Hnawm (Trash)...Sermon

Hnawm pawl hi a duhtu zohman kan um lo ding. Vawi tampi cu hnawm pawl hi khuitawk in a ra ih, zonih in pek, ziangtin kan hlawn ding tiah kan buai ttheu. Hnawm tawmpi hi eBay ah maw, dawrah maw an zuar ti kan thei dah lo. Ziangah tile hnawm cu zohman ih duhmi a si lo. Khuitawkin cumi hnawm pawl a ra suak ti kan theilo men dingnan, pakhat kan theimi cu, hnawm pawl kan kiangkap ih um ringring le hnawm keng ringring cu harhdam nak ah a tthalo ticu kan thei ttheh ko ding.

1986 ihsin “Pelicano” timi lawngpi cu ram tinkip ah tawiin, cawlh nak a dil nan an duhlo. Ansianglo nak san cu neitu ttha a nei lo ruangah tla a si lo, a sungih hnattuan pawl an tthalo ruangah tla a si lo. A san sawn cu pi 466 ih tummi lawngpi cun, hnawmbal pawl, ton thawng hleinga ritmi a phur ruangah a si. Himi lawngpi ih a tanglam bik khan sungah cun, Philadelphia ih hnawmbal pawl ur khawm mi an ret. Cuvek thotho in kan nih minung tla hnawmbal thawn a khatmi thinlung cu zo nih hman an duhlo.

Hivek thinlung hnawmbal pawl nih in siatsuah thei. Kain tla kha a unau pa thisen a suah tir hlanah thinhen nak hnawmbal a nei hmaisa, Martha khal a thinlung ah hnawmbal a um si kha. Cu vek thotho in Pharisees pawl khal Zesuh an thah hlanah an thinlung sungin an rak that cia zo. Curuangah tusun ih kan ruahnak le kan suangtuah nak cu thaisun ih kan tuahsuak dingmi an si thei.

Tusun ih mi halhsik nak kha thaisun ih thinheng nak suak tirtu a si
Tusun ih mi hmuhsuam nak thinlung kha thaisun ih mihuat nak a si
Tusun ih thin heng nak kha thaisun ih kut thlak nak a si
Tusun ih tisa hair nak kha thaisun ih uire nak a si
Tusun ih duhham nak kha thaisun ih mibum duhnak suak tirtu a si
Tusun ih phuhrung aw nak kha thaisun ih ttihhrut nak a si..

Curuangah a si ding Paul nih 1Cor13:4-5 ah “Duhdawt nak in thilsual a cinkeng lo” a tinak san. Cuaruangah thil ttha bik cu hnawm pawl a mal lai ihsin kan thiangfai a ttul. Pelicano lawngpi vekin tipi thuanthum parih vak rero, cawlhnak neilo si kan duh ciolo ding a zum um. Curuangah bawrhhlawh thawn khatmi taksa thiangfai tu dingah lawngih captain pa hngakih tumsawn le fim sawn kan Pathian in planning tumpi a nei.

In tinah hnawmbawm kan nei cio ih, kan hnawmbawm sungih um mi hnawmpawl zoh in, himi in sungsang in ziangvek an ei, an in ih ziangvek thilri an hmang ti a mawi tawk cu sim theih a si. Cu vekin minung pawl khal kan thlarau nun in ti cau tu thil pawl an um. Cu pawl cu um har nak, thinphan nak, thin nat nak, thinhengnak le mi lehrul duhnak leh hlawhsam ih theiaw ringring nak pawl an si.

Himi pawl lak ihsin, thinphannak/ helhkam nak timi zoh hmaisa she la. Vawitam pi cu minung pawl in thil a cang hrihlo mi ruatin, kan thin a phan ciamco ttheu. Camibuai ka ong lo pang le cu, Nupi/pasal ka nei ni ah ruah a sur pang le cu, ka fa te enkawl dan ka thiam lopang le cu, hna ka neilo pang le cu, zantin hngawk ringring mi pasal ka nei ngah pang le cu tvp ..maw ruatin kan thin a har ttheu. Himi thin phan nak pawl in kan nunnak ah tampi in buaipi thei. Cumi thinphan nak pawl cu zo hmanih duh mi an si lo. A cang hrihlo mi ruatih thinphan nak in tampi tthatlo nak ah mi a thlen thei fawn. Bible ih kan hmuh mi thinphan nak timi hi Greek tong ih ra mi “MERIZO” (to devide) timi le NOUS (the mind) timi tongfang pahnih kom mi a si. Cucu “thinlung tthenaw dingin” tinak thawn a bangaw.

Thinphan nak ih a suah tirmi cu, natnak tla a tel. Cu pawl cu thisen san, thinlung nat nak, lunat nak, mit caw le pum lam tiang damlo nak a suahpi thei ti a si.Curuangah thinphan ih um ringring hi paisa tampi cem nak tla a si. Curuangah Zisu in Matt. 6:27 ah kha, thinphan nak in kan nun nak ni kan sau tir thei cuanglo ti fiangten in sim. Thinphan nak in ziang tik hmanah, kan ni suah a ttha tir dah loih, daihnak a suahpi dah lo ih, nat nak a dam tir thei lo.

Thinnat nak kan zoh lala le tampi an um. Nu le pa in an lo zoh ttha duh lo, rualpi in an lo kom ttha duh lo, na nupi/pasal in rinsan tlak in an um lo, hna ttuan suah, leiba thawn um..tvp..tampi an um lai ding nan, hi pawl kan par a thleng tikah, kan thin a heng, kan ning a na. Fate pawl harsa zetin kan cawm ih a pitlin hnuah nu le pa an thei nawn lo, leiba in pe theilo pa nih, mawtaw thar te a lei. Hi pawl kan hmu tikah, kan thin a heng. Kan taksa hrek hi a phelaw ttheh vekin kan thei can a um ding. Kan ttah a suak, thinheng nak in kan mittli tiang a tla ttheu. Himi can a thleng tikah, ziang kan tuah ding? Kan thin lung sungih a alh mi thinheng nak le thin nat nak kha kan dai tir ding maw, kan saa tir sinsin ding? A pawilo a mah um in um ko seh kan ti ding maw? Kan leh rul sawn ding?

Mi va lehrul duhnak le thinheng nak hi cocaine tluk ih ttih nung mi a si. Himi lungput nih thisen a sang in a so tir thei. Himi lungput neimi hrangah cu thinheng nak hi, an hrangah lehrul nakih thazang ttha bikah a cang ttheu. Anet nak ah cun thinheng locun, thazang nei nawn lo vek tiang in an theiaw ttheu. A bikin USA ah tla cu KKK tivek le skinheads le a dang (hate organization) tampi an um. Cu pawl tla cu mi an mah vek si lomi pawl kha hua ding ih zirhaw bik an si. Thinheng nak le duhlo nak hi an addict a si bik mai. Thinheng lo ding le mihua lo ding cu nun man san tlai lo tluk in an ruataw. Thinheng ringring nak in nat nak tampi a suah tir thei, thisen sang natnak le thih nak tiang in a thleng tir thei a si.

Tuar har zetmi pakhat lala cu “hlawhtlin loih theiawnak/lungkim lonak” hi a si. Vawi tampi cu kan ti ttheu, thil kan tuah sual hnuah, “aw, rak theita sehla, nupi/pasal ka nei lo dingnan, ka rak control aw dingnan, simlo in ka rak um sawn dingnan, tawng lo ten ka rak um sawn dingnan..tvp…”A sinan, kan tuah zo mi pawl cu lak sal a theih nawn loih, acang zomi cu a cangzo an si ta mai. Kan tuah zomi kha tuahlo sal a ngah nawn lo. Curuangah Paul nih cu, Rom 6:23 sungah “sual man cu thih nak” a si a ti. Hitawkah sual man cu lungawi lo nak khal a ti lo ih, sual man cu nun nuam lo nak tla a ti loih, sual man cu thihnak a si ti a si.

Thlarau lam ih kan phurrit pawl le kan thinlung ih um mipawl hi, mithmuh ah lang theimi si sehla, zoh har kan ti cio ding. Mawi zetin hnipuan kan hrukih, kan khawm, hna kan ttuan nan, cumi a mawi zetmi hnipuan tanglam ah cu a thu ih thumi hnawm pawl a um ti zohman in an hmu lo. Dawnhar nak phurrit in kan nun in ti cau ttheu ih, Mtt. 10:26..ah zianghman thupmi um loin, Pathian hmaiah kan thinlung sung um mi pawl a lang ttheh leh ding ti a si. Cucu hnem nak sawn silovin, mi thin a phang tir sawn. Zohman in kan thinlung sung thuthup ih kan retmi ruatmi mi zapi theihin lang tir duh kan um lo ding. Asinan, ni khat ni ah cu cumi cu a cang tengteng ding mi a si. Heb.4:13, Matt.12: 36, Ps. 90:8 le 1 Cor 4:5 pawl ah fiang zet in kan hmu thei.

Kan thinlung ih suangtuah mi pawl, a tam sawn cu mi zapi theih tir ngam lo mi deuh hlir an si ti sehla a sual lo ding. Cu pawl cu zohman nih in hmu in in thei dah cuanglo ding kan ti nan, Bible ah, cu pawl cu lang tir can a thleng leh ding ti a si ta riai. Cumi ni ah ziang tin si kan um in kan zoh sal ngam ding? Asinan Pathian in kan hrangah a ttha bik in in rak tawlrelsak cia mi a um. Cu mi cu Rom 2:16 ah kan hmu thei. Thu tthen ni ah cu Jesuh thawngin in tthen ding. Zisu in ningzat za kan thinlung ruahnak pawl cu in phen sak ding tinak tluk si cu. Bible cang dang pawl a um lai…Rom 8:1, 3:16, Acts 13:39, Heb.8:12, Col 3:3.

Curuangah Zisuh ih kan um ah cun, phan ding zianghman a um lo. A tluih Bible can pawl hi, kan hrangah thazang ngah nak le thutak ih a hrampi an si. Curuangah Pathian in thu tthen ni ih in zoh tikah, kan sualnak le kan thinlung sung ih a thu/ttawih mi hnawm pawl hmu nawn loin, Zisu lawng a hmu ding tinak a si. Ziangah tile Zisu thisen in tlenmi kan si ruangah. Curuangah nehtu kan siih, tha nau ding kan si nawn lo.

Matt 11:28 ah phurrit phurmmi pawl ka hnenah ra uh a ti kha. Bawi zisu cu office neihmi tla a si lo, milian tla a si lo, Rome cozah pi thawn pehtlaih aw in sinak tla nei mi a si lo, cathiam tiih theihmi tla a si lonan, Jerusalem ih um mi mipi pawl cu a zohih, ngakai pawl le siahkhawng pawl tiangin a ko suak si kha. A hnen a pan tu hmuahhmuah cu an hah dam, Zisu nih cu sakhua biaknak a pek hai lo, doctrine a pek hailo, system tivek a pek hai lo. A pekmi cu cawlh hah dam nak a si.Curuangah a mah cu Bawi le ruundam tu tin an ko, a ttawng ruangah silovin, a tuahmi parah an ko nak san a si.

Nazi pa 6 sung, Tlawngkai ningan zanlam Calvary tlang parih a tuar laiah kha, a nun nak Pathian hnen a pek lawng si lovin, Pathian in kan hneah hnangam/ lungawi nak in pek ve a si. Cumi hnangam lungawi nak cun, nupa karlak ih thusia kha thutha ah a cang tir sal, kawhran sungih thuhla buai le remaw lo nak pawl kha remnak a tuah sak sal, fa le pawl thawn can hman thiam nak a um sal, mah le mah upat thiam aw nak le thinnuam lo nak pawl kha thinnuam nak ah a cang tir sal a si.

Hnawm thuhla ah feh lala sehla. Inn tin ah hnawm hi an nei cio. Hnawm pawl a fai nak ding ah cu, a hmaisa bikah hnawm a um a si ti kha kan fiang a ttul. Hnawm um na cingcing ih hnawm a um lopi kan tile cu, hnawm cu a um ringring ding. Hnawm a um a si ti kan theihmi kha hnawm thian nak ding ih a hmaisa bik step a si. 1 Jn. 1:9 ah kan hmu thei. Himi Bible cang ah fiang zetin kan hmu mi cu, confess nak ih sin ngaihdam nak, ngaihdam nak ihsin thianhlim nak ah in thleng.

Sualphuan nak in Pathian thawn kan pehzawmaw nak a tuahsuak loih, kan pehtlaih aw nak kha a ti cak sawn a si. Pathian hnenih ka sual a si Bawipa kan ti tikah, Pathian thawn el aw ding a um nawn lo ih, ziangkim kan lungkim pi tinak a si. Asinan, ka sual a si tin, kan phuangaw ih kan siraw lo le cu Amah fa cu kan si thotho nan, kan karlak ah lungkimpi nak zianghman a um lo. Phuangaw suaklo mi sual nak cun, riahsia nak a suahpi in, hnangam nak a kham ih, kan phuangaw cun cumi dodal tu hmuahhmuah a thlah theh a si.

Sual phuan hi Lo tuah thawn a bangaw, lo tuahtu pa nih cu lo ih thlaci a ttha thei nak dingah losungih, lungto le a hnawm pawl a thiang hmaisa vekin, kan thinlung sungih Pathian thu tthangleng le Pathian um duh dingin cu kan thiangfai ta a ttul.

Ngaithiam nak, timi hi kan zoh hnik pei. Calvary tlang parih Bawi Zesu cross parih an kheng laiah, a duh ah cun a kham thei hai. Thlipi a dai tir nak kut le Jerusalem biakin a thiamfai nak kut, mi thi a tho tirsal nak kut in a kham thei hai nan, a kham aw ta riai lo.Ziang ruagah ti ah cun, Col.2:14 ih sim vekin. Mipi tampi nih cu siangpahrang na si ngaingai le runaw hmen tin an au sikha. Mipi tam sawn nih cu Col. 2:14 ta an hmu ban lo.

Bawi Zesu kut le khami thing cross kar lakah, list tampi a um. Cu pawl cu, thil sual kan tuahmi pawl, hur nak, thuphan per nak, le duhham nak timi pawl an si. Pathian nih cu khami lai fangah, Zesu hmel hmu loin, kan sual nak a hmu si kha. Pathian in kan thil tuah sual mi hh, kha a ngan ttheh. Asinan minung mit in hmuh theih an si lo, Zesu thisen in in khuh sak ttheh zo. Isa.44:22, Col. 2:13-14.

Kan Bawipa Zesu kha ziang ruangah, khatin a tuar ti ah cun, sual man cu thih nak asi ti a thei. Amah in a tuar lo ah cun, nang le kei cu thi ding kan si. Cu lawng si lovin, nan le kei tel lovin, kumkhua nunnak a mah lawng co ding a ruat thiam lo sikha. Curuangah, tlawngkheng a hril nak san a si. A kut khengbet dingih, tuah tu kha Rome ralkap pawl an si lo, sobul ih an kheng nak kha mipi thinheng pawl an si lo, thi dingih dan pe tu kha jews pawl an si lo, Zesu amah nih nangmah le keimah luat nak dingah a hril mi a si sawn.

Rome ralkap pawl nih, khengbet tum lo hman sehla, amah ten a khengaw ding a si. Lettama thiammi a si ih, tlawngkheng kheng cu a thiam zawng tak a si fawn. Zesu cun, tlawngkheng ih khengbet a ttul ziang a thei. Ziangah tile kan sualnak pawl cu thuhhlo in an um theinak dingah a si. Curuangah Zisu cun, a mah ten a khengbet aw tinak tluk asi. Thlipi daitir tu kut in na sual nak a daih tir. Biak in a thiangfai nak kut in na thinlung a lo fai tir. Cumi kut cu Pathian ih kut a si. Tlawngkheng tla kha Pathian ih tlawngkheng a siih, Zesu kut cu tlawngkheng in a ong tlang vekin, vansang kaa cu nan le kei hrangah a ongaw zo a si. Amen..

Thianfainak…Bawipa nih cu kan thil tuah sual mi in ngaithiam lawng silovin, in lak fai sak ttheh a si. A hnenih pek ding lawng si kan tuah theimi cu. A nih cun, sualnak kan tuah zo mi lawng si lovin, kan tuah rero laimi sual nak pawl tla in ngai thiamzo. Tuni ah sual nak kan tuah rero lai mi a um maw? Zu kan inn tamtuk maw? Na hna ttuan nak le nu pa sinak ah rin na um lo pang maw? Paisa a si lo zawngin kan hawl pang maw? Kan nun nak hi a si lo zawng in kan hmang pang maw? Kan nei a si le zianghman suallo vekin um ding kan si lo, tlu theilo vekin um ding kan si lo. Pathian hnenah kan feh a ttul I Jn1:9.

Zesu cu Pathian tuufano ti kawh hlan kum thawng tampi ah, Pathian in ngaidam nak ka lo pe ding tin in rak tiamkam zo. Jeremiah hnenah “nikhat ah cun, an sual nak ka thei nawm lo ding” a ti, Hosea hnenah cun, “ka miphun an si dingih, an Pathian ka si ding” a rak ti. David hnenah “an sual nak cu nisuah nak le nitlak nak vekin a hla aw ding” a ti. Ni ni khat ah cun, kumkhua meili pi ih in thlak theitu Pathian nih cu, kan sual nak pawl kha zoh nawn lo in, Cross ruangah ngaithiam nan si zo in ti leh ding.

Matt; Phurrit phurmi pawl…. Himi tongfang Zesu in a tong laiah, ziang si pei a duh san, a serious ngaingai maw? Thil rit nan nei maw, ka lo sawng ding in pe uh tinak thawn a bang aw. Kan nunnak ih in ti chau tu le in buaipi tu thil hnawm hh Zesu in rak keng uh, ka lo sawng ding a ti. Minung hi sual thawn nung dingih tuahmi kan si lo. Vawi tampi cu keimah ten ka take care aw thei ko kan ti nan, beidong can a um ringring. Kan sual rit, kan thinhar nak phurrit pawl cu kan mah ten phur dingah an rit tuk. Zisu in cu pawl cu ka hnenah ra kenguh in ti.

Kan ni kan veng cu tlawngkai ni thum zing tinten hnawmhlawn ni a siih, tlawngkai ni hnih zan ihsin kan inn sungih hnawm hmuahhmuah cu hnawmbawm tumpi ah retin inn hmaiah ret cia ringring a ttul. Asinan, minung pawl ih kan sual bawrhhlawh le sual nak pawl cu nitin maw, zarhtin maw tu le tu hlawn ttul lo dingin, Jesu in vawikhat ah damsung daihin in hlawn sak zo? Hnawn na nei lai maw?

Positive Thinking Skills (taken from MCHD Bulletin)

Is your cup half full or half empty? Many say your answer to this age-old question determines whether you are an optimist or a pessimist. According to Webster’s Dictionary, optimists are individuals who expect the best possible outcomes and pessimists have a tendency to take the least hopeful view. Which are you? When you are faced with challenges in your life, is your first thought,“ I can figure this out,” or “I can’t handle this”? If your first thought is often negative, you are most likely considered a pessimist.

Did you know that the way you think determines your attitude? Think about it. Do you know someone who has a bad attitude on most days? When reflecting on conversations you have had with this individual, you will notice that during most conversations he or she was complaining or making negative statements. You may even recall occasions with this individual.

Unfortunately it is true, thinking negatively can cause you to have a bad attitude and others won’t enjoy being in your presence. Most people enjoy being around positive thinkers because they seem to be happy and full of life on most days. This does not mean that all positive thinkers are born this way. Many of them make conscious efforts to think positively.

Let’s be honest. Some people do wake-up in the morning with cheerful attitudes, but many of us work hard at thinking positively. The fact is, if it is not natural for you to think positively, developing positive thinking skills will be challenging. Don’t let the challenge be the reason you give up without making a conscious effort toward positive thinking. A positive mindset is an essential skill to possess if you want to be successful in the workplace and also live a healthier life. Are you ready to be a positive thinker?

Practice Positive Thinking

First, you must make the commitment to counteract negative thoughts with positive thoughts. This can be easy if you make a game out of it. The game begins when you wake up in the morning and lasts until you go to sleep at night. Whenever a negative thought enters your mind or you begin to make a negative statement, stop yourself and replace the thought with something positive. The following chart from www.mayoclinic.com provides great examples to get you started.

Negative Thoughts
I’ve never done this before
It’s too complicated
There’s not enough time
There’s no way it will work
It’s too radical a change
No one bothers to communicate with me
I’m not going to get any better at this

Positive Thoughts
It’s an opportunity to learn something new
I’ll tackle it from a different angle
Let’s re-evaluate some priorities
I can try to make it work
Let’s take a chance
I’ll see it I can open the channels of communication
I’ll give it another try


Concentrate on Solutions

Next, you must concentrate on finding solutions to problems. If you read each question in the chart closely, you will notice that positive thinkers concentrate on solutions instead of focusing on problems. Many times, negative thinkers have a difficult time moving past the problems at hand. To become a positive thinker, you must rationalize your thinking. It is fine to acknowledge a problem exists, but it is not healthy to dwell on the problem. When a problem occurs, take out a sheet of paper, not the problem and begin writing down possible, take the initiative to ask foe help or clarity. In utilizing these techniques, you will experience a positive attitude, enjoy your job and begin to feel better about yourself.

Don’t Be a Victim of Negative Thoughts

Many of us have been victims of negative thoughts most of our lives. Although no one can change their thought process overnight, it is important to work on improving it every day. When people allow themselves to become victims of negative thinking, they feel insecure, don’t enjoy their jobs and sometimes make efforts to entice in the workplace, encourage co-workers to join you in the challenge of conquering negative thoughts.

Don’t allow negative thoughts to give you a bad attitude, create negative morale in the workplace or leave you felling defeated. You are not a victim. You must make the choice to challenge yourself to think positively. Before long, you won’t think the cup is half empty or half full, but you will begin to realize it is overflowing with possibilities.

Dam Nak! (Sermon)

2 Siangpahrang 5:3-18Himi Bible cang pawl a zaten kan siar ah cun, simfiang hman ttul lo ding khawpin, Naaman timi ralbawipa ih thuhla kan hmu thei. A tawi zawngin rak sim ka tum ke. Himi Bible cangthlan ih ka tarlang duhbik mi pahnih an um, cucu ralbawi Naaman le an hnenum nute, saal ttuan dingih Israel ram ihsin an hruaimi an si. Himi Bible ih a ngan vekin, Naaman cu Siria ralbawi, hmingthang le siangpahrang ih mi rinsan raldo thiam ngaingai, raldo tinten neh ringring mi pa a si. Asinan, hi ral bawipa in nat tthalo, fihnung zetmi natnak, phaarnat a nei ta riai. Nikhat hnu nikhat a nat a luar vivo tikah, an hnenum nu te cun, a bawinu, Naaman ih nupi hnenah cun, “Ka bawipa hi Samaria ih a ummi profet hnenah va feh sehla ka va duh so! A phaarnat hi a damter rori ding,”tiah a sim. Himi an saalnu le an hnenum nu te ih, ttawngkam hi tthaten kan ruat a si le, ttihnung ngaingai mi a si. Ziangah tile, saal pakhat in kha vekin ttawng le sim ngam ding hi thil awlai a rak si lo. Cu bakah Naaman te hi anung Pathian biakmi an si lo. A pi le a pu an thinheng sehla, a nun nak tiang a cem theimi a si. Asinan, kha nu te cu a biakmi Pathian ih thil te theizia a thei fiangih, a nun nak hrangah ttih nung hman sehla, ral ttha zetin a pinu a sim ngam nak a si. Cucu zumtu taktak pawlih thil tih dan ding khal a si. Cu ticun, Naaman nupi khal cun, a beidong tukah, an saalnu te ih, thurawn cu lungkim pi in a pasal cu Samaria lam pangin a pok suak si kha. Vawitampi cu, Bawi Zisu in kan mi nautakmi le zianghman ih kan siarlo mi milai pawl hmangin hna a ttuan duh ttheu a si. Vawi zingzat kan rak el zo?Cuticun, Naaman cu laksawng tampi a siangpahrang in Israel siangpahrang pek dingah a kenih, a pok suak. A siangpahrang pa in a rinsan tukmi a ralbawi Naaman cu dam tir zangzang a duh tuk tikah, dam nak cu tangka le sui le ngun thawn lei a tum mai si kha. Asinan, Israel siangpahrang in a rak hmuh tikah, “mangbang in a hnipuan a thlek ṭheh ih, “Ziangtin so Siria siangpahrang in hi pa hi rak damter aw tiah i ti men? Nunnak le thihnak huham nei Pathian ah maw i ruah? a ti sikha. Thinlung, taksa le thlarau dam nak hi leitlun hlawnthil in lei theih a si lo.Atawizang cun, profet Elisha in a net nak ah ralbawi Naaman cu Jordan tiva ah vawi sarih hnim aw ding in a fial tikah, awlai te Naaman in a tuah duh lohli hrimhrim lo. Ziangah tile, ralbawi hmingthang pakhat veih, miram ih tiva fate pakhat ih hnim aw men ding cu a siangaw lo si kha. Amah le amah a duhaw tuk lai. Pathian hnen kan pan tikah, kan si nak le kan thiamnak pawl kan tanta an ttul a si. Ralbawi pa cun, profet Elisha in kutsuang in thla i cam dingih ka dam ding tin a rak beisei nasa nan, a beisei vekin a rak si ta riai lo si kha maw! Vawi tampi cu Pathian in cutin i tuah sak dingih, cutin ka um ding tin kan suangtuah ttheu nan, Pathian ih in tuah sak dann le kan suangtuah dan cu a linglet aw ttheu a si. Vawi tampi minung lam in Pathian duhdan le hnattuan dan kan theithiam lo ttheu.Cuticun, Naaman khal cu, a sinak taktak mi tampi ih an rak theilo mi le an rak hmu dah lo mi cu, Jordan tiva kap mi tampi hmaiah a lang tir a ttulta si kha. Khami laiih a ruat dingmi cu, “ka ralbawi thuam ka hlih cun, ka phaarnat le ka taksa siat nak hmuahhmuah in hmu ttheh ding sikhaw….” a ti tengteng ding ka zum. Asinan thlan ding dang lamzin a nei nawn lo. Dam a duh ah cun, a ralbawi sinak kha hlih in, lawngfang kheh ih a um ttul hmaisa si kha. Cuticun, ngamlo le mualpho cingin, a ralthuampi cu pakhat hnu pakhat a hlih ih, Jordan tiva sung ah a ttum ta si cu.Jordan tiva sung a um lai khal ah, a ruat dingmi cu “vawi sarih rori ka hnimaw dingih dam lo pang sehla, ka mualpho ding sikhawh aw…” tivek tla in a ruat men ding. Cu ti cun, “vawikhat, vawihnih…” tin a siarih tisung ah cun a hnimaw. “Vawithum…” a taksa a hung zoh dingih, danglam nak a um cuang lo cun, a thin phan nasa ding. “Vawili, nga, ruk…hmmm..thih le thih vawisarih” a ti ih, ti sungin a rak suak sal tikah cun, “a taksa cu a dam ṭheh ih naute taksa bangin a ngil lellel. Cuticun mi thiangfai ah a cang.” tin Bible ah fiang ten kan hmu. Duhdawtmi unau pawl, pianthar nak diktak kan neih tikah cun, kan sinak hlun (original) hngakih ttha sawnin Pathian in in thleng thei a si.Tuini ah kan unauza lakah, Ralbawi Naaman vekin thlarau lam ah damlo kan um maw? Nitin kan nun nak ah, mi ih hmuh theilo mi harsat nak le mi ih theih leh hmuh kan phanmi pawl an um pang maw? Cu vek pawl an um in kan nei ve a si ah cun, Pathian hnenah ap hna thiam in, kan pan ah cun, damnak kan hmu ding a si. Kan mah le kan mah duhaw in le ralbawi Naaman ih, ralthuam vek hruk ringring in kan hlih duh lo ah cun, dam nak famkim kan hmu theilo ding a si. Kan phaar natnak dam ding ah cun Jordan tiva ah vawisarih hnim kan ttul a si.Pathian in kan zate hrangah thlasuah pe hram seh…..Amen…

Kan Beidong Ngaingai Maw? (Sermon)

Mtt.9:20-21, Mk. 5:21-34, Lk. 8;40-48

Himi Bible cang pawl sungah hin kum hleihnih sung thiisen dawk ih natnak tuarnu thuanthu kimten kan hmu thei. Himi nute ih a natnak tuarhar daan zia ding cu, mipa pawlhngakin nunau pawlin an thei thiam sawn ding. Ziangah tile thlatin ni hnih thum sung thii an neih hman khi, a tuar har pawl hrangah cun a harsa an ti nasa. Abikin Judah daan ah tla cu nunau pawl thii an neih tikah, mithianghlimlo ah an retih, hmundang tenah, thii an neih sung hmuahhmuah cu an mah te lawng an um tir. An thii a rat nawnlo in, khawlh aw verver in milak ah an tlang thei sal.

Judah daan kan zoh ah cun, himi nute ih kum hleihnih sung rori a tuarh daan zia ding hi, kei tla cun ka ruahnak in a daih lo. Himi nute hi, thlakhat cu simhlah, kumkhat khal silo, kum hleihnih sung rori sun,zan ih thiineih ding cu a ruatin ka ruat thiamlo. Amah le a mah hi a ningaw ding bakah, a rim hrimhrim hi tuarhci a si lo ding ti uh law! Milak ah le duh vekin a tlang ngam lo ding.

Kan Bible ih a sim dann ah, a neihmi paisa hmuahhmuah thawn Dr. tthattha rawn in leh si tthattha leiih a enkawl aw nasa nan, a dam thei cuanglo ti si kha. Amah lawng beidong si lovin, a tuamhlawmtu Dr. pawl tiangin an bei a dong ti si kha. Himi nu te hi damsan cu a neilo rori tinak a si mai. A va beidong thlak zikve! Asinan, vawikhat cu van tthat leh malmak ah an khuaah “Zisu” timi tlangval hmelttha midam tir thei a ra ding ti a theih tikah, thih le thih tin mipi lak ah a rak bawh ve si kha. Hitawkah, mipi lakih va suak ding hmanhi, mipi in an theih cihcet ah cun, mi fihnung le dann thlunlo tin, hnarpawn ah an hlawn theimi a si. A nung nak tianghman a cem theimi a si. Asinan, himi nute cun, thih le thih tin a pawk suak si kha.

Mipi lakah midang vekin langsarin a tawngngam lo tikah, Zisuh ih puanzim te tal dai ngah tengteng dingin a zuam si kha. Citicun, Zisuh ih puanzim te a dai veten Zisu in, “Mi pakhat khat in i tham a si, ziangah tile ka sung ihsin huham a suah kha ka thei,” tiah a ti.” Hitawk ah hin, Zisu in a dunghlun pawl a sut tikah, a dungthlun pawl cun, hitluk minung tampi lakah zobikin a lo tham ticu sim a har ding an ti. Duhdawtmi unau pawl, tuini ah mitampi cu “Zisu, Zisu, hosanna” ti celcel in le Zisu dung ka thlun an ti ttheunan, Bawi Zisu huham suak khawp dingin an thlun in an ring taktaklo a si. An thawn an thang ruri nan, huham a neilo a si. Himi thisen dok nu te cu, mivekin a feh theilo bakah, a au ciamco ngamlo nan, a zumnak in a dam tir ta riai. Amah vek zumtu si hi a hlawk sawn ti uh law!

Zisu in “Zoin in tham?” tin a sut kha a theih tikah, khami nute kha a thin maw a phang ding, a lungawi sawn pei ka ti rero ttheu. Zisu in kha nute zumnak a theih tikah, “Na zumnak vek in na dam” a ti si kha. Cutlukih lungawiza thuttha cu khami nute nun ah a um nawn ding ka zum lo. Judah dann hmuahhmuah pah tlang in le, zumnak maksak thawn Zisu a pan tikah damnak a ngah ta riai si kha. A va sunglawiso!


Duhdawtmi unau pawl, tuni ah ziangvek dann le dunn in ha in phuarbet ringring lai, kan nun hi kan ning cuahco caan a tam maw? Na bei a dong taktak zo maw? Nitin kan nuncang ziaza ah kum hleihnih sung thiidok hngakin ten um in kan um maw? Kan rim a sia hiamhiam maw? Thinlung, taksa, thlarau damnak pe theitu Zisu kan pang kei uh. Krih ah cun Judah dann, Lai dann, Miraang dann ti a um nawn lo,miluat kan si ttheh zo. Zumtu hrang ah cun Krih dann lawng a um.

Pathian in a thuthangttha thlasuah pe hramseh! Amen…..

Na Inn Hnen Zo Asi? (Sermon)

Baibal caang: Luka 10:25-37…

Himi Baibal caang hi kan siar le cu, a tawi zawngin Samaria mittha pa tahtthim nak thuhla fiang zet in kan hmu thei. Tu sun ah nang le kei tla mi pakhat khat nih na inn hnen zo a si? In ti sehla zo si kan ti ding. Mi tamsawn nih cu kan inn kiang ih um vemi pawl maw si lole kan rualpi ttha bik tivek maw kan inn hnen an si kan ti men thei. Asinan Baibal nih cu danglam zetin in zirh. Himi Baibal caang hi thuk deuhin kan zoh tum hnik pei.

Hitawkah, dannthiam pa (lawyer) nih Bawi zisuh kha “Kumkhaw nunnak co thei dingin ziang ka tuah ttul?” tin a rak sut. Hipa nih a sut duhnak san hi kumkhaw nunnak nei duh ngaingai ih sut si sawn lovin, Zisuh nih ziangtin a tipei timi ruahnak ttha lo thawn a sut mi a si. Tulai san ih hrekkhat nih “ka va khawm dingih tusun thusim panih ziang a sim pei?” tifang ih ruahnak thawn a sut mi bek tluk hrawng a si. Zisuh nih cu a thinlung a thei keukeu. Asinan, lungsau le aw nem ten “Baibal sungah zingtin a um tin?” a suttu pa kha thusut nak lala in a sang riangri. Daanthiam pa a cem ta riai aw. Thu ka sut a tinan, amah riangri kha Zisu in thu sut nak in a thusutmi kha a let si kha.

A tawizang in cu himi Baibal caang kan siar le kan hmu dingih, Baibal ih Bawipa cu na thinlung zaten duhdawt ding, na inn hnen na duhdawt ding tivek pawl kha cu ka nauhak laiten ka tlun ttheh zo a ti si kha. Asinan, hitawkah ka inn hnen cu zo a si a ti lala fawn. Cu tikah Zisu nih himi “Samaria mittha pa tahtthim” nak in a sim fiang.

Israeli pawl ih daan ah cu Israel mi nih gentile (Israel) a silomi a va thah le khal sual a si lo. Cubakah gentile mi thizik te an hmu hmanah tuamhlawm dingin ttuanvo kan neilo ti a si. Hitawk ah Israel pakhat cu Jericho le Jerusalem karlak ah khawl a tlawngih, misual pawl nih thi dawk thi dawk lo in an tanta ti si kha. Himi lamzin hi, tihnung ngaingai mi lam si a si, Khami san lai ah cu thisen in khatmi lamzin tin an rak ko, ziangah tile himi karlak ah misual le mithat hmang an tam tuk. Himi lamzin cu Jericho le Jerusalem karlak ah a um mi a si. Ahmaisa bikah khami lamzin ih ra lang cu puithiampa a si kha. Puithiam pawl cu Pathian thawn direct in biakw in, mi hh ih sual thlah dinhih dil thei cu an si. Biakinn ih a thianghlim bik hmunah an mah lo cu lut thei a si lo. Cupa cu Jerusalem ah raithawn nak le sual thlah nak pawl a vatuah hnuah, Jericho ih tlungsal ding in a feh lai fang a si cu. A miphun pi a si rori mi a hmu konan, misual pawl nih in thah ve pang ding ti aphang ih, a run ngam ta riailo. A kiangkap a zohih mi nih in hmun lopam tin a feh san si kha. Cuvek puithiam cu a va mak ee! Tuni ah tla cuvek puithiam, Pathian hnattuan an tampi ding. Mi mithmuh lawngah Pathian hna ka ttuan an tiih, mi nih in hmulo tiveten duh tawkih nun tivek kha a va pawi em.

A pahnih nak ah cu, Levite timi Israel miphun lak ih, Pathian hna ttuantu ding ih Pathian rori ih hrilmi miphun a si mi pa a ra ve si kha. Tthenhra tthenkhat cu Levite pawl hnenah pek a rak si ttheu. Khapa khal Jerusalam lam ah va khawm in sermon ttha zet a va pek hnuah a ra tlungsal ve cu si awm tak, a lamzin ah mi thizik te a miphun pi a hmu ta riai. A ni khal a kiangin a va zoh nan, zohman nih in hmu lopam tin, thih ttih ah a tlang san daih si kha. Khami sun ah Jerusalem biakinn pi ah hmuah nasa zetin, mi zangfah nei ding tivek le Pathian duh zawng tuah ding pawl Jerusalem ah cu a sernmon nasa nan, amah can nagingai a thleng ih a sim vekin a tuah thei ta riai lo.

A neita bikih ra mi cu, Israel miphun pawl ih an nautak emem mi Samaria pa te a si. A hmu veten hliamhma tuarpa cu a va zohih, a theihtawk suahin a tuamhlawm si kha. Zangfah ngil neinak neimi pa a si. Hitawkah, gentile pawl nih Israel pawl hi an ngaih ve ce lo ding. Ziangah tile an nautak tuk. Asinan, hipa nih cu zangfah nak thinlung a nei ih, a tuamhlawm. Cu lawng sivoin, a hma pawl cu oil le sabit wine in a khawlh sak si kha.

Sabit wine le oil hi Israel dan ah cun hliamhma an pu tinten thianhlim nak ah an hmang mi a si. Cumi um zia cu oil kha thlarau thianghlim a si ih, sabit wine kha thinsen ih thiangfa tinak a si lala. Riakbuk kha kawhhran a kawh hmuh duh ih, paisa pahnih a pekmi kha lawman a kawhhmuh.

Commentary dang ih a sim dan lala ah cun, paisa pahnih kha bawipa zanriah le tihnim (baptism) a kawh hmuh ih, riahbuk kiltu pa kha pastor le Pathian rawngbol tu a kawhhmuh an ti. Hitawkih Jericho le Jerusalem hi leitlun kan um nak le Vanram a kawhhmuh ih, himi karlak khual kan tlawng sungah, setan (misual pawl) in kan thlarua nung cau ko le thih zikten tuah in tum ttheu. Biaknak lam, dann theih le tlun teima lamin, kan runaw tum ttheu nan cu pawl cun in run theilo ruangah, a tawpnak ah Pathian fapa Jesu (Samaria mittha pa) cu run dingah kan hrangah a rak ra. A rak kir hlan sung (till second coming) kaawhhranah um dingin in tiamta ih, a rat sal tikah, lawman siar cawk lo thawn a ra sal leh ding.

Unau, na inn hnen zoha a si?

Pathian in a siartu zate parah thlarau cah nak in pe hram seh…..Amen……

Tleunak (Sermon)

Johan 8:12…..Jesuh cun Farasi mi pawl hnenah, “Kei cu leilungih tleunak ka si. Zokhal keimah i thluntu cu a nunnak ah tleunak a nei ding ih khawthim sungah a feh dah lo ding,” tiah a ti.

Thuhmaihruai:

Scientist pawl nih tleunak ih rang zia (speed of light) hi second pakhat ah peng 186,000 a si an ti. Cucu speed hh lakih rang bik a si. Himi hi tthaten kan ruat le cu, kan biakmi Pathian, thleunak ka si a ti tu Pathian kan nei hi a ropi tuk ka ti. Culawng si hrih lo, a nai bikmi arsi ah minung feh thei hman sehla, kum tampi a ttul ding ti a si lala. Cumi mangbang za siar cawklo, arsi le planet 9 le ni le thlapi tuah ttheh tu cu kan biak mi Pathian a si, Amah control a si ttheh. Pathian hming thangtthat in um ko seh. Amen..
Tulai san tthalo, Pathian ttihzah lo le san tthalo zetih kan um bakah, Krihfa ka si tiaw ve mi pawl nih hman kan biakmi a nung Pathian hming hi, duhduh in kan hmang ciamco. Hrekkhat nih capo nak ah hmangna, hnih suahsai nak ah hmangna in a khat. A sunglawi tukmi le a thianghlim bikmi Pathian hming hi upat kan thiam a ttul.
Baibal sungah kan zoh a si le profet le Pathian hnattuan tampi Pathian ih sunglawi nak le larnak an hmu tikah, an mang a bang, zianghman simsal theilo khawpin, Pathian huham in a zel hai. Pathian ih sunlawi nak an hmu tikah, ziang an si lo zia le an fateh zia an thei aw. Cu pawl lak ihsin a tanglam ih Pathian mi hman pawl hi Tleunak a si mi Pathian an hmu tikah ziangtin an um, an experience ti pawl kha a tawizawng in kan zoh ding.

Job. 38-41 le 42:1-6 pawl kan zoh a si le, Job in Pathian sunlawi zia le Pathian a si nak a hmu fiang tikah nat nak a tuarmi pawl kha nep tuk in a thei aw si kha. 42:5-6 ah .. “Culai ah cun ka hna lawngin ka lo thei, a tu ah cun ka mit rori in ka lo hmu zo. Curuangah ningzat in ka fih aw ih, leivut le vutcam lakah to in ka sir aw a si.” a ti ta riai.

Isaiah 6:1-4 ah hitin a um lala…. Cutikah kei in, “Ka cem a si! Ka ruahsan ding zianghman a um nawn lo. Ka hmur ihsin a suak mi ṭongkam hmuahhmuah cu a sualmi ṭongkam a si ṭheh; misual lakah ka um ih hmurka thianglo lakah ka leeng. Atu ah ka mit rori in siangpahrang, cungnungbik BAWIPA ka hmu fawn,” tiah ka ti. Pathian mihman profet tumpi nih hman hi vekin a hmuhaw ah cun, kan nih mi menmen tla cu sim ding a um lo.

Ezekiel 1:27-28 le Daniel 10:8-9 ah khal Pathian sunlawinak an hmu tikah an thi zik si kha. A va ropui em…Ezekiel nih, 27Cuih pianhmang cu meisa sungih a tleumi dar vaam bangtuk a si. A kiangkap hmuahhmuah cu vaangzet in a tleu. 28Vaangro bangtuk in pianzia phunkim a nei. Hi tleunak cu BAWIPA ih umnak langtertu a si. Tleunak ih a khatmi Pathian cu a va ropui em, Amen..Daniel khal lar aw nak a hmu tikah, a tha a cem ih, a it that cih rori si kha. Pathian huhma a va nasa em. Hitluk ih ropi le thil ziangkim tuah thei Pathian kan nei ko nan, vawi tampi kan thin a phang ttheu. Thin phang nawn hlah uh si. Tleunak ih khat kan Pathian cu sunglawi in um ko she.

Himi Baibal hlun san laiih, profet le Pathian mi hman pawl cu Pathian ih sunlawi nak an hmu tikah, an nun a danglam tir ttheh. Baible thar san ah cu a fapa Jesuh in a rung lang. Jesuh khal a dung thlun tu hrekkhat in larnak an hmuh tikah, an lungawi tuk ah mangbang vansang in an um thotho. Matthai 17:6 ih Peter, James le John hruai in, hmel danglam nak tlang ih a feh pi laiah, Elijah le Moses thawn an lang an hmu cu, nuam an ti tuk le sunlawi an ti tuk ah, thlam lamlam sak sak an tum ciamco kha. Ttih tla an ttih fawn. Cuvek Pathian huham neimi kan nei cu mi vanttha kan va si lawm mam em?

Luke 5:4-8 ih Peter le a rualpi pawl zanvar nga an awk thei lo ih, an beidong laiih Jesuh in nga tampi a awk tir tikah, Peter cu a sualzia le ngakaih thiam a rak tiawk nak a ziaza hlun hh kha ningzat nak le siraw nak ah a cang ta riai. Sualnak neilo tuu fano Jesuh a hmaiih a vun hmu cu, “Bawipa, tlangaw, misual ka si” a ti ta riai si kha. Asinan, kan Bawi Jesuh cun zohman in tansan dahlo ih, Peter tla kha a dung thluntu le a mah hrangih rinum pakhat ah a cang tir sawn si kha. Unau nang le kei teh Jesuh mithmai hmu sehla, kan sualnak le kan si nak pawl kan zoh ngam pei maw?

Paul khal Damaskas khualam pang in zumtu pawl hniksak ding a feh laiah, tleunak a si mi kan Pathain in thleunak in a lam zin a kham sak daih mai si kha. Nithum sung khua hmu thei loin, a mit a caw ta riai. Mifel, mifim, cathiam, pa ralttha, lalfa ra tiaw ve pa, duhaw ve emem pa hmankha theunak in a sun cun, nithum sung rori rawlei lo ti in lo le mit khua hmu thei lo ah a cang riangri. Pathian in minung in hmang duh tikah, minung lamih kan thil ti theinak le kan uaraw nak pawl a lak hmai sa ttheu. Culawngah, Pathian mi hman kan si thei. Pathian in minung hnenah a lar aw tikah minung si nak in a tuarlo ttheu ti a si ruangah, “Ttih hlah” tin in ti hmai sa ringring a si.

Thutawp

Tu sun ah u le nau nang le kei teh kan Baibal sungih zumnak lamih kan pu le pa pawl vekin maw Pathian koh nak kan co hlan ding. Tleunak ih a khatmi Pathian cu ziangtin nang le kei in kan biak ve ding. Paul nih cu kan Pathian cu Lal hh lak ih Lal bik, bawi hh lak ih bawih bik a ti. Nang le kei in the a thianghlim mi le huham thawn a khatmi kan Pathian hming cu ziang tin kan thangtthat ding? Pathian hming sunglawi cu a sunlawih kan thiam pei.

Leilung pumpi tleunak dingah ni pakhat lawng a tawk ih, misual le minung pawl tleunak ih kan um theinak dingah tleunak bawi a si mi Jesuh a tawk. Tleunak sungah sual tuah a theih lo ih, tleunak in thim a hua. Theunak maw thimnak ah kan um? Pathian in a siartu zaten thlasuah in pe hram seh….Amen
(July 23, 2008)

Thla kan cam tawk maw? (Sermon)

Jimmy Carter, USA ih president 39th nak rak ttuan dah pa cu, mi piangthar ngaingai a si. Democratic party hi liberal deuh leh Pathian theilo deuh in an hmu tlangpi nan, Carter cu Democrat party lakih Pathian theibik president a rak si. President a ttuan veten (interview) an tuah nakih an sut mi cu, "president na ttuan hnuah nikhat ah vawi ziangzat thla na cam?" ti a si. A simmi cu "President ka ttuan hnu cu duh vekin caan ka nei thei nawn lo ih ni khatah vawi 24 lawng thla ka cam thei thlang" a ti ta riai. President a ttuan hlanih a thlacam tam dan ding zia cu.....????

Tutum cu Bible cangthlan tam deuhin ka rak ngan ding. Daniel 6:10, 3:16-18, Tirhthlah 8:22, Rom 12:12, 1Thesolon 5:17, Matthai 26:41, Mark 11:25. Daniel 6:10 lawng ka rak ngan lang dingih Bibal bung cang dang pawl cu, nangmah ten rak siar dingah ka lo dil.

Danial 6:10Siangpahrang in a hmin a khen zo, tikha Daniel in a theih tikah a inn ah a tlung. A inn tlunta khaan ahcun Jerusalem lam hoi in sangkate an um. Cutawkah a tuah ringring ṭheu vekin a ong awmi sangkate pakhat kiangah cun a khuk a bil ih ni khat ah voithum Pathian hnenah thla a cam.

Daniel hi Pathian mihman zetmi (major profet) profet picang timi pawl lakih pakhat a si ve. Daniel cu tlangval ttha, mirin um,Pathian ttihzah zetmi a si. Babylon san tthat laiih, cathiam pakhat tla a si. Daniel cu mifel le cathiam a si vekin, Darias timi ram uktu pa cun, ramkulh 120 uk dingin mi pathum lakah a hril ve. Curuangah Daniel cun ramkulh 40 parah thu neih nak a nei tinak si cu, a ropi nasa. Ramkulh cuzat uk ding cun fim le thiam nasat a ttul nasa ding ti auh. Man khal a man lo nasa ding. Asinan, nikhat ah a malbik vawithum cu, sangkate ongin Jerusalem lam hawi in nitin thla a cam thei lai. Nan le kei, ramkulh pakhat hman uk lomi in teh nikhat ah vawi ziangzat ha thla kan cam?

Daniel ih rualpi pathum, tlangval hmelttha Shadrak, Meshak, Abenego pawl tla milem biak duh loin an um ih meidil sa ngaingai sungih an thlakzikah ziang an ti..Meisa alh sungin in hum theitu Pathian a um a si ahcun kan biakmi le kan rianmi kan Pathian lawnglawng a si ih amah cun na cahnak huham sung khal in in hum ko ding. In hum lo a va si hmanah, siangpahrang bawipa, na khawzing pawl cu kan bia lo ding ih na sui milem tuahmi hmai khalah kan kun lo ding, ti cu in theihsak cia aw,” tiah an ti. An va ral ttha lawmman ve ti auh. Fala hrangah cun, hi pawl vek thlangval hi si pasal dingih nan hril dingmi. Mi ral ttha, huaisen ka timi cu hi te pathum vek hi an si. An biakmi le an zummi zo a si, ziang a tuah thei ti an thei tuk si hi. Hi te pathumih zumnak vek hi kan va ttul em. Mitam pi cu Pathian hi kan hrangah hlawknak a um lo ah cun, kan biak ttha duh lo, kan phunzai theu. Asinan hi te pathum cun, Pathian in in hum lo hmanah, Pathian cu kan phatsan dahlo ding an ti si kha. Nan le kei teh kan tingam ve kem?

Vawikhat cu South Korea ih Pathian hnattuan mihming thang kawhhran member 700,000 lenglo neitu Dr. Yong Ki Cho ih (spelling ka sual ding) fapa (food poisoning) rawl a ei sualih sizungah a thleng. Dr. pawl in a ril pawl in an tuar loih, zinghman kan tuah thei nawn lo an ti ih, a fapa te cu a thi ta riai. Cu veten, Dr. Cho cu zisung in tlunlam ah a kaiih, khukbil in nasa zetin thla a cam ciamco. Thla a cam laiah, setan cun, "Na fapa cu a thi zo, thla cam man a san tlailo, Pathian hna ttuan pa na mualpho riai" tin a hniksak rero. Asinan, Dr. Cho cu thla a cam rero thotho ih, a fapa te cu nasa zetin a thil ei mi pawl a luak suak ttheh salih, arak nung sal. Himi a thlacam sung hi nazi kar tam ngaingai sung a si an ti.A fapa in a sim mi cu, "Ka pa ziangah thla na cam ee, kei cu Bawi zisu nih ka kut in kaiih, Sui ih tuahmi khawlipi mawi ngaingai mi sung kan lut zik fangah, Zisu in 'na pa thlacam ka hnial theilo, va ttum hrih aw la, neh hnuah ka lo ko sal leh ding' in ti" a ti. Unau tusun ah nat nak na nei maw, cancer, TB, Hepatitis tvp le mi rel hmang natnak, mi huatnak natnak, mi iksik natnak, hurnat nak, rittheih thil duhnak, duhham nak, sual tuah duh nak natnak tvp. Cu pawl cu kan biak a nung Pathian in a dam tir ttheh thei. Zumtu thlacam nakin tih theilo mi a nei lo.

Zumtu nun ah thlacamnak neilo cun, umzia a neilo. Thlacam lo nun cu tidai le dawm pe lomi antam hmuan thawn a bangaw. Thlacam nak nun um lo cun, thlarau lamah a thangso aw theilo bakah, hnangam nak ngaingai a um theilo. Bible tlawng ka kai laiah, nikhat ah a malbik nazi pahnih sung tal Bible siar le thlacam in caan ka rak hman dah. Kha laiih, ka nun hlimzia le ka thawveng dan kha ka ngai cuahco. Tu ah cun zingtin Bible (Our Daily Bread) "Nitin thlarau rawl" siar le khuhbilih thlacam bak lo cu, ka ti thei tuk nawn lo. Hihngakin can tam ka pe tum rero lai. Asinan um men khalah ka thinlung ten thla cu ka cam ringring. Sim duh sawn mi cu ca kan zir laimaw, mawtaw kan mawn lai maw, hna kan ttuan lai maw khalah, kan thinlung ten thla kan cam thei ringring a si. Kan Pathian hi a va ttha em, kan mah kan siarem naknak in thlacam in kan biak thei. Pathian hming thangtthat in um ko seh! Nupi pasal nei, fate nei kan si ah cun kan nupi/pasal fate parah kutsuang in thlacam sak uh si. Thlacam kan ttul. 1 Thesolon 5:17 ah "Thlacam ringring uh" a ti.

A net nak ah.....

@Khawlvelih lalbik a simi, (super power) neimi USA president hlun Mr. Jimmy Carter cun nikhat ah vawi 24 thla a cam thei lai......
@Profet Daniel, Babylon san tthat laiih prime minister tluk simi cun, nikhat ah khuhbil in vawithum thla a cam....
@Dr. Cho cun nazi kar tam zet sung thlacam nak in thihnak tur a net......
@Kan Bawipa Zisu cu Gethsemani hmuan sungah thlanhri thisen suak in thla a cam...

Unau nan le kei tuni ah kan mai hrang, kan inn sungsang hrang, kan fa le hrang, kan nupi/pasal hrang, kan rualpi hrang, kan ral pawl hrang, kan kawhhran hrang, kan miphun hrang le kan ram hrangah vawi ziangzat mithli tlak, thlanhri tlak le lung kekkuai in thla kan cam? Nikhat ah second, minute, nazi paziat sung thlacam nak ah kan can kan hmang? Thla kan cam tawk maw?

Pathian in a siartu zaten thlasuah in pe hram seh...

Lungawi,
Piangte
(Oct.12, 2007..12:26pm, Indianapolis)