အားပေးချင်ပါတယ်

စစ်အစိုးရစံနစ်ဆိုးကြီးကို အမြစ်ကနေဖြုတ်ပစ်ဖို့ တော်လှန်ရေးလုပ်ကြရာဝယ် အခက်အခဲမျိုးစုံကြုံလိမ့်မည်။ ကြုံနေဆဲလည်းဖြစ်သည်။ သို့သော်အားတင်းထားကြစို့။ ပန်းတိုင်ရောက်လုနီးပြီ။

တောထဲတောင်ထဲ စစ်သင်တန်း တက်နေကြတဲ့ G-Zလေးတွေ အားတင်းထားကြ။ ကျနော်သိတယ်၊ G-Z အများစုက အလုပ်ကြမ်းမလုပ်ဖူးတဲ့သူတွေ၊ အများအားဖြင့် ‌ဘောလ်ပင်လေးနှင့်စာအုပ်သာ ကိုင်ပြီး ‌နေလာကြတဲ့သူတွေပါ။ မင်းတို့ရဲ့တိုင်းပြည်နှင့်လူမျိုးအတွက်ပေးဆပ်မှုဟာ အလွန်မွန်မြတ်လှတဲ့ပေးဆပ်ခြင်းပါ။

မင်းတို့လိုဘဲလွန်ခဲ့တဲ့ နှစ်၃၀ကျော် ၁၉၈၈တုန်းက မင်းတို့ရဲ့အဖေအမေအရွယ် G-Xတွေကလည်း ‌အသက်နှင့်ရင်းပြီးပေးဆပ်ခဲ့ကြတယ်။

အိမ်မှာဆိုရင် တူတောင်မကိုင်ဖူးတဲ့လက်ကနေ သေနတ်ကိုင်ခဲ့ကြတယ်။ တောထဲမှာ မိုးရာသီဆိုရင် ခြင်၊ဖြုတ်၊မျှော့တွေရဲ့သွေးစုတ်မှုရည်ရည်လည်လည်ခံခဲ့ရတယ်။ နာဂနယ်မြေမှာတနှစ်နီးပါး စားစရာမရှိ၊ အစာငတ်လို့ ဌက်ပျော်ပင်တွေဘဲစားလိုက်ကြတာ၊ မစင်တောင် ဝက်မစင်နှင့်ပင်သွားတူတော့သည်။ ဝက်များသည် လူ့မစင်ကိုစားလေ့ရှိသော်လည်း ကျနော်တို့၏မစင်သည် ဝက်မစင်နှင့်သွားတူနေတော့ ဝက်တွေပင်မစားချင်ကြပါ။

ကျနော်တို့အသားအရေသည်လည်း မြွေအရေခွန်နှင့်ပင်သွားတူတော့သည်။ ဌက်ဖျား၊ ထုန်ရောဂါ၊ ယားနာ မျိုးစုံနှင့်လည်း နပန်းလုံးရတာလည်းအမော။ သို့သော် အဲလိုချိန်မျိုးမှာ စိတ်ထဲပေါ်လာသည်က ဒါတွေအားလုံးသည် တိုင်းပြည်နှင့်လူမျိုးအတွက် ပေးဆပ်ခြင်းဖြစ်သည်ဆိုတဲ့ အသိတရားလေးဝင်လာတာနှင့် ပိတိဖြာကာခံနိုင်ရည်ရှိခဲ့သည်။

ထိုနည်းတူဒီနေ့ တွင် ပေးဆပ်မှုပေါင်းစုံ၊ နည်းလမ်းအမျိုးမျိုးနှင့်တိုက်ပွဲဝင်နေကြသောသူများ၊ အသက်စွန့်တိုက်ပွဲဝင်ကြသောသူရဲကောင်းများ၊ CDM သူရဲကောင်းများ၊ ထောင်ထဲရောက်နေသောမျိုးချစ်ခေါင်းဆောင်များ၊ တောခိုလက်နက်ကိုင်သော တော်လှန်ရေးသမားအားလုံးအား အားပေးချင်ပါသည်။ မင်းတို့အားလုံးရဲ့အနစ်နာခံခြင်း၊ ပေးဆပ်ခြင်းများကြောင့်ဒို့ပြည်ကြီးလည်းစစ်အာဏာရှင်စံနစ်ဆိုးအုပ်ချုပ်မှုလက်အောက်မှလွတ်မြောက်တော့မှာပါ။

အရေးတော်ပုံအောင်ရမည်မှာ မုချဧကန်မလွဲပါ။

တိုက်ပွဲဝင်ရဲဘော်အားလုံးကိုလေးစားလျှက်။