Ka Sun Mang

Pathian zangfahnak le rinsanmi pupa, ṭuanvonei bawi upa le mipi pawl teimaknak zarah kum zabu 21 hnu ah Kawlram ih state hnufualbik Chin state khalah airport (Surbung) kan nei thei zo. Zoin hma a lakih, zozo pawl credit co ding an si tivek cu kei ka ngan nawnlo ding. Credit cotlak hmuahhmuah credit pe thiam uh si!

Himi cahram ih ka hmuitim mi sawn cu, Falam khua ah Surbung Airport kan nei zo tikah mikhual, khualtlawng le tourist lengvak tam dingin ziangmi tuah sehla a ṭha ih, ziangtin timlam sehla tvp… keimah tlin tawk le ka theih ban tawkih ka nganmi a si. Ramsung ṭuanvo neitu le private company mawi tawk khalin tampi plan an nei zo mi a si ko ding. Diriamnak ah ka rak ngan ve rengreng ding.

Khale airport kan nei cun, ṭuanvo kan neihmi a kau in, a tum sinsin. Pathian thlawsuah kan co ih, Kawlram ih tlangpar ramih neihmi airport lakah a mawibik le a sangbik (6000 feet above sea level) a si. Kawlram sungmi lawng siloin, ramdangmi tourist attraction hrangah abikin Falam pengih kan tuah theimi ka tar lang duh. Pengdang cu ka thei banglo ruangah Falam huapin lawng ka rak ngan ding.

A tawizawngin, Falam pengah ziangmi kan tuah thei;

1) Lailun: Lailun hi Laimi (Chin thuanthu) ih kan hrampi pakhat umnak a si ve. Lungkua feh tlak zet a um. Ka thleng zonak a siih, zohtlak hmuhma pakhat a si. CCIT ih ṭuanvo laknakin duum (garden) mawi zet tuah rero a si. GCO ih ṭuanvo laknakin Lailun Museum innpi khal ṭhehsuak lam a pan rero. Hi pawl hi ramsung le ramleng ih mikhual (tourist) pawl zohtlak rori in professional zetin tuahṭhat vivo tum ding. Sumpai lakluhnak ah hman ding.

2) Zinghmuh Tlang: Kan pupa pawlih thuanthu ah thupi zetih an rak retmi tlangsang pakhat a si. Himi hmun le hma hi natural park vekin acozah lam lole bulpak company khalin ṭuanvo lak vivoin, hiking tuah theinak trail tete tiang tuah thei in le a tlangih hmun remnak ah camp tivek (Western style) group le bulpak tete ih nei thei dingin tuah vivo ding. Sumpai lakluhnak ah hmang ding.

3) Taisun: Rampi theihmi mirang rak do lai khalih zamlo Pu Con Bik suahkehnak khua (Tu khalah zoh thei dingin cu a um zo) nasa sinsin in mipi zohtlakin a innpi le a khua ceimawi sinsin ding. Sumpai lakluhnak thotho.

4) Thang Tin Lian: Miuk Pu Thang Tin Lian umnak khua le innpi khal vehvaitlak museum pakhat vekin tuahih sumpai lakluh tum ding.

5) Lente bel: Falam ih Lente bel tuahnak khua Lente khua ah khal pumcawmnak tlak lawlaw in mikhual zohtlakin an bel tuahnak san man deuhin kilhim in tuahṭhat sak vivo ding. Fee lakin mikhual zohtlak ah tuah ding.

6) Rih: Rih dil hi ka thleng zoih, zuk le mipi ih kan sim mawi tlukin a hmun thlen tikah tuah ding cuca le zoh ding cuca a um lo. Rih dil ah san man deuh boat tete ret thei in, a kiangkap khalah hotel ṭha deuhdeuh le recreational park phun tuah in mikhual tampi hip dingin tuah vivo ding.

7) Falam khawsung ah hotel le restaurant tu hnakih tamin sak vivo kan ṭul.

8) Kan mipi le peng le ram hrangah sumpai tampi kan lakluh vivo theinak dingah kumkhat veikhat tivekin (Ni hnih, thum sung) nunphun puaipi (Chin cultural festival, music festival tvp..) Chin ram zate huapin tuah tum ding. Cang thei le India ramih Northeastern tlangparmi unau pawl tiang sawm ding. Run inn tlun kum puai sunzawm vivo tum ding.

Himi lo tampi ramsung um pawlin nan thei sawn ding, hlaralin seherhnak le saduhthah ka rak ngan mi a si. Ram sungin timlam ciami le tuah rero zo mi khal tampi a um ding ka zum. Pathian in leilungpi a hmun tir hrihih kan dam ahcun, Mirang ṭongin “Let us make Falam great again”! Cutin Laitlang/Chinram a mawi sinsin ding!