Pa Pa

Khumhmun khawsuak, khawte fa ka pa duhtak, Pu Ral Sai Lo
Na inn le lo neihsun hmuah, Pathian hril sawn ruangah,
Nawhkaang na tuar, na ngaidam thei, pacangttha ka pa
Zumnak ih rinsantlak Chin pasalttha ka pa

Tlawngkai duh kuahko nan, zirsang thiam manlo
Nu le pa rian ttulah, Laica phunli ong ka pa
Hmanseh, carel paih le ngan paih ka pa
Degree ngah tampi’n tluk ruallo ee,, na ttuansuakmi..

Ka sentet lai ihsin, ttihzah upatmi ka pa
Innhlum thiamlo, fur tthal khalah a suk a so..
Teimak suahin, na rian Pai’ hrang ttuantu ka pa
Ram le miphun, na tlin tawkin na cawmdawl si..

Mai ttong teih, Bible siar ngainabik tu ka pa..
Falam khawsung, Bible thlengzaan, biakinn pan in, Bible na hnam na fawp..
Pathian thuthiang sunlawih thiam le a duhdawttu ka pa
Na fahniang khal, tlin tawkte in, lo bang dingah ka ke ka kar..

Na pian ruangrai, Chin pacang ah zahpi umlo ka pa
Nufa thawn laihlum thiamlo, ttuanttul ruangah..
Laihlum sunah, Innsang khawm, in kaihruaitu ka pa
Exam neihcaan, na kut suangin, thlaza in cam, mitthlam ah a caam..

Thil tuahsual caan, hna saa hehe ko in bengtu ka pa
Na duhdawtnak a thukzia, ka theithiam ee..
In duhdawtnak na aw kaa hrang, hna ah a cam ka pa
Theihsal ka duh caan a tam, a theih si lo……

1988 rampi buaiih, ka fehsuak hlan, thu in cahtu ka pa
Raltthazet le ngamzet in thudik ah ding dingin..
In caahta mi, hngilhni umlo, ka cing ringring ka pa
Na mitthlidum, mitthlam sungah mani bangin a caam lai..

Pathian hnattuan, ram, miphun le calai seherhnak ah ka lo thlun zik ka pa
Kumpi kumli sung, hramlak um caan..
Nunu thawn, in ngaihnak hla, nan rak leh aw….ka thin i zun…ka pa
In ngainak ca, na diary ih na khummi tla…ka thin i pem….

Sungkim te in, ruuninn nuamah nehnak thawn kir tum hmangning, cang thei nawnlo....
1993, tlungkir dingin, mitthli thawn in lem lai te kha… ka pa
Na kut phar in Aizawl ihsin in thlah zaan, na mithmaite ka pa
Leitlun damsung kan hmu aw netzaan a rak si ee….Rak thei ningla….

Na ngaisangmi, vairang ram ah ka um zonan ka pa
Hmanseh, nang cu na duhbikmi Pai’ ttangnem-Vanram nuamah ….
Ka hmin sal in, na hnuk a cat…… a cuih ka thin papa
Na fapahniang, ram hrang ttuan le tlungthiamlo in, pai ruak vui thiamlo ee…

Nunu thawnih thlaza nan cam mi pawl, ka pa..
Nan thlasuah ro ..tesin fa in kan rak co ee..
Ro sunglawibik na tu le hnen, roh ve ka tum ka pa
Cung vansang in, in run thlir law…papa

Pai’ sunlawih ni a thleng tinten, ngainak a zual papa..
Mitthli tla in, hmang ko ninglaw ziangaw tittha..
Tum ruhnak thawn, na kenehttha , thlun thei ka zuam papa…
Cung vanram in na lunghmui ve ko sawh..’Happy father’s day’ papa…

********************************