Zumtu & Mangbangza (Miracle)

Tulai leitlun dinhmun lole COVID-19 dinhmun kan zoh le zumtu, zumlotu, milian, mifarah, zozo khal himi naatnak ngah le thimi tampi an um. Zumtu hrekkhat cun “Pathian zumtu kan sisi, ziangvekin kan um khalle Pathian in in humhim ko ding” tin ruatih, duhduh in um, thu thlun ding timi khal thlun cuang lole thungai duhloih, duhduh ih um tete an um vekin, naatnak ngah cih tla an um ve.

Hrekkhat in Bible sungih, Daniel te rualpi rual meilipi sung an thlakih Pathian ih a runnak lole Daniel kiosa kua ah an thlak nan Pathian in a humhim nak tivek pawl (reference) thaṭhimnak ah lakin COVID-19 lak khalin ziangvekin kan um khal le Pathian in, in humhim ding tivekin ṭan lak an um. Tirthlah 28:3 ih Paul, Malta tikulh ih rul (viper) cuk a tuarih a thilo vekin Pathian in in run ve ko ding titu khal an um thotho.

Kan theih ṭul zet tiih ka ruatmi cu Daniel te san laiih, Pathian ih meilipi sung le kiosa kua ihsin a runhim nak kha, Pathian thu an ngai ruangah sawn a si. Milem biak an duhloih, A nungmi Pathian an hril sawn ruangah le, Daniel in nikhat vei 3 Jerusalem lam hoi in Pathian a biak ruangah Pathian in a humhim nak sawn a si. Tulai ih, COVID-19 dinhmun (context) thawn zianghman pehpar awknak a nei lo.

Cuvek thotho in Paul, kut rul in a cukih a thilo mi khal, Pathian in tumtahnak a neih ruangah a thi tir loih, Malta tikulh ih um Pathian theilo pawl, hrangah Pathian thil ti theinak lang dingih Pathian in tumtahmi sawn a si ti sehla tampi a suallo ding. COVID -19 ih dinhmun le himi ih tahṭhimnak kan hmanmi pawl hi, pakhat le pakhat tahṭhim ding rual an si lo. Pathian ih mangbangza a tuahmi hmuahhmuah ṭhimnak ah Peter ti parih a feh tir mi tivek tla, zumnak ka nei ve si, ka feh ve ding tin feh tum ve sehla, tisung ih tlak nak sawn a si ding. Ziangah tile Peter hnenih Jesuh ih feh theinak thu a pekmi kha zumtu zate parah in pek kherkher lo thei.

A tawinakin, Pathian kan zum kan timi hi, a silo zawngin kan hmanglo ding a thupi tuk. A thupibikmi sawn cu thungai nun nei ding kha a si. Pathian thu kha kan ngai hmaisabik dingih, a sangtu ah thuneitu pawlih thu (Pathian kan zumnak thawn a kalh awklomi) pawl thlun ding kha zumtu pawlih kan tuah dingmi sawn a si. Pathian cun san nei zetin lawng mangbangza a tuah.

COVID-19 naatnak cu, Daniel te san lai vekin, acozah thusuah nan thlun dingih milem nan biak ding, Pathian nan biak lo ding tivek ih thusuah an tuahmi a silo. Bible ih cangmi pawl cu step by step le process dik takin a cangmi an si. Daniel tla Pathian thu a ngainak sawn ruangah hremnak a tuarih, cumi ah Bawipa in a runhim a si. Amah thu ten, Pathian in in run ko ding tiin, kiosa puk ah a lut hrimmi a silo ti kan thei ding a thupi zet.

Curuangah, acozah ih mipi hrangih ṭha a timi thusuah pawl cu Pathian rinsan cingin thlun hiahho men ding kan si. Cuti siloih, Bible sungih mangbangza Pathian tuahmi pawl suanlam hmangin zumtu kan sisi poilo, kan duhduhin kan um ding kan ti ciamco pangah cun, zumnak mitcaw si a ol zet.