Thik Nei Vemi Pathian

Tulai boruak kan zoh rero asile Bible lamin ka hmuh dan mal lai ngan ka duh. Ka ngan mi hi a dik ṭheh tinak siloin, view point pakhat ih ka nganmi a si ti hmaisabik ah ka sim duh.

Pathian hi Bible ih kan hmu vekin, mi thik nei Pathian a si. Lehpannak lam (Sports) leitlun huapin kan zoh asile tennis, soccer, football, basketball tvp..mipi in a takin maw lole TV ih kan zoh tikih, kan ṭanmi team ih an neh tikah, kan lungaawi dan, mipi authawm a than zia le tha pek dan pawl thlir tikah mak ka ti zet. Stadium tumpipi, mipi thawng 60, 80 lai tlemmi sungih mipi ih authawm le thapek vekin, Pathian thu kan ngai tikah lole khawmnak neih tik tivekah lungawi le zabeng in Pathian thangṭhat thei sehla, a va mak ding ve timi ruahnak a suak.

Thinkthu nei Pathian ka si a tiawtu Pa in in thik a si taktak ahcun, amawh hrimhrim lo. Culawng siloin, hlasak thiam le zuknung lemcang men rorimi, in bum rero ti thei na cingin, kan uar emem, kan sun sak emem le sumpai tampi cem in kan zoh le an zuk tiang kan lei reromi pawl khal hi, Bawipa in in thik a si ahcun, a mawh hrimhrim lo. Kan uar hai hmanah, Pathian kha number pakhat nakah si ringring seh.

Ziangah tile, sumpai cem ciamco ṭul loin, Amah kan thangṭhat thei bakah, thih hnu khalah kumkhaw nunnak tiang in petu Pathian rori, zarhkhat veikhat maw, vei hnih maw te tal thatho zetin thangṭhat ding hrimhrim kan si lawng siloin, thangṭhat tlak tuk lawmlammi Pathian um sun a si. COVID-19 ruangah leitlun lehpannak, zuknung le mibur ih tuahmi pohpoh cu ziang tik tiang colh a si ding theih a si hrih lo.

US President ih Coronavirus donak team ih tel vemi mifim, rinsan um zet, Dr. Anthony Fauci sim dan vek asile hmai kum ṭhal tal ahcun lehpannak pawl lek thei sal a si men thei tin a sim. Ziang a va si khal le, tuṭum naatnak hi Pathian in in khaikiang sak cing hram dingih, leitlun a mah kel ten a um thei sal caan a thlen tikah, reidaih lomi le a siatral ṭheh leh dingmi pawl ih kan tikcu, thazang, thinlung, sumpai kan sen mi pawl kha Pathian hrangah a letin hmang thiamtu si kan zuam cio pei.

Bawipa in in thik ngaingai ahcun, a mawh hrimhrim lo. Pathian ih thikmi siloin, Pathian ih duh zawng tuah theitu le Pathian number pakhat nak ih ret theitu si zuam cio uh si.