Dam Nak! (Sermon)

2 Siangpahrang 5:3-18Himi Bible cang pawl a zaten kan siar ah cun, simfiang hman ttul lo ding khawpin, Naaman timi ralbawipa ih thuhla kan hmu thei. A tawi zawngin rak sim ka tum ke. Himi Bible cangthlan ih ka tarlang duhbik mi pahnih an um, cucu ralbawi Naaman le an hnenum nute, saal ttuan dingih Israel ram ihsin an hruaimi an si. Himi Bible ih a ngan vekin, Naaman cu Siria ralbawi, hmingthang le siangpahrang ih mi rinsan raldo thiam ngaingai, raldo tinten neh ringring mi pa a si. Asinan, hi ral bawipa in nat tthalo, fihnung zetmi natnak, phaarnat a nei ta riai. Nikhat hnu nikhat a nat a luar vivo tikah, an hnenum nu te cun, a bawinu, Naaman ih nupi hnenah cun, “Ka bawipa hi Samaria ih a ummi profet hnenah va feh sehla ka va duh so! A phaarnat hi a damter rori ding,”tiah a sim. Himi an saalnu le an hnenum nu te ih, ttawngkam hi tthaten kan ruat a si le, ttihnung ngaingai mi a si. Ziangah tile, saal pakhat in kha vekin ttawng le sim ngam ding hi thil awlai a rak si lo. Cu bakah Naaman te hi anung Pathian biakmi an si lo. A pi le a pu an thinheng sehla, a nun nak tiang a cem theimi a si. Asinan, kha nu te cu a biakmi Pathian ih thil te theizia a thei fiangih, a nun nak hrangah ttih nung hman sehla, ral ttha zetin a pinu a sim ngam nak a si. Cucu zumtu taktak pawlih thil tih dan ding khal a si. Cu ticun, Naaman nupi khal cun, a beidong tukah, an saalnu te ih, thurawn cu lungkim pi in a pasal cu Samaria lam pangin a pok suak si kha. Vawitampi cu, Bawi Zisu in kan mi nautakmi le zianghman ih kan siarlo mi milai pawl hmangin hna a ttuan duh ttheu a si. Vawi zingzat kan rak el zo?Cuticun, Naaman cu laksawng tampi a siangpahrang in Israel siangpahrang pek dingah a kenih, a pok suak. A siangpahrang pa in a rinsan tukmi a ralbawi Naaman cu dam tir zangzang a duh tuk tikah, dam nak cu tangka le sui le ngun thawn lei a tum mai si kha. Asinan, Israel siangpahrang in a rak hmuh tikah, “mangbang in a hnipuan a thlek ṭheh ih, “Ziangtin so Siria siangpahrang in hi pa hi rak damter aw tiah i ti men? Nunnak le thihnak huham nei Pathian ah maw i ruah? a ti sikha. Thinlung, taksa le thlarau dam nak hi leitlun hlawnthil in lei theih a si lo.Atawizang cun, profet Elisha in a net nak ah ralbawi Naaman cu Jordan tiva ah vawi sarih hnim aw ding in a fial tikah, awlai te Naaman in a tuah duh lohli hrimhrim lo. Ziangah tile, ralbawi hmingthang pakhat veih, miram ih tiva fate pakhat ih hnim aw men ding cu a siangaw lo si kha. Amah le amah a duhaw tuk lai. Pathian hnen kan pan tikah, kan si nak le kan thiamnak pawl kan tanta an ttul a si. Ralbawi pa cun, profet Elisha in kutsuang in thla i cam dingih ka dam ding tin a rak beisei nasa nan, a beisei vekin a rak si ta riai lo si kha maw! Vawi tampi cu Pathian in cutin i tuah sak dingih, cutin ka um ding tin kan suangtuah ttheu nan, Pathian ih in tuah sak dann le kan suangtuah dan cu a linglet aw ttheu a si. Vawi tampi minung lam in Pathian duhdan le hnattuan dan kan theithiam lo ttheu.Cuticun, Naaman khal cu, a sinak taktak mi tampi ih an rak theilo mi le an rak hmu dah lo mi cu, Jordan tiva kap mi tampi hmaiah a lang tir a ttulta si kha. Khami laiih a ruat dingmi cu, “ka ralbawi thuam ka hlih cun, ka phaarnat le ka taksa siat nak hmuahhmuah in hmu ttheh ding sikhaw….” a ti tengteng ding ka zum. Asinan thlan ding dang lamzin a nei nawn lo. Dam a duh ah cun, a ralbawi sinak kha hlih in, lawngfang kheh ih a um ttul hmaisa si kha. Cuticun, ngamlo le mualpho cingin, a ralthuampi cu pakhat hnu pakhat a hlih ih, Jordan tiva sung ah a ttum ta si cu.Jordan tiva sung a um lai khal ah, a ruat dingmi cu “vawi sarih rori ka hnimaw dingih dam lo pang sehla, ka mualpho ding sikhawh aw…” tivek tla in a ruat men ding. Cu ti cun, “vawikhat, vawihnih…” tin a siarih tisung ah cun a hnimaw. “Vawithum…” a taksa a hung zoh dingih, danglam nak a um cuang lo cun, a thin phan nasa ding. “Vawili, nga, ruk…hmmm..thih le thih vawisarih” a ti ih, ti sungin a rak suak sal tikah cun, “a taksa cu a dam ṭheh ih naute taksa bangin a ngil lellel. Cuticun mi thiangfai ah a cang.” tin Bible ah fiang ten kan hmu. Duhdawtmi unau pawl, pianthar nak diktak kan neih tikah cun, kan sinak hlun (original) hngakih ttha sawnin Pathian in in thleng thei a si.Tuini ah kan unauza lakah, Ralbawi Naaman vekin thlarau lam ah damlo kan um maw? Nitin kan nun nak ah, mi ih hmuh theilo mi harsat nak le mi ih theih leh hmuh kan phanmi pawl an um pang maw? Cu vek pawl an um in kan nei ve a si ah cun, Pathian hnenah ap hna thiam in, kan pan ah cun, damnak kan hmu ding a si. Kan mah le kan mah duhaw in le ralbawi Naaman ih, ralthuam vek hruk ringring in kan hlih duh lo ah cun, dam nak famkim kan hmu theilo ding a si. Kan phaar natnak dam ding ah cun Jordan tiva ah vawisarih hnim kan ttul a si.Pathian in kan zate hrangah thlasuah pe hram seh…..Amen…