Sunday, March 1, 2015

Ton Sal Ni


Ka tum ṭheu, hngilh thei dingin…
Kan lennak sulhnu, Vankau tlangtluang
Kum 25 hnu, thlengsal tikah..
Sulhnu pawlin, an lo hlam ee…

Sianglo cingin, ka fehliam zaan
Sup theilomi na mitthlifim, Lungthin a luah…
Kham theihlomi tikcu le caan, herliam hman seh
Na hrang, duhdawtnak a hmun camcin!

Kum upa in, tleirawl nawnlo hmanning,
 Duhthusam peh sal ding ni, hngakhlap zetin..
Ton awk sal caan, thlen taktak ni,

 Ziang tinkim, a tlai ṭheh zo…

Semnak Khua & Ram


Semnak khua le ram, hlum kuahko duh hmanning la
Din hmun ruangah, hlum thei hrih lawn..
Semnak khua le ram hrang, sunmang nei hmanning la
Sinak le dinhmun, harsat ruangah…

Semnak khua le ram, fingtlang tluang tla
Mitthlam ihsin kaam ni um lawn, a sun zan in…
Semnak khua le ram, ngai in lungzur caan,
Ngairiam nakah cafung lawngin, thai ko hrih ning..

Semnak khua le ram te, nuambik cuang ee
Vairang ram khal, ziang si ce hlah,
Semnak khua le ram ih, zilthli nem te..
Hlam caan a tam, khua le ram ngai in ṭap hrih ko ning..

Semnak khua le ram, rual le pi hnen..
Kirsal ding ni, nithla siar in hngak hrih ko ning….
Semnak khua le ram ah, vanzuang va bang,
Zam thiam ningla, zam tak ding maw ti in………..


Friday, February 20, 2015

Chin Phunpi Ni...


Pupa rolung, Rak phun tami
Chin Phunpi Ni, Sunglawi hlei ee...
Santhar nonawn, Cingken dingah
Lo hlawm keng khaw...


Kan pupa tla, Mai duhnak hmuah
Dung ah, Tan tahrat in
Mipi duhnak, “Democracy” ti in
Lungrualnak lungphun, An phun ni...

1948 -Vau thla ni 19 in, ni 22 tiang,
Chin ram khawpi, Falam khua ah
Chin Phunpi Ni, A rak semsuak
Sunlawih uhsi, Chin Phunpi Ni February ni 20…

Tuesday, February 17, 2015

Laimi & Necktie



Ziangsi ti khal, rak thei dah hlang
Necktie, an ti..
Ramthumnak thleng hnu
Awrh a ṭul, hman a ṭul caan…

Caan tampi, ṭhatnak le
Ruahnak, ṭhaṭha a pe ṭheu
Caan tampi, mah le mah
Sinak hnak in, sang sawnah a ruat tir….

Necktie, tie thiam lo khal
Ṭulnak le, dinhmun ih zirin
Tie a ṭul caan..
Necktie maw, milai thupi?

Necktie in, kan sinak
Kan din hmun, lenglam in
A lang tir, an ti maw?
Pom le theihthiam a har…

Kei cun, necktie silo
Lenglam ih, hmuh theihlo mi
Awm tangih, a um mi
Nem ziarzi thinlung sawn a si tiin…….


______@@@@_______

Friday, February 13, 2015

Laimi...


Kan thleng, kan tum ram,

Kan hngilh kan nunphung

Kan sar nunphung thar


Kan hngilh, kan sinak

Kan hloh, Lainun mawi

Kan zir, ziaza dang


Kan hawl, sum le pai

Kan biak, lei thilri

Kan hngilh, kan Pathian


Kan pum, kan khawm

Kan kaa le lenglam lawng

Kan kawhhran, kan miphun ti in…..

Wednesday, December 31, 2014

“Love Song” hlasak a sual maw?


 
 
Himi thuthla thawn pehparin, email le online ziangmawzat ah ruahnak ngan celcel a rak si zo. Ka hmuh dan malte ka ngan duh ve. A dik, diklo ti si sawnlo in, ka hmuh dan nganmi a si. Mizan (December 30, 2014) ah ka fa le rual le nau le pawl in “Awnmawi Zan” timi hla thawn, mi awihnak an neinak ah, thutawi sim dingin in sawmih, himi thu malte ka sim.

Laimi ih “love song’ kan timi hi, ziangmibik a si tih kan theih hmaisa a thupi zet. Fala tlangval ngaiawnak hla, nupa ngaiawnak, duhawnak hla le ramhla pawl kha “love song” kan timi a si ahcun, keicun, zianghman a sualnak a umlo tin ka ruat. Cuvek duhdawtnak nei dingin, Bible in, in zirhmi a si sawn. Cubakah, hivek hla tampi kan neih thei sinsin theinak dingin, thazang pe aw sawn ding kan si tin ka hmu. Laimi lawng siloin, zumtu pawl hrangih, a sual le hrial dingmi sawn cu, Mirang hla ih sakmi, Rap, Hip-Hop le hla cafang ih, zahmawh le ṭong mawilo, fihnungza a telmi pawl sawn a si. Mirang hla tampi cu kum 18 hnuailam ngai ṭhalomi an um. Cuvek pawl cu CD parah ralringnak “parental discretion advised” tin an ngan ṭheu. Ṭhimnak ah Marilin Manson, AC/DC, Korn Music Band tvp.

 
Hivek hla pawl cu, ka theih ban tawkah, Laimi nih cu kan nei hrihlo. Cubakah, Rap hla le Hip-Hop hla tam sawn cu lungawilonak cafang, thinhengnak, zahmawh lam, le ngiar awnak tivek pawl an si ih, cuvek hla pawl cu zumtu cun, kan hrial hrimhrim ding a si tin ka hmu. USA ahcun, midum hrekkhat hivek hlasak ih milar pawl hla in an ngiar aw nakah tualthah nak tiang a thleng ṭheu. Culawng siloin, mipi hmaiih, hlasak tikih, zahmawh langzik leuleu ih mipi awitu Miley Cyrus, Lady Gaga tvp vekin umlo ding kha zumtu hrangah cun, a thupi zet.

 
Pathian hla lawng ka sak ding tiih, pumpe aw pawl cu, upat tlak an si ih, an pekawnak a ropi lawlaw. Bible ih bungcang tambik cu Sam (Psalms) cabu a siih, hla a si ruangah a si ding tin ka ruat. Awnmawi le hla a thupit zia Bible ah a lang. Hla dang kan sak le khal, cafang mawilomi le ngaihnuamlomi a umlo ahcun, mipi in thazang pek kan thiam a ṭul sawn. Culocun, kan Chin awnmawi rei daihlo lawng siloin, ṭhangso theiloin a thi pang ding. Pathian hmin sunlawinak le Amah Pathian ih in tuahmi, milai pawl hrangah Chin awnmawi ṭhangso sinsin hram seh! Mirang in “Awnmawi in sahrang a nem/dai tir” an ti (Music soothes the savage beast). Sahrang a silomi milai cu awnmawi in, in awi nerno hram seh law!

Moral Timi Nuncan Ziaza?


Mi tampi ih theicio vekin, USA le leitlun ih hminthang, milar Bill Cosby, Arnold Schwarzenegger, John Edwards le Bill Clinton pawl cu mai nupi silomi nunau thawn nupa sinak hman ruangah, tar lamah hminsiatnak le thinhar, beidongnak ziangmaw zat an tong. Mi tampi an um nan, himi pali lak ihsin, ziang kan zir ding a um timi kan zoh cio pei.

1)      Bill Cosby: USA ih “sitcom” ihsin milar, milian, hnihsuahsaithiam, cangtupa, canganthiam, producer leh activist mi rinsan mi a si. Sinan, tubai teah, a liamciami kum 30 lenglo ih, nunau a sualpimi (rape) 6,7 lai in an phuarhsuak ciamco ih, Show a neihlai mi, ziangmawzat a cancel ttheh, Temple University ih Board member a sinak ihsin a suak, a cipi midum pawl nun sim ringringtu, pa vekih an zohmi “American Dad” tih tiangih an kohmipa cu tu dinhmun ah mualpho mangbangin a um. Sualpi a puhtu pawl ih simmi pawl cu a dik ttheh le tthehlo theih a si lonan, thuphan hlir cu a silo ti a fiangzo.

2)      John Edwards: 2004 leh 2008 ih USA, Democrat Party ihsin Vice President cuh vetu, North Carolina ih, USA Senator, mi tawkzet pakhat a si. Asinan, a nih khal a campaign nakih mi zuktunu thawn, nupa sinak hmangin fasawn a neihtir ruangah hminsiatnak le case “six felony charges” lai 2011 ah, nei in a hmintthatnak le a sinak pawl a hloral ta bakah, a nupi thawn an tthen aw.

3)      Bill Clinton: USA ih a vei 42 nak President Term hnih rak ttuantu, Arkansas ih Governor a rak si. A nih khal fala White House ih “internship” ttuan rero lai, Monica Lewinsky, kum 22 thawn nupa sinak hmang ruangah, mualphonak nasa zet a inn sungsang le a hnattuannak ah a thleng. Leitlun mipi theihin a mualpho. Nunau dangdang khalin in sualpi an ti.

4)      Arnold Schwarzenegger: Leitlun Film lamih milar maktara a si. Austria ram ihsin a kum 21 ah USA ah daan loin (illegal) ra vaimi a si. A kum 15 ihsin ritcawi (weight-lifting) a lek thawkih kum 20 a si ah, Mr. Universe timi laksawng ngahtu a si. A lar zarah le Kennedy ih tunu, Maria Shriver nupi a neih ruangah, Oct 2003 ah California Governor a ngah thei ih 2011 tiang a ttuan. Sinan, an inn ih hnattuan, kum 50 mi, Guatemala rami, Patricia Baena thawn fasawn a nei rungah, an innsang ah tthen awnak le a hnattuanah harsatnak tampi a thleng. Nunau dangdang khalin in sualpi tin an puh.

Hi pawl nun kan zoh tikah, an rak thoknak cu, a mawizet ttheunan, a cem zawngah a tthalo ttheu. A thok in a cem tiang mawizet le tthazet ih nun ding hi, a bikin zumtu pawlih kan ttuanvo tumpi pakhat a si.  Pathian rawngbawltu cu sim ttullo in, ram hruaitu le mipi rinsanmi si ahcun, sup-aw thei nun hi, mi pangai menmen hnakin a thupibik cuang. Na thuanthu ziang tin na ngan ve? (Lole) mi in ziangtin na thuanthu an ngan ve ding?