1991-1993 ah USA Scientist pawl in kan leilungpi vek, leilungpi lem million $180 cem in an tuah. Cumi cu "Biosphere 2 Project" tin hmin an pekih lenglam boruak thli le ruah lut le tuar theilo dingin "dome" vekih inn tumpi sungih tuahmi a si. An tumtah bikmi cu kan leilungpi ziangtin a um ih, ziangtin kan kilkhawi tha thei ding ti hi a si bik. Cumi ahcun rannung le thinkung ci dangdang 3,800 lai a um.

Cumi ah mangbang thlak zetih an hmusuakmi pakhat cu thingkung pawl an cin mi cu lenglam boruak ih ummi thingkung pawl hnakin an thangcak ih an tum cak zet. Sinan, thingkung pawl an thang ding zat tiang an thang hlanah, an thi cingcing. Cumi ih an hmuhsuak ngahmi cu, "dome" pi sungih an cinmi thingkung pawl cu, lenglam ih thingkung pawl vekin thlisia le ruahsia pawl an tuar tul lo tikah, hram hnget zetin a um theiloih, an thi cingcingnak a si ti a si. Cucu "stress wood" an timi, thingkung hrampi hnget tirtu le fek zetih kho tirtu a umlo ruangah ti si.

Curuangah thingkung a si ding tiang a si theinak ding le a thang dingnak ahcun, thilsia ruahsai tuar a tul ti a si. Cuvek thotho in minung kan nungnak khalah kan si ding zat le kan thangso dingzat kan thangso theinak dingah cu kan nunnak ah thlisia le ruahsia vekin kan caknak dingih in tur theutu le harsatnak pawl um a tul ve theu. Cuih harsanak pawl cu kan hrampi in hnget tirtu ding le in cak sinsin tirtu ding an rak si sawn theu!