Wednesday, March 18, 2020

ZUMTU & COVID-19



A liamciami thla 3 ihsin a karhzaimi Novel Coronavirus lole COVID-19 tiih theihmi naatnak ruangah tusun tiangah ram 155 ah nasa zetin naatnak le thihnak a thleng.

Hivek caan ah rampi thuneitu pawlin, mibur ih um lo ding in le a luar deuhnak ram pawl tla cu zarh 2, 3 sung zohman lengsuak lo dingin thusuah a si. Hivek caan laifang ah zumtu hrekkhat in “Pathian zum kan sisi, ziang hman ṭih ding umlo, khawm kel in khawm uh si. Thil kan tuah kel in tuah uh si’ tivekih titu tete an um phahphah.

Bible ih fiang zetin in simmi pakhat cu, thuneitu le ram uktu pawl ih thungai ding hi a si. Rom 13:1 “Ram uktu bawi pawl kha an thu ngai uh; ziangah tile Pathian ih lungkimnak loin zohman thuneitu an um thei lo; cule atuih thuneitu pawl hi Pathian ih retmi an si.” tin fiangzetin in sim.

Zumtu kan si khalah, minung lamih tuah ding le thlun dingmi kan nei. Herod siangpahrang in nauhak kum 2 hnuailam that ṭheh ding a ti lai khalah, Mary le Joseph kha, um men uh, ka lo humhim ding a ti riai lo. Matthai 2: 13…“Hi naute hi Herod in thah dingah a hawl ding. Curuangah tho awla naute le a nu thawn Izipt ramah tlan uh. Kir sal ding i ka lo sim hlan lo cutawkah nan um pei,” tiah a ti.

Curuangah abikin zumtu nu le pa, u le nau zaten, tuṭum khalah, acozah ṭuanvo neitu ih thlun ding a timi pawl cu kan thlun ṭheh ding hrimhrim a si. Himi ruangah kan zumnak a derthawng a si hrimhrim lo ti kha kan theithiam awk a ṭha.

Himi a rak suaknak Tuluk ram khal, himi naatnak an control thei vivo nak cu, mipi in, thungai in lenglam suaklo ten an um ruangah a si. Thlun ding timi kan thlun lole ,kan mah ruang sawnah, kan Church, kan community le khua le ramah naatnak a karhzai tirtu kan si ding ti thei aw cio in thungai nun nei uh si.

Pathian hnenah mah le um hmun cio ah thlaza cam phah in, ṭan la cio uh si law!

Monday, March 16, 2020

I WEPT...



In 1992 when a coup took place in Chin revolution group,
I cried bitterly!

In 1997 when I had to leave my newly wed wife to come to USA
I wept till my eyes swelled!

In 2013 when I came back home to Falam, after 25 years,
I cried so hard in the dark!

Today when our church only could have online service due to coronavirus,
Secretly I wept & wept!

Lord please collect all my tears and,
Let them become blessings!

KA ṬAP


1992 Chin dotlennak, sinak cuhawknak a thlen ni,
Hnap dawp
ṭheh ko, ka ṭap, ka nguk!

1997 USA rat zik lai, nupi tan hrih ṭul,
Mit phing
ṭheh ko, ka ṭap!

2013, kum 25 hnu Falam, ka pai’ innpi ka thlen zan,
A thup ten, thim lakah ka
ṭap!

Tuzing Coronavirus ruangih, mipi khawm theilo ni,
A thup ten, ka
ṭap, ka mitthli a tlak!

Bawipa ka mitthli tlakmi in khawl sakin,
Thlawsuah sawn ah run caan tir hram!
-------------------------------------------------------------

Friday, March 6, 2020

Falam



Tlangpar khua lakih mawibik
Iang neibik Falam
Khaw thianghlimbik Falam
Lungthin thiangbik Falam

Zo khalih nuambik tinak Falam
Khual duhdawtthiam Falam
Mi thleidan neilo Falam
Lungleng tirtu Falam

Chinmi thuanthu nei ṭhabik
Na mawinak, na nemnak le na ṭhatnak hmuah
Mi ih hmuhsuamnak sawn siloin
Thlawsuah phurtu le pabik lungput neitu si vivo hram
Aw Falam…….

Thursday, February 20, 2020

Ra Tlung Ko Aw



Rambuai ruangah, in tansan
Na tlan ṭul, ka theithiam..
Fimthiamnak zirsang dingah, in fehsan
Na zir ṭul, ka theithiam..
Ṭuanṭul ruangah, in liamsan
Pumpi khapkhat hrang tiah, ka theithiam..
Ramṭha hawl dingah, ram retheimi na suahsan
Minung dan tiah, ka theithiam..

Ram duhdawtih, na tlanhlonak ihsin,
Fimthiamnak, na zir ṭheh hnu ah,
Ṭuanṭulmi, miram ih na ṭuan hnu talah
Ramṭha na hawlnak hmun ihsin,
Ra tlung ko aw!

Luruh phumnak hmun fangah,
Si sawnloin, na cah lai le
Na ṭuan thei lai, na fim lai ah
Na tantami Lai/Zo/Chinram, Chin miphun
Tuahṭhat le tungding sal dingin
Ra tlung ko aw!

Thursday, January 23, 2020

PULPIT-101



1. Pulpit ihsin mi hmin salin an ṭhatlonak simlo ding.
2. Luar tuk in zahmawh lam thu capo tuah lo ding.
3. Pastor, Kawhhran upa le Kawhhran parih lungawi lonak sim lo ding.
4. Hrinhnam le peng soisel zawngin thu sim lo ding.
5. Biaknak dang soisel zawngin thu sim lo ding.
6. Thu theibik vekin thu sim lo ding.
7. Mah le mah famkimbik vekin thu sim lo ding.
8. Hnar kua sung tham phah lo ding.
9. Mi va salhsuahnak ah hmanlo ding.
10. Mi nautat, hmuhsuam zawngin thu sim lo ding.

Hi pawl hi, a bikin Chin mi ih kan ralring  ṭul zetmi an si. Hivek thu pawl pulpit par ihsin theih a sile a simtu le a ngaitu hrangah ṭhathnemnak zianghman a um lo. Zate hrangih Pathian thu in thazang ngah nak ding sawn kha pulpit par in sim awk ding kan si!

Tuesday, January 14, 2020


Aww..Falam, ka suahsemnak khawmawi!
Vukvuk ti rori in, cawp le cilhah na ṭhanso lonan;
Nuam teten ṭhanso lam na pan rero..

Aww..Falam, saduhthat in lo tuahsak theimi
Nei thei hrihlo hmanningla,
Ka thinlung takin ka lo seherh tuk!

Aww..Falam, Surbung airport lamah,
Ninu eng a suak rero thlang,
Thuanthu cahmaithar, na ngan thok lala….

Aww..Falam, Chin ram thuanthu ah,
Thil thupi tuahnak hmaisabik na si ringring..
Tukhalah, Chinram ih airport hmaisabik umnak na si tlang ding..

Aww..Falam thuanthuṭha nei ringring na si,
Thuanthuṭha kilhimtu si vivo hram..
Aww..Falam ka lo duh kuahko…

Aww..Falam, Bawipa in lo khaisang sin seh
Aww..Falam, a itthatmi na tho zik thlang..
Aww..Falam ka lungawi, ka lung hno!