KHUIAH NA UM?

(By:Piangte)
Rangoon ihsin Kalemmyo ih zam mi vanzam leng par in Salai cun a lenglam a hei
cuan ih, mero zam pawl tla cu patpar tumpi pawl vek in a hei hmu. A can cu 1988
July thla, phunsang tlawng pit lai fang a si. A mitthlam ah cun “Mah Khai” thawn
mero zam par ah an tlangleng rero. Cuti cun Salai khuaruah nak pawl tla cu mero
zam lak ah an vaivuan theh ih a liamzo mi thlaruk ih “Mah Khai” timi Karen fala
mawi tak te thawn an tlanlen dann pawl cu a mitthlam ah an lang sal cuahco.



Regional College (2), Hlaing campus an ti theu mi ah cun Salai khal cu a ni khat
nak phunsang tlawng kai ding cun, thinphang phah le ngam lemlo in an tlawng khan
ah cun a va lut. A kum khat nak tlawngta hlir an si ih, rin lo pin rualpi tampi
a ni khat nak ah a nei cih. Cawlh caan a thleng ih, rualpi thar pa ngan lai
thawn Canteen ah cun laphah in ding in an feh ih an nuam aw zet. Pakhat le
pakhat theithiam aw nak an tuah ih, mino hlir tawngaw khawm ti cu, an nuam aw
nasa.



Tlawng in inn an tlung tik khal ah, Salai te veng ih um mi “Ule Kyi” Lakphah
dawr ah laphah an inn phah theu. Laphah dawr nei te cu Karen mi an si ih, an tha
zet, Tlangpar mi veve tiah maw si ding, Salai tla cu a hleice in an duh cuang.
Vawi khat cu rin lo pin fala mawi ngaingai nu in Salai te rual to nak ah cun
laphah a rak pek. Salai in mawi a tituk lawmlam ih ka ang in rei nawn a zoh hnu
ah a rualpa in theithiam aw nak a tuah sak hai. Cu mi fala nu hmin cu “Mah Khai”
a si ih, magazine tam nawn ah a zuk a cuang rero zo bak ah, kawl video ah khal
tel nak a nei phahphah reromi, mi hmelmawi ngaingai fala a si. Laphah dawr nei
tu “Ule Khi” ih naunu a si tin a rualpi pawl cun Salai cu an sim. A mawi dan cu
a mawituk ti lo cu sim dan ding a har.



Ni le tla cu thei lo kar ah an liam vivo. Salai khal cun “Mah Khai” cu a hngak
ih upa a si nan, a ngainak thu a sim ve. “Mah Khai” khal cun ka lo duh ko nan,
kan kum a tan aw tuk ih in duh ngaingai lo ding a ti. Salai cu nitin deuh thawn
an laphak dawr ah cun zaan an khar tiang a leng ringring. Laphah dawr an khar
hnu hmangah, an dawr leng lam in rei nawn hla an sak hnu lawngah Salai cu in a
tlung theu. A cancan cu “Mah Khai” in a to nak kiang (counter) ah Salai cu a to
tir ringring ih, sang ti vek mi hmuh lo teah an barh aw theu. Mi in in hmu ding
ti phang in sang an barh aw rero mi khal nuam an ti cuang abang. Cubakah Salai
cu milem zuk suai thiam zet mi a si ih, “Mah khai” cun a zuk suai ding tampi a
pe ve. A si nan, Salai cun a can awl le neih sun hmuahhmauh cu, “Mah khai” te
laphah dawrah “Mah khai” thawn caan a hmang liam ringring ih “Mah khai” zuk cu
suai tini a nei lo.



Khawsunglam ih caan nuam zet ih hmang ding in Salai cun a rawt theu nan, “Mah
khai” cun man tini a nei lo bak ah, “Salai nitin kan dawr ah kan um tlang thei
ringring ko hi” a ti theu. Salai tla cun a si ve ko a ti. Ziangah tile “Mah
Khai” in dawr kil hlah sehla cu, an dawr hi an khawng tuk lemlo ding. “Mah Khai”
hmel that le, a mah hmuh duh ruangah mitam pi cu hi tawk ah laphah an rak in nak
a si ve. Cu ti cun saduhthah ngaingai in can an hmang tlang thei dahlo. A si
nan, vawi khat vawi hnih cu, a inn dunglam ih zaute par ah reipi duh thu an sam
theu. Cu ti cun, an duhaw nak cu ni khat hnu ni khat a hnget vivo.



Ni khat cu Rin lo pin Salai cu Laitlang lam ah tlung a tul ih, tlung ding cun a
tim tuah aw rero. A tlung ding zann cu “KhaWei Chan” lam ih um u Pahniang te
hnenah a va riak zik ih bag pakhat thawn a pok suak. “Mah Khai” te dawr thleng
zawng ah taxi cu a cawl tir ta ih, “Mah Khai” biak ta ding in a tum. “Mah Khai”
a biak man hlan ah rualpi pawl in an be celcel ih, “Mah Khai”cun in tlun lam in
a rak zoh ve ringring. Rualpi pawl biak ding an cem in “Mah Khai” ka biak ding a
ti fang ah, a tlunlam a heicuan cu “Mah Khai” inn sung ah a lut ciah sangkaa ih
an tar mi puan le “Mah Khai” ih a dunglam sam sau zerzite lawng a hun hmu man.
A ko tum nan, a ko man nawn lo ih. Taxi driver pa nih na rei tuk feh a cu a ti
ruang ah Salai tla cu zamrang ten taxi par a kai sal.



Salai cu ruahngaih nak ding a thei nawn lo. “Mah Khai” a biak hmaisa bik lo
ruang ah a thinhen maw? Lole Salai thawn theu aw ding a ruat ngam lo ih inn sung
ah i lut san sawn maw si? ti thei thiam lo in a um. Salai ih a duhdawtbik mi
“Mah Khai” mangtha a ti ta man lo cu, Salai cu a lung a kuai bakah, tuar har a
ti nasa, a thinlung nat zia le a lungkuai natnak cu caafang ih ngan theih ding
ci a si lo. Cuticun, mithlidum nawn in vanzam lenglam cuangphah in a um laiah, a
rualpa Lincoln in “ai, ziangtin, na tap mawsi?” a tiih, Salai khal cun ti ngaih
nak theilo in hni suamsin a hei zoh sal mai. Cu fang ah vanzam leng cu Kalemyo
ah a tum zik fang a si ih Salai khal cu a thuruah a tawp. Cu mi kum in tuni
tiang Salai le “Mah Khai” cu an tawng aw nawn lo ih, tawng aw sal tik ah Salai
cun thu suh ding tam pi a thin lung ah a nei. Tuni tiang duhdawtzet mi “Mah khai”
khui ah na um tin Salai thinlung cun a hlam ringring theu lai. A cem hrih lo mi
an thuanthu pek zawm ding in Salai cu a ralring
ringring lai. A si nan tikcu le caan a tlai theh zo.