Kum Laifang Harsatnak (Midlife Crisis) By: Piangte



No lai caan, duhmi hrangah

Van par arsi, la thla ngam le,

Tipi thuanthum ih, rulhreng that ngam in,

Duhmi hrangah, paralṭha bik…

Kum a hung ṭhang, miphun hrangah

Nunnak thap in, zalennak hrang

Hehchet tiah, rampi linglet ko

Thleng danglam tum in….

Kum 25 hnu, fimthiamnak ah,

Sangbik thleng ngam in,

Leilung tlun ih, fimbik vek le,

Ziangkim thei ṭheh vek bang….

Kum 30 luan cun, biaknak lamah,

Teimak suah in, ṭan lak a cu..

Rianmi taktak Pathian maw milai

Thleidang thiam lo in…
 

40 lam cun, dunglam thlirin…

A liammi caan ih,

Sambau nak hmuah zirnak hmangin,

Hmailam caan hrang, ṭan lak dingin, …

50 kim hnu, vun ti dingah,

Kim hrih silo, Pathian zarih,

Kim leh tikah, Ziang bang kei maw?

Tin ruat rero in…………………

 

 

FALAM (By: Piangte)

Mifim, mithiam, miralṭha suahkehnak Falam,

Hlanlai Laitlang khawlipi Falam

Mikhual, khualtlawng nuam tinak Falam

Zato (Siizung) le tlawng ṭhabik rak um dahnak Falam…

Lengdawh, valṭha tla, nuam tinak Falam

Vairang, kawl mimang pawl, nuam tinak hmun Falam

Lehpan nak ih hminthang Falam

Awnmawi khawvel khalih duailo Falam….

Thlarau lam ih lamzin sialtu Falam

A net nakah, kawhhran siarcawk lo a pung a zai

Lungput fate sin le hnam tenau bang,

Ka ta, ka kawhhran, ka hnam ti celcel in..…

Falam na rak si dahnak pawl an mawi tuk nan,

Santhar san ah, cumi, khami tih ding a ziam cuahco

Tih ding, hmuh ding um sun khal le,

Cawisang hnakin, relsiat a tam….

Falam, felnak, mawinak le ṭhatnak hmuah,

A tu ah cun, khawrawp tin “title” na co

Khawrawp sawh cu tuah ṭhat a theih

Kan thinlung rawp tuahṭhat ding ni ka hngakhlap ee..

Salai Sun Ceu (By: Piangte)

Salai Sun Ceu a thihnak kum 10 kimnak April 7, 2014 hrangih a mah sunloih nak hrang ngan mi a si

Locom khawsuak, Salai Sun Ceu

Laitlang, Lairawn mit vang tirtu

Na suahsemnak “te” hmang ningla,

Na zaihla mawi, vandeng a thleng

Falam peng suak, Salai Sun Ceu

Na zaihla mawi, san-hmai a tlang

Zaran hmuhbanlo, na rak hmu cia,

Na zaihla mawi, sunglawi hlei ee..

Laitlang (Chin ram) ih suak, Salai Sun Ceu

Na hmuhton mi, na covo,

Na co dingzat, co thiamlo in,

Na phunpi pawl, mitcaw/hnaset bang....

Burma ram suak, Salai Sun Ceu

Sunloih ding zat, na sunglawi hlan

Sianglo cingin, pialral thleng hmangning,

Na zaihla mawi, tawp ni a nei lo ding...

Chin awnmawi-khawvel, hnin tir theitu Salai Sun Ceu

Na zaihla thawn, na cii tuhmi

Santhar/nonawn pawl khalin an tep thiam zo...

Na seherhmi, Laitlang/ Lairawn khal a mawi sinsin cing ding...

Laihlum Tu???

 

Ciinmual tlang, Salai Sun Ceu khaan in..

Falam ka lut...
In rak hmuaktu, tawn hmaisabik,
Zo so si ding?

Tar hnianghni le, hnipuan bal thawn..
Falam tan siangloin, rinumnak thawn ..
Laihlum tu, zo so si ding?
Pa Sia pan teh....

 

Ka feh betsal, Pa Sia rualṭha..
Ṭhal Tin Zul khal, vunsawng  hnianghnin,
Haabal lang ko, hni siamsi ten..
Falam fapa, in rak hmuak ee..

 

Ka lan vivo, Lansung lamah,
Rinlo takin, Pangpar tawnin,
Pan Pan khalin, mithmai panten,
In rak hmuak ve..

Ṭhangthar nonawn, rinum takih,
Falam hlumtu..Lungthin sungin...
Ka hawl ka hlam..
Hmuh ding an har...

 

Simzaan a thleng, Town Hall lamah,
Thawmvang a thang, hei cuan ning khaw..
Nonawn rual tla,
Zuri sabah, ka hmu ta riai...

Lungthin tein, kan nonawn tla..
Pa Sia, Ṭhal Tin Zul le Pan Pan..
Hnenah, ṭangkai zetih,  laihlum daan ding..
Zirthiam ningla, tiin saduh ka that pan lo maw.....

 

FALAM ZUUN

Kumpi 25 sung, na zuun tuar hnu..

Hun tlawng ing ee,
Iangnei suahsemnak Falam,
Hawipi khal ban hlah,
Lo ti hmanning….

 

Sianglo cingin, Hmuhsuam  na tuar…
Ka hrang ahcun, upat tlakbik,
Khaw mawibik na si..
Tlaksamnak um hmang ning,
Ṭan laknak ah hmang thiam in….

 

Khawrop an ti, a cuih ka thin
Ka sianglo ee, khawrop si ding..
Ka hrangah cun..
Ka lung luahkhat-tu sui khawpi bang..,
Na mawi bik in, na cuai theilo Falam..

 

Chin khaipabik, pai lungput nei….
Na hrinsuahmi, fa le pawl in
Leibaa sam ding simcawk lo thawn
Sam thei dingah, milai bangin..
Ṭongthiam ningla, in sim tak ding…..

 

Tlawn men lawng cu; diriam a har, zuun tuar a naa..
A siatmi le rem ṭulmi hmuah,
Tuahṭhat ding ah..
Nonawn, upa sawm khawm aw in,
Hringtu FALAM khua ah tlunzai rel caan a cu……

Face Book Hman Dan 101

 

FB hman hi kum 13 tlunlam lawng dan vek a si le hman theih a si. Asinan, tusan cu kum 7,8 ih nei tla an tam piih, zohpi le theihpi an ttul ngaingai. FB ih ttongkam hmang thiamlo le elaw nak ruangah le umnak address ngan ruangah Indianapolis, USA khua ih Laimi innsang pakhat ah tualthah nak (thihnak) a thleng zik leuleu. Misual ra lutin, meithal in an kap ciamco. Pathian zarah minung an kapthah ngahlo. Curuangah kan zaten hivek cang nawnlo nak dingah FB hman tikih theih ttul mi le fimkhur ttulmi ka rak tarlang.

 

1) Mah theih ngaingailo mi friend request tuah lo ding, mah nih khal accept lo ding.
2) FB ah ttongsia hmanglo ding
3) Mah umnak, address ngan hrimhrim lo ding
4) Hnattuannak, tivek khal nganlo ding
5) Inn ah zo a um/umlo tivek detail thuhla nganlo ding
6) Mi na chat tikah, na thei ngaingai mi an si maw ti check ta aw.
7) ID lem ih FB hmang an tamtuk tih theih ringring ding.
8) Kan fa le kum kim lo tete a hmang an tam tikah, FB ah ziang an tuah ti nu le pa le kilkhawitu in theih tum ding.
9) FB hi hmanthiam ah cu information tthazet ngah nak le rualpi hlun pawl tawnaw nak a si nan. Hman thiamlo ah cu, ral ttihnung ngaingai a si ti theih ding.
10) Na umnak lo zingzoi thei ding khawpin information pe dah hlah.

Aw Chinram....

Aw Chinram, na hrang tiin

Zalennak dawi in

Miphun hrangah

Nunnak tapin….

 

Aw Chinram, na hrang tiin

Bulpak seherhmi hmuah

Tanta in le dung hawisan in

Tlin tawk tein…

 

Aw Chinram, na hrang tiin

Thisen, thlanhri put in

Rak ṭuan hmanning

Rah ṭha um lawn..

 

Aw Chinram, na hrang tiin

Neihmi sunmang

Hlawhtlin hlanah

Siatbal sakin…

 

Aw Chinram, na hrang ahcun

Liamzo mi hmuah, a ṭul ahcun

Haacang rial in

Hngilh tum ko ning…

 

Aw Chinram, na hrang ahcun

Thinnatnak hmuah

Kumhlun ah tannin

Kumthar ah,

Sunmang thar thawn

Hmailam cuanin ke kar sawn ning…