A rei zonan, a thar sal ṭheu

Kum upa zonan, lungthin a no sal ṭheu

A cang thei nawnlo nan, mitthlam ah a lang sal ṭheu

Kham theihlo in, ni le caan an liam..

Ziang ti ṭha……

Pu Ral Sai Lo

(In Loving Memory of Dad!)

 

(Ka pa hngilhlonak le upat peknak)

 

Ka pa cu Laica phunli ong lawng a sinan,

Fa le 8 lakah 6 degree ngah ko, cawm suaktu a si
Ka pa cu khawte fa a sinan,
Fa le pawl khawpi ih tlawngkai tir theitu a si

 

Ka pa cu awkaa hrang a sinan,
Fa le pawl duhdawt zettu a si
Ka pa cu a zirsang manlo nan,
Calai, miphun le ram duhdawt zettu a si

 

Ka pa cu micungcuang a si ciamco lonan,
Khua le ram ih, thurontlak upa pakhat a si
Ka pa cu mifamkim a si ce lonan,
Rinsantlak ih Pathian riantu a rak si

 Fa le hrangah cun, mifimbik,

Cungcuangbik le zohṭhimtlakbik na si..
Ka pa ka lungawi tuk ka ti duh nan,
Mual in liamsan man…….

 

 

1987 December thlatang

Vankau tlang pial ih..

Duhthu kan saam lai

Phunsang tlawng kai dingih

Feh zik zaan…

 

Na biangno ih, a luangmi

Mitthli for, hlum-var te thawn

Biathu kan rak tiam-mi..

Na hngilh hmanah..

Lung muril ah, ka hrang a hmun camcin…



Ka fim

Ka ta
Ka thei
Ka thiam
Ka thuthu….
Sinan, Jesuh neih hnu cun,
A fim
A ta
A thei
A thiam
Amai thuthu ti, a rak si sawn….

Sangkate (The Window)

Ka sangkate in ka hmumi

Midang sangkate thawn a dang

Sangkate ciocio, an bangaw lo

Mi sangkate ih hmuthiam vetu si ningla

Nang le kei ti a umlo ding nan….

Lunglen.......



Rinlo pi’n, mitthlam ah a lang sal ṭheu..

Hlanlai kan tlanleng nak,

Ko kir theih an si si lo..

Thinlung ah, sim theihlomi lunglen nak thawn….

 

Falam Fur, saphawhlum lek caan…

Hrang Ṭhio Bualrawn ih,

Nithawng fate zawn awkin,

Duhthu kan sam lai ka ngai, ka ngai….

Happy Mother's Day May 10, 2015

Happy Mother’s Day -May 10, 2015

Nu…Leitlunih a thlumbikmi “Hmin”

Nu…Tahṭhim ruallo, duhdawtnak neitu

Nu…Nangmah lawng leitlun ah na um..Ka hrangah!

Mom…The Sweetest name in the world

Mom…Who possesses the incomparable Love

Mom…You are the only one who has these…For me!