Ka duhdawt zetmi le ka suahsemnak Falam;
Duhdawtnak mitthli le seherhnak thawn ca ka lo kuat. Chin thuanthu tampi rak thawhkehnak Falam na si. Chin paralṭha, nu ṭhaṭhum tampi rak suahkehnak Falam na si. Leitlun huapih mifim cathiam, mi cungcuang tampi rak hringsuaktu Falam na si. Cu pawl cu thuanthu ah lawng kan tan siang ding maw si?
Kan ramah tuṭum ah nasa zetin buainak a suak! Laitlang (Chin State) peng tinkim ih cangvaih dan zoh tikah Falam, na hmual neihnak, na ral ṭhatnak le na thuanthu mawinak pawl hmuh ding a mal tuk ee.
Ralkap uknak a cem tengteng ding. A rei tuk nawnlo ding. Cumi cingin, diklo zetih thu neihnak laktu, ralkap lam ah maw na ṭang hrih ding? Na fa le tu le pawl CDM ih nunnak thap, mai pumcawmnak thapih hmainor pawl ṭan thlang aw, thazang pe aw, bawm aw, dinpi ve thiam aw!
Aw Falam, caanṭha na neih laiah, ṭan la thiam ve aw. Ralkap san laiih, mipi mitthli, nunnak liammi, thihnai suakmi, nun harsat zia pawl na hngilh maw si? Cumi san ih kir lala ding na ha hio ciamco sal maw si? Ralkap thu neihnak cimit dingin, ṭih cing khalin CDM thawn hmai nor hrutro hram aw Falam! Democracy timi cu mipi kutah a um. Mipi ihsin hrinsuah dingmi a si!
Pupa pawl rak ngan zo mi, thuanthu mawi pawl pehzom dingin ṭuanvo tumpi na nei. Na san ah, kan san ah, pupa hnakih thuanthu mawi le ṭha kan tesin fa ih sim le cin ringring dingmi ngan sawn uh si. Thil ol zet cu a silo. Sinan thil harsa tuk khal a silo.
Kan zaten lungrual ten kan pahtlang theimi a si. Dung sip hlah Falam, hmai nor aw Falam, na fa le pawl dinpi ngam aw Falam. Hi pawl tal na tuah ngam lo ahcun Falam na sinak na kilhim theilo tinak a si.
Na fahniang,
(’88 ih nunnak thapih ram hrang ra pe aw vetu-Generation X)
No comments:
Post a Comment