semnak Khua & Ram

Semnak khua le ram, hlum kuahko duh hmanning la

Din hmun ruangah, hlum thei hrih lawn..

Semnak khua le ram hrang, sunmang nei hmanning la

Sinak le dinhmun, harsat ruangah…

Semnak khua le ram, fingtlang tluang tla

Mitthlam ihsin kaam ni um lawn, a sun zan in…

Semnak khua le ram, ngai in lungzur caan,

Ngairiam nakah cafung lawngin, thai ko hrih ning..

Semnak khua le ram te, nuambik cuang ee

Vairang ram khal, ziang si ce hlah,

Semnak khua le ram ih, zilthli nem te..

Hlam caan a tam, khua le ram ngai in ṭap hrih ko ning..

Semnak khua le ram, rual le pi hnen..

Kirsal ding ni, nithla siar in hngak hrih ko ning….

Semnak khua le ram ah, vanzuang va bang,

Zam thiam ningla, zam tak ding maw ti in………..