Ram 3 Nakih Khawmpi Kan Tuah Dan Thlirsalnak

Laimi pawl hi, khawmpi uar zet le hmang hlunghlai ti zettu kan si. Laitlang lam le Kawlram lamih kan rak hman ṭheu tikah, a tlangpiin, mikhual pawl rawl dar a si tlangpi. Cucu keimah theih ban tawk le hmuh ban tawkah a san pathum a um…

1)    Hmunkhat ih miburpi ih rawlei khawmih thunuam relkhawm phah hi nuam kan ti.

2)    Laimi cu rethei tete kan tam tikah, khawm zoh phahih sa ei hi man hla kan ti.

3)    Abikin Laimi pawl kan khuasak nakah, ei le in daar awklo cun, rawl va hlam le va ei ciamconak ding hmun le dawr tivek harsatnak a um.

Cucu Laitlang lam le Kawlram dinhmun ka hmuh le ka theih ban tawk a si. A dik ṭhehlo tla si men thei. San dan tla tampi um lai ko ding.

Pathian zangfahnak in ramthumnak North America, Europe le Australia tivek ah Laimi tampi kan thleng rero zo. Hivek ram ṭhanso zetnak khalah, Laimi kawhhran umnak ram ahcun khawmpi hi kum hnih veikhat, kumthum veikhat tivekin neih a si tlangpi. USA dinhmun ka theih ban tawkah, zovek kawhhran khal khawmpi neih tikah, nihnih/thum sung cu inntek in rawl dar a si.

Mipum tamtuk lo hrang ahcun, a poi ciamconak a umlo men thei. Sinan, Association tumpipi, mipum a thawng telih khawm zawhtu ummi hrang ahcun, phurrit zet pakhat a si. Cubakah, kawhhran fate deuh pawl tla cun, khual dar duh kohkoh hmanah, khawmpi dar theilo dinhmun ih um an tampi. Ka sim duhmi sawn cu, khawmpi kan tuah kha tutiang ahcun thilṭha si ko. Asinan, inntek ih rawl dar ṭheh timi hi, hmang nawnlo thiam vivo sehla, zapi hrangah a zangkhai zet ding ka zum.

Curuangah;

1)    Ram 3 nak ih um hrangah cun, khawmpi tuah caan ah professional zetin, ei le in dar aiah, convention hall ṭhaṭha san lawlawin, mikhual le inntek khal mah ten rawl tumaw cio men sehla. Duh le breakfast le tidai tivek fang lawng inntek in ṭuanvo la sehla, cutin ṭhangso lam kan pan vivo sawn pei maw ti hi ruat a cu zet zo.

2)    Culole sum burkhawmmi bangawin, convention tuahnak ah rawl telin order lawlaw sehla, inntek khal zianghman buai ṭulloin khawmpi ah tel thei ding.

Khawmpi neih tinten Lailam style ih rawl dar awk ringring hi, hilam ih suakmi le ṭhanglianmi cu sim hrihlo, kum rei deuh rak umzotu hrangah cun, duhthla a la nawnlo lawng siloin, san a man nawnlo. A ṭul tuk ciamcomi khal a si lemlo. Tusun ih, Biaknak lamih hruaitu pawl an upa vivoih, an cawlh cun, kan fa le san thleng hlanah, khawmpi tivek an tuah paih nawnlo ding a phan um riangri.

Culawng siloin, Christmas le kumthar le mipi sawmih tuahmi puai kan tuah tinten, sa talh fekfek, ti celcel in biakinn ah rawlsuang celcel tivek tete hi nuam teten kan cawl vivo a cu thlang maw ti hi ruah a cu zet zo. Hivek tete kan tuahmi in, tuhnu kum 20, 30 ih kan biakinn le kan community luahtu ding fa le pawl lamzin dangih an palnak ding sawn a silo ding kha thupi zet a si.