A Cem Nak Thupi...

Ziangkim ah a tawpnak lole a cemnetnak hi a thupibik ringring! Cucu ziangtin kan thok ti hngakin a thupi sawn tinak a si. Zingtin kan thok timi thupi sawn sehla cu Bawi Jesuh khal cawrawl einak kuang sungah rak suaklo in, siangpahrang fa, maksakzet lole van ihsin sunlawinak le mangbangza ih khatin a rak ṭum sutsi sawn ding.

Sinan, Jesuh cu, leitlung minung tunitiang khalah thuanthu ih um dahlomi, a niambik cawrawl einak kuang sungah nang le kei hrangah a rak suak konan, a tawpnak ahcun, thihnak in a thosal ih, van ah khaiso a si kha! Cucu a tawpnak le ni netabik a thupit zia a langtirnak pakhat a si.

Nangteh, leitlun ih na cemral ding ni hrang le na ni netabik nak hrang ka ready zo maw? Na rak suahkeh dan le nuntu khawsak na rak thok dan pawl ningzatza le mitthlitlak nak tla an si men ding! Asinan, a liamcia zomi hngakin, ziangtin na nunnak “conclusion” na tuah timi a thupi sawn!

The end matters!

Thinbang Nak (Depression):

                

      

Himi ṭongfang hi a bikin USA ih um pawl cun, nitin ih theih ringringmi cafang lole ṭongfang a si. Thinbang neilo minung cu kan umlo ding, a luar deuh le mal deuh lawng hi si ko. Sinan thinbang le thinphang nak pawl hi zumtu hrangah a netnak a siloih kan cahnak ding sawn ah a rak si ṭheu. Thinharnak kan nei le phang hlah, kanmah lawng kan silo, Bible sungah rualpi tampi kan nei. Bible sungih Pathian mihman, zumnak lam le an nunnak ih zohṭhimtlak, mihratkhawkheng tampi pawl khal thinhar, mangbang, vansang le beidong nak an rak nei ve cio!

Tampi ummi lakah: Mipum Siarnak 11-Moses, 1 Siangpahrang: 18-19-Elijah, Job 3, Psalm 13-David, Jonan 4 le Jerimiah 20 nak pawl hi thazang laknak ah hmang uh si. Kan Bawipa Jesuh Khrih lala khal leitlun a lenlai ah thinhar, mangbang in caan an hmang ve ṭheu (Mtt.4:1-11, Lk 19:41, Lk 22:44). Pathian thlausuah nan zate parah thleng hram seh! 

...Amen….

Run Inn Tlun Kum (2017) Diary

By: Piangte (Van Tuah Piang aka David pa)

Aw Falam, ka ra tlung..

February 13, 2017 (Monday): Himi ni ihsin, cawlh ka la cia. Remcan lonak tete ruangah duh vekin vanzam ticket ka lak lohli manlo ih, ni nai te duhah ka lak sal ih a zia lo nasa. Ka duhdawt bikmi ka nupi (Mami aka David nu) thawn dawr hrekkhat ah pawimawh tete kan lei phah. Kan lengvak phahah thlah-awk nakah tiah Indianapolis ih India Palace rawldawr ah suncaw kan ei. Pre Valentine’s day kan hmang phah. India ram hi, kan nupa kan hmuh awknak hmun le kan neihawk nak ram a si tikah ngainat nak tete a um. Culawng siloin, India rawl dawr ih rawl kan ei tikah, hlanlai India ih kan umtlang lai tete vek mitthlam ah a langih, kan nupa in nuam kan ti zet! 

India Palace ah suncaw

Kawlram lam ih unau um sun tete phurh ding neih sun tete le timtuah ṭulmi pawl cu ni thum/li lai duhah kan nu in, ti ṭhepṭhep in in tuahsak cia zo. Nupi fel neih man ah..:)

February 14, 2017 (Tuesday): Ka flight cu zinglam suimilam 10:00 am ih suak ding a si ih, zingpit ten tho in, fa le tlawng an feh hlanah cibai buk in le ka pi thawn thlacamnak in neih sak hnu ah kan nu thawn airport lam kan pan. Airport cu kan inn ihsin minute 25 hrawng motor ih feh a siih, a nai zet. A hmun kan thleng cu United Airline counter ah hmaisabik kan siih, awlsam zetin, luggage pawl khal cuai luanglo dingin, inn lam ih tah cia ṭheh a siih, kan ṭheh lohli.

Indianapolis Airport

Reilo teah, Rev Van Nei Kam CBA, NA (Chin Baptist Association, North America) hmin ih Tahan ih awnmawi khawmpi zawh dingmi a ra thleng ve. A thil a tam deuhih, bag dangdangah than sakin, a tawp ahcun, a check-in fel ve thei. CBA, NA ih feh ding Pa Biak Sui Mang a thleng theilo ih, kan phone phah rero. Reilo teah a ra thleng theisal. Tuah ṭulmi tete kan nu in, check-in nakah a bawm. A tuan lai ruangah thunuam rel phahin, coffee kan in hnuah, a caan kim zikih, a sunglam kan lut.

Minute 45 hrawng vanzam kan to hnuah, kan transit hmaisabik nak ding Chicago cu Pathian zarah tluangten kan thleng. Pacang rual ti cu, innsangnu ciar (home minister) hnenah kan tluang vivo thu kan sim ciar a bang! Chicago in Beijing, China ih zam ding kan si ih, passenger tam sawn cu tuluk (Chinese) an si. Suimilam 12:30 pm ah kan vanzam cu a suak lala. Pathian zarah tluangten Beijing cu anmah ram can suimilam 4:30 pm ah kan thleng. An nikhua cu a dai in, sumzing in a khat. Immigration pawl kan pass hnuah, kawlram fehnak ding vanzam hngaknak lam kan feh vivo cu 90% kawlram mi hlir kan si. Canada ih rami Laimi (Halkha) te sungkua tla kan tong awk.

An pa in “in theilo ding nan, kei online in ka lo thei, na canganmi ka siar ṭheu ka duh zet” tin in sim cu online ih cangan man a neih zia in theisuak tir ih ka lunghmui zet. A nupi le a fapa tlangval zik pakhat thawn Laitlang lam tlung ding an si ve. Zaan a thim zik cuahco ih, 7:00 pm ih suak thei dingin, airport bus in in rak lakih, kan feh. Kawlram ih lut ding tih cu service a picang lo nasa ka ti rero..:)

February 15, 2017 (Wednesday): Suimilam 6, 7 sung hrawng sihmang vanzam kan to hnuah, tluangten Yangon International Airport cu kawlram caan 11:00 pm zik te ah Pathian zarah tluangten kan thleng thei. Kan thilri pawl kan hngak. Ka fehpi 2 khal an unau sungkhat in an rak hmuak. Kei khal Daniel nu (SungSung aka Pu Akhuai ih innsangnu) le a naupa in in rak hmuakih, an parah lungawithu sim cawklo ka nei. Airport ah reizet in hngakih ka hmaisong zet. Zan a siim tuk zoih, Rangoon traffic cu a zia um zet. Reilo te ah, an umnak innpi condominium nuam zet ah kan thleng. Thleng veten innlam (home minister) ah thuhla ka hei sim..:)

Rangoon Airport

February 16, 2017 (Thursday): Zing 5:00 am hrawngin ka it thei nawnlo ih, ka tho. Daniel nu tuahmi breakfast thaw zet ka ei. Pate @ Andrew Lal Lian Thang ka phone ih, amah in tusun Kalay feh ding airport tiang in thlah thei ding thu in sim ih, ka lungawi zet. A manlo nasa nan, tikcu caan a peknak a sunglawi in, a parah lungawithu simcawklo ka nei. A motor mawi zerzi te thawn in rak sawm ih, Rangoon ih coffee thawbik umnak dawr Fuji coffee house & restaurant le kawl rawl dawr ah siseh, innya lake kiang ih rawl dawr ah tin zingkhat ah veithum rori ei le in in do ciamco ih ka puar nasa. Puar tak hnuah airport ah in thlah. Lamzin ah thunuam kan ruahaw phah vivo. Ni hrek sung rori ka hrangih caan a peknak parah Pate parah lungawithu simcawklo ka nei.

Pate thawn

Airport cu domestic airport ah a si ih, ka va thleng cu USA ih rualpi pawl CBA, NA program ih fehmi pastor pawl thawn kan tongaw celcel. Europe lam ihsin, ICA (Institute of Chin Affairs) ih kan palai Pu Thangpi le a fapa khal rinlopi in kan tongaw. Singapore lamih rat lung khal an um. Kan nuam aw zet. Laimi kan tong aw khawmnak ih nuambik ka ti ṭheumi cu, capo tuahin, hni vulvo hi a si. Airport cu a thar zet laiih, a thianghlim in um a nuam zet. Vanzam sung khal ah a hrek hngakih tam cu kan mah rual kan siih, kan nuam zet. Mandalay ah passenger hrekkhat an ṭumih, passenger hrekkhat an phursal. Reilo teah Pathian lam hruainak in tlaungten Kalaymyo cu zanlam 3:00 pm hrawng sihmang ah kan thleng.

Rangoon Domestic Airport

Kalay Airport ah LBA (Lairawn Baptist Association) lamih pastor le upa le Pu Akhuai (Sayagyi James Dar Ro Thang) siseh, Sagaing Division ih kan Chin Affairs Minister Pu Lal Thawm Thang pawl in mikhual pawl in rak hmuak cu lung a hmui zet. Pu Akhuai in, passport keng pawl buaibai ṭullo in, nehsawh takin, amah in a tawlrel ṭheh. Kan CM cu bodyguard umlo in, amah ten a ra ih, ka theithiamlo lawk. Amah le amah mi uar-awlo le tangdormi a si zia a lang. Bodyguard thawn lengvak in um sehla cu ka duhsak zet.

Kei cu Pu Akhuai motor thawn, a pu te innhlun (a nupi pa) ṭha ngaingai ah ka thleng. A tanglam khan ah a kiltu te sungkua an um ih, inntlun khaan thum cu a lawngih, ihkhun thawn riahnak ṭhazet in tuah sakih, U Ni Li Lian, U Hrang Vung, U Huk Luai le U Ṭha Nei Luai pawl thawn khaan pathum ah kan riak. Hotel hngakin a nuam sawn. A zanlam cu Rev Hrang Kap Hnin (Pu Thawm Hlei Mang pa) te innah special tak zanriah eikhawmnak kan nei. Kalay Computer College ih principal kan unu Dr Ngun Hnem khal a rak tel thei. U Thawm te sungkua parah lungawinak simcawklo ka nei. Rualpi hlun pawl tongaw khawmin hlanlai thu le hla rel tlangin caan kan hmang. Sa ei ding cu a kim, zinghnam sa le uico sa khal a um. Sinan, kei ka ei thei tuklo. Thlarau lamih kan pa a si veve mi Rev Hrang Kap Hnin le Rev Dr Thang Hup in telpi theiih lung a hmui zet.

Tahan: Rev Hrang Kap Hnin te inn ton awk zan, hngilh ni um nawnlo ding!

Zan 7:30 pm hrawng ihsin, U Thawm te neihmi Youth Center, hall nuam zetah ICA (Institute of Chin Affairs) pawl meetingnak kan nei. Hitawkah Kalay tlawngta ih kan rinsan zetzetmi pawl le an hotu Thawng Thawng khal in telpi thei. Ka uar hai zet. Tlun lamah, U Akhuai tlawng YCW in fehpi phah ih, a ropi in a sunglawi. Lami hivek private tlawng nei thei cu tiah ka lunghmui zet.

Sayagyi James Dar Ro Thang & a tlawng-YCW office

February 17, 2017 (Friday): Himi zing cu LBA ih hohah nak in CBA, NA palai pawl thawn Kalaymyo ih restaurant nuamzet ah breakfast eitlang nak le hmel theihtir aw nak kan nei. Kei cu sungkhat pal ding ka nei ih, ka ei ṭheh veten kan nu ih pu fanu in bike thawn in rak lakih, ka pu fanu (ka nupi upa ih fanu) an office ah ka va pal ta in thil phurhsakmi ka va pe. Cuhnuah, kan nu ih nute (Ka pi ih naunu, missionary) Sayamah Mawii damlo cu an inn ah sii ka phurhsakmi va pek phahin kan va leng ta.

LBA hoha nak in breakfast kil tlangnak..

Himi ṭhehin Pu Akhuai le saya Bote motor thawn Minhla ih Pre-School graduation hmang dingin kan pok. Pre-School nauhak pawl le khua nupa pawl in hlunghlai zet in inrak hmuak. Pangpar ṭhi tete in rak orh tir ih, nupinu pawl an ṭong ka hngilh theilomi pakhat cu, “Ai, Laiṭong in an ṭong” in ra timi a si. Kei in, “Laimi hokhaw kan si” tin hni phahin ka sim hai. Ka mitthli a hal zet. Ramṭha deuhih ra tih cu kan taksa le kan umdan a dang deuh ruangah si hmang ding Laimi ah in ruatlo ka ti rero!

Minhlah Khua

Vawk inrak thah ih suncaw thawtak kan ei tlang. Lungawithu simcawklo rori a si. Buaihpek (graduation) nak kan neih pi. Buai-la 49 an si ih atelpi tu 7 pawl in nauhak 7 cio buaipeknak kan nei. Sunhnu cu khua nupa pawl thawn thuhla rawn awk nak le sut awk nak kan nei. Pathang (Europe ihsin rami) in bulpak in laksawng ca-ikte a pe hai. (PS: U Nilian le Henry Falam anrak so sung ruangah in telpi thei lo). Thusutnak ah pacangṭha zet pakhatin ka cabu thu in sut ih, hmaisabik ka nganmi “Away From Home (Inn ihsin a hlatnak ah)” timi cabu ka ṭhen hngehnge. A rak ngaihven nak par hrimhrim ah ka lungawi zet. Thusut man a nei nasa..:)

BTS Library

Kan kir lamah Hmun Lai i U Thawm bawmmi Children home le Bethel Theological Seminary kan va leng phah. Children home an tuah dan zohṭhim tlak zet. Midang tlawng khalin model ah an rak zoh rero tiah in sim. BTS Principal hi Rev Dr Van Ro Mawi a si ih ka tlawngkaipi theihthiam zetmi a si. Caan umlo karah an campus mal lai in fanpi ta ih kan lungawi zet. CBA, NA ih sak sakmi Library pi khal ṭheh zik leuleu in mawi zetin campus sungah a dingmi hmuh cun di a riam zet.

Zanlam cu Chin Pawlpi zungpi ah ICA le Kalay Chin pawlpi sawmnak in Kalay area ih Civil Society hotu zate tonkhawmnak, Chin Affairs Minister telin kan tuah. Zanriah thawzet, kan Laimi dawr “Wonderful Restaurant” ah kan eitlang hnu ah, Youth Center ah, zan thurel tlangnak kan nei lala. Himi pumkhawmnak ih sawmnak ah “Ramleng Falam hotu le ramsung hotu pawl tonkhawmnak” – sawmtu: Chin pawlpi Kalay le ICA tiah ngan asi. Meeting thawknak ah Rev Dr Hre Mang cabu thar “Hruaitu Cibai” tlangzarhnak CAM Pu Lal Thawm Thang in a nei.

Meeting lai

Atawi zawngin; Meeting result cu : Falam puaipi ih meeting nakah Falam huap pawlkompi nei dingin ruahnak thunlut dingin lungkim a si ih, hmin khal pa 4, pawl asi. Cun tumtahmi 4 ngantel asi. Cumi meeting relcatmi thuhla Falam i pulut tu dingah Pu Thawm Hlei Mang hril asi. Cutin kan bang zet cio nan, lungawi sopar ten, hlawhtling zet le lungawi aipuang zetin meeting kan ṭheh thei.

February 18, 2017 (Saturday): Breakfast thaw zet eikhawm hnuah, zingpit 6.30 am in Wuibulah zin in Falam kan so ih, kei, U Kap Ṭhio, U Hrang Vung le U Ṭha Nei Luai cu saya Bote motor ṭhazet “Pajero” an timi sihmang in kan so. Kan dunglam ah bus fate thawn U Thawm te sungza in in thlun. Lamzin ah kan hngak phah rero. Wuibulah kan thleng ah an khawbawi le lamzin in contractor palw kan tong awkih, thunuam relnak tete kan nei. An khawbawi cun, Wuibulah cu myo ngah ding a beisei thu in ruah. Lamzin a nuam zet. Cawl phahlo sehla nazi 4 sungah Falam thleng theih a si.

Wuibulah khawkiangah, an khawbawi thawn..

Var ah lakphak in in kan cawl phah, kan zukaw culci. Zamual ah Sui Sui nu, pastor pension zo tla cibai kan va buk ta. a rak no zet lai. Lairam a nuam tuk. Pathian zarah tluangten Falam cu sun 12:30 pm tlukah kan thleng thei. Cinmual ih khawlut nak ah duh er in kan zuk aw ciamco ta. Ka thinlungten hmuaktu an va umlo ve ka ti rero. 2013 ka tlung lai ahcun, mibanglo, Pa Sia le Ṭhal Tin Zul an leng phah ah Cinmual in in hmuak si khawh ka ti rero. 

Ram le miphun hrang tiah, mi khua, mi ram ah hmuhsuam tuar in..

1988 ih ram le miphun hrang tiih, nunnak thapin tlintawkten rak ṭuantu pawl hi, pangpar ṭhi te tal in rak awrh lo hi cu, Falam mi kan tlaksam nak pakhat riahsia za zet a si tin ka hmu. Ṭuanvo neitu pawl an daihaw lo tuk tla si theinan, tuah theimi an tuahlo cu, ram le miphun hrang nunnak rak ap zotu kei vek hrangah cun, tuar dan a danglam zet. Pengdang le hnamdang sisehlaw, in rak welcome daan ding cu mitthlam ah a cuang! Kan ram le miphun hrangih kumpi kumli sung nungnak thap le thinsen, mitthli, thlanhri put suak ih kan ttuanmi mipi in an thei nawnlo cu thinlung in tongtham nasa! 

Falam ka ngai tuk! Salai Sun Ceu khaan, ICA ih remṭhat dingin sumpai $1000 kan kuatnan, zianghman rem cuanglo ih a um ka hmu cu ka thinnuamlo sinsin. Ramleng ihsin khau le ram kan rak seherh tluk in laihlum pawl in an seherhlo si na hlam tin khua ruahnak a suak…????

Salai Sun Ceu Khaan kiang cawlhnak ah saya Bote thawn..

Falam lansung lam kan thleng zik cu, motor le minung a phul in kan phul. “Bawipa Falam hi nitin hitin mipi tam le motor tamnak khua a si theinak dingin thlausuah in pe aw” tin lungthin te thla ka cam. Ka lungawi rualrual in ka riah khal a sia zet. Ziangah tih le puai kan ṭheh cun, ṭhing riapri ten an rak um lala dingmi mitthlam ah a lang cia. Suncawcu “YuYu Lay’ timi dawr ah kan eitlang. Mikhual an tam tukih an daihaw lo nasa. Dawr neitu riangri zangfah an um. “Aw Falam in rawldawr tampi le riahnak hotel kan ṭul si hi” tin ka thinlung ten ka ti rero.

Falam Lansung..

Cuhnu ah, Lailun ih CBA, NA bawmnak in, innpi sakding foundation bunnak ah kan va telpi. Lailun Lungtotlang kan feh. Kannuam  aw zet. Lailun cu ka veikhat thlengnak a si ih, a leiram a ṭha in, hmun nuam zet a si zia ka mit in ka va hmu ih ka ke in ka pal ngah cu di ka riam zet. Tourist attraction spot ah a cang thei leh ding ka beisei zet. Tlunlam ah, CCIT (Chin Christian Institute of Theology) in zanriah ei in sawm ih zanriah ei ṭheh ah an office ah totlangnak le thuhla ruahrel tlangnak kan nei. Kan Falam pi hmaihngal tertu CCIT cu Principal & Vice Principal kan Falam mi le sa an si ih napin ṭan an lak nasa zia ka hmu rualrualin, zianghman tihsak theimi ka nei hrihlo cu poi ka ti. ‘Bawipa nikhat khat ka bawm thei nak ding ni thleng tir hram aw” tih lawng hi ka tih thei sun a si hrih.

Lailun

Tlawngta khal 100 lenglo an nei. CBA, NA in napin a bawm thei ih a lungawi um ngaingai. 2020 kum ah an Library cabu 20,000 neih an duh ih, tuah cabu 17'000 lai an nei zo. Zan cu mai umnak le riahnak pan in kan tlung cio. Chin Center (ICA ih san sakmi) kan pal phah ih, puai hrang an tuah mi hnipuan kan lei nasa. Sunglawi zet in, in rak welcome. Thlenzan ah electric lawngte arak thim ih thimlak ah thuamhnaw kan lei mi handphone light thawn kan zoh, kan hawl. A nawmdan te a danglam nasa. A nuam tuk lawlaw si ko. Tawlrel tu fala tete pawl an fel zet. An hnaṭuan dan zoh ah lung a hmui, mitthli a hal!

CCIT

U Thawm thawn Pu Lal Tin Mang inn ah kan leng phahih puaipi thuhla tete a mawi tawk in sim fiang. Zan suimilam 9:00 pm hrawng si men dingah lawng ka riaknak ding Pu Thawm Hlei Mang te ih Falam mipi hrang saksakmi YCC (Youth & Community Center) Inn ṭha ngaingai, Cabary zin ih ummi innpi ah ka va thleng. Thuah 3 a si ih, a tluntabik a lai khaan ah kan riak. A nuam ngaingai. Kan kehlem le vorhlam khaan ah Rev Hrang Kap Hnin te sung le hlasak thiam pawl an riak. Tidai khal a dai le hlum a naghih, VIP zetin Falam tidai har laiah, nikhat ah veihnih lai tikholh thei in in retih lungawi um ngaingai.

February 19, 2017 (Sunday): FBC biakinnpi ah zing 10 am ah kan khawm. Pastor rualpi le ka pa rualpi hrekkhat tla ka hmusal hai. Ka mitthlam ah ka pa hmel a lang. Mipi kan tam tukih, tualleng lam tiang tohkham an ret nan, an tlem lo. A ropi in a nuam lawlaw. 

Rev Dr Thang Hup

Praise &Worship khal halsakthiam Duhduh le ho pawl an si ih, Gospel singer kan suangvor Mai Far Men Par khal hlasak nak a nei. Rev Dr Thang Hup in sermon nak ropi zet a nei. Thazang kan ngah cio. Khawmṭheh cu zuk aw celcel a siih, a hlunghlai in a nuam tuk tibak sim ding a umlo.

Hngilh theilo dingmi FBC, Sunday sun khawm..

Khawmṭiak in Nazareth Children Home ah suncaw ei in rak sawn ih kan va zawh. Zaute donnak ding sumpai an ṭul ih kan thawhkhawm ih kan pe hngehnge ta. Siang Bawi Runinn khal kan va zoh ih, a ropi in a mawi lawlaw. Cuhnu ah, Falam Zatopi kan va leng. Hnaṭuantu pawl kan bia ih an dinhmun in sim.Kan zato te cu ka zum aiin, a rak ṭha in a thianghlim zet. Sinan, tuah ṭulmi cu tampi a um lai. Sunhnu 3 pm in YCC (Youth and Community Center, Pathawm i tawlrelmi innpi) ah feh in Falam Phunsang Tlawngta Pawlkom, Myanmar) meeting nakah thucah nak ICA hmin in pakhat teten kan nei. Kei ka simmi cu a tawi zawngin: 

1) Fimzirnak ah teimak suah ding. Himi in kan Laimi in khaisang thei ding. 2) Casiarmi miphun kan si a ṭul & tum ruh zetmi si ṭul 3) Miphun thleng dangnak (Racism) timi neilo ding tih pawl an si.

Falam Phunsang Tlawngta Pawl thawn YCC ah..

Hakha ih Falam phunsang tlawngta pawlkom in Falam thuam, uniform tuahnak hrangah sumpai an ṭul thu in sim ih,  kan khawn cio ih bawmnak kan pe thei ih lungawi um zet. Zanriah phunsang tlawngat pawlin in do. Mino pawl hivek i thapeknak le pawkomnak caan kan nei thei hi a sunglawi zet. FPT (Falam Phunsang Tlawngta) Mino Kalay ihsin minung 130 lai an ra thei . Falam hman thleng dahlo 30 lai an tel. ICA hmin in an feh sukso nak Ks. Ting 8 bawmnak kan pek. Azan cu President hmuak pawl le president welcome nak khuanu khuapa pawl in Taungzalat Hotel thar ah an tuah sak. Kei ka bang deuhih ka telpi thei lonan an nuam nasa. President tei nupa khal an nuam awk zet tiah a hmun ih teltu pawl in an rel theih cu lung a hmui zet. Cambary lamih puai tuahnak ding bualrawn ihsin, sound test an tuahmi cu Falam khawsung a hlir thei. Boruak a nuam in Falam kan bu a hlum zet!

February 20, 2017 (Monday): (Puaipi Nikhat Nak & 69^th Chin National Day)-Zingpit ah U Thawm thawn kan tho ih, bualrawn kan va zoh ta. U Hrang le U Hok Luai thawn khal an tong awk. Nai te asinan, so lam cu thawoi suah ṭul nasa. Nikhua a ṭha, tha a tho in lung a hmui zet. Cuhnu ah,YCC hmaiah tongaw in puaituahnak Bualrawnpi kan pan tlang cio. 

President U Htin Kyaw in a voi 69 nak CND ongnak hlunghlai zetin a nei. Thutawi simnak khal amah le CM Pu Lian Luai in an nei. Lailam phunphun, Lukham vuak leknak, Laibuan, show phunphun a um ih minung 20'000 lenglo in puai kan hmang tlang. A ropi tibak sim ding a umlo. Laithuam thawn kan nuam tlang in a sunglawi ngaingai. Di a riam, lung a leng, hna a ngam, thin a tho, lung a zur, a sunglawi!  

The 69th Chin National Day

Ka theih dahlomi hrekkhat in, "online ih na cangan kan rak siar ttheu thazang kan ngah zet, kan zuk aw thei pei maw?" in ti tu tete tla an um ih, "kei tak ko" ka ti ih, ka lungawi zet. Online cangan man a nei ti ka hmu sinsin. Kan zuk aw nasa..:)

Puai kan cen...

Suncaw cu puai hmunah kan ei ih, an rawl tuahmi te cu arti pum khat le buh var lawng a si ih, kan mang bang zet. CCIT principal, Rev Dr Joel Za Hlei Kap in in do ṭheh in ka thei ta. Kan lungawi zet. Rualpi hlun hrekkhat thawn tong aw celcel, zuk aw celcel. Ka U Thiamte le U Lalte te tla himi sun lawngah kan hmu aw thei. Nay Pyi Taw in rak ra an si. An nih cu kan innpi ah an riak. 

Himi zanlam man caan te ah FBC ih pastor Thawng Bik sawmnak in meeting FBC ih zungkhaan nuam zetah kan nei ih, thuhla ṭhaṭha kan rel khawmnak kan nei. Falam ih mirang tlawng nei thei daan ding thu hla bik a si. FBC ih neihmi, pastor Thawng Bik hoha mi tlawng bawm vivo daan le extend tuah vivo daan ding kan relkhawm. Cuhnuah, zanriah thaw ngaingai hotpot a hmun ah in do. USA ih hotpot hngakin a thaw sawn.

Zan cu Lailam, peng tinkim in an lam bakah, concert rura rapthlak tak thawn caan hmang a si. Rampi huap hlasak thiam le kan Laimi hlasakthiam a tam sawn an kim zikzik ti sehla a sual lo ding. Sound system le a ṭha tukih a nuam zet.

February 21, 2017 (Tuesday): Run inn tlun kum puaipi (Puaipi Nihnih Nak)- Zing 10 am in FBC, Biakinn pi ihsin Pu Za Nei Sum ih hla “Lungkhat in hmailam ah nor sin uh si” timi hla sakkhawm in mikhual hmuahhmuah Townhall tiang ke in fehin mipi hmuaktu tampi in hmuaknak au aw le thantar kengin in rak hmuak, in cibai cu lung a zur, tha atho, ka di riam zet. Falam i ṭuanvo neitu pawl an taima in programm tuah an thiam nasa. Tutiang ih mi ka cibai tambik le cibai buk saubik a si hngehnge.

FBC in Town Hall lamah, Ruuninn tlun ni!

Townhall sung kan lutih, Laipuan hngawng-awrh mawi tete in rak pek ciar. Chin TV le MRTV Chin program lam khal an buai nasa. Himi ṭheh in ramṭhen ih palai cio in thutawi simnak an nei ih, paper presentation nazi 2 sung tuah asi. Stewards mino 125 pawl in hmuaknak hla ropi le Falam mino pawl mi 8 in hmuaknak hla mawitak “Welcome to Falam” timi an sak cu ka thinlung a zam le a tirak ṭheh. Paper presentation tuahtu pawl tla cu: Rev. Dr. Hre Mang, Thawm Mang, Rev. Dr. Joel Za Hlei Kap le Salai Lal Thla Muan le Responders ah Cite, Van Thawng Lian, Salai PP, Pastor Thawng Bik pawl tla an si.

Falam, Town Hall sungah..

Sunhnu Town Hall programm ṭheh in YCC ah ramsung ramleng sawmmi pawl thawn zinglam paper presentation i thusuah mi zohtlangnak nei ding in tonkhawmnak kan nei. Himi ah caan a tawituk ruangah Paper presentation topic by topic zohtlang lo in concret kan duhnak thu sawn kan rel tlang. Zocio khal Falam puaipi tuahmi thawng in pakhatkhat fumfe zetmi kan hrinsuah a ṭul timi ruahnak zaten neih cio asi. Himi parin Kalay ih thureltlang cia mi thurawn cu Pu Thawm Mang in thurawn a tuah. 

1) Falam hnahthlak zate huaptu Pawlkom pi nei dingin timi ruahnak zaten lungkim asi. 2) Hoha tu hrilcih mai dingin duhnak a um ih meeting kaitu sungin hruaitu OB minung 9 hril cih asi. Cuitlun ah BM timi Boad Member ramṭhen pawl sung ihsin minung 65 pawl hril an si cih fawn. OB hrilmi pawl thureltlangnak an neihhnu ah a nihnih nak meeting ah EC mipum 10 Ramṭhen 10 sungin hril ding thu an pulut ih lungkim a si. Cuitlun ah OB mipum 11 ah ṭhan dingin le a minung khal hrilcih asi.

CM, Pu Salai Lian Luai

Pawlkom hmin cu GCO (Global Chin (Falam) Organization) tin pek a si, OB ih hrilmi pawl tla cu: President: Pu Thawm Mang, Vice Presients: Pu Lian Cung Nung (Ygn), Pu Van Thawng Lian, Pu Nilian : Sungṭuan ah Pu James Dar Ro Thang, Secretary 1-2-3 ah Pu Thian Uk Thang (Nghepi) Pu Dar Lian UK le Salai Van Bawi Lian (Australia) pawl hril an si. Treasurer ah Pu Ngun Thawng (Monyua), Treasurer 1&2 ah Pu Hrang Lawm (Falam) le Pu No Tawk Kap (Kalay) pawl hril ansi.

Zaan cu concert maktara le fashion show pawl thawn programm a um nan kei khal ka tel thei nawnlo, thazang in a tlin nawnlo. Meeting nakah kan bang cio si hmang.

February 22, 2017 (Wednesday): Falam kum 125, Town Hall le Zato kum 100 kimnak puaipi: (Puaipi Nithum Nak) - Zing 9:30 am in Bualrawnpi ah tuah asi. CM Pu Lian Luai le Border Security Minister in onnak an nei. CM Salai Lian Luai, Pu Hrang Lawm, Pu Thawm Mang in thu tawi simnak an nei. Pulpit par ih totu ding pawl hmun an lak hnuah, Chairman, Rev Dr Joel Za Hlei Kap in felfai zetin caan a kai. Cuhnu ah,  Solomon Menrihai hoha nak in Praise & Worship hla hruainak maksak an nei. Mipi kan thatho, Pathian kan thangṭhat. Mipi zaten sualphuan nak, ngaihdam dilnak el Pathian hnen ah lungawithu simnak kan nei cu mitthli a hal in, di a riam tuk. Pathian ka thangṭhat.

Falam Kum 125 Kim..

Rev. Ngun Thawng Mang in sermon nak ṭhazet a neiih, Mai Far Men Par khalin thangṭhatnak hlamawi saknak a nei. A cemnak ah RC Siangbawipa in thlausuah peknak a nei. Khawm ṭiak in cawimawi nak capi mi 53 lai hnenah pek a si. Himi ah rinlopi in in pe ve ih, ka mnagbang zet rualrual in lungawi sopar ten ka cohlang ve ko. Cawimawinak pek dan belte, kan pa, pu le u le rual micungcuang pawl theihtir nak felfai ten an tuahlo cu a mawilo zet. Ṭuanvo neitu lam an buai zet ko dingnan, hivek cu sankhat veikhat tuahmi a si ih, mipi theihtir nak tuah tengteng ṭulmi an tuahlo cu ka thinlung ten ka mawhthluk zet. Himi sun cu ni a sa nasa. Falam 125 Award mi 3 pek an si ih, Pu Ngun Thawng, Pu Thawm Mang le Acadamy Run Cer Mawi akak Thet Mon Myint pawl pek an si. Lungawipi nasa. Pektlak zet hlir an si.

Sunlawihnak Capi, CM Pu Salai Lian Luai in pek lai..

Suncaw thawzet Pastor Thang Bik le in Kawk Cung te dawrah Pu Lal Nei Mang le Rev Dr Hre mang thawn in do ih hmailam hnaṭuan tlang dan vivo ding thuhla kan rel phah. Sunhnu cu YCC ah meeting nak pehzawm a si.  CM le Pu Lal Tin Mang in telpi thei ih thazang a tlung zet.  CM thucahnak a neih ṭheh hnuah GCO fehpi dan le seherhmi reltlang a si. Cuihnu ah Meeting room ah ṭhawn in fianhrial ten CM kawmnak kan nei. CM hnen thusut nak le CM lala in a hnaṭuannak pawl simrawn nak in nei. Kan nuam in kan phur tlang zet. 

CM thusut mi pawimawh zet pakhat – NLD kumpi/cozahpi fehpi mi peace process le rampi Federal ram asi theinak ding hmalaknak cu GCO in kan lungkimpi tiah relcatnak kan nei. Cun GCO hnaṭuannak hrangah fund raising kan peh ih paisa Kyats in ting 100 tluk commitment kan tuah cio. Ahrek in sumpai an thawh cih. Zanriah ei zawngah CM hnen laksawng kan ken mi cu U Thawm thawn minister dang le DC pawl hnenah hlannak kan nei. Kei ka pekmi cu ka cabu nganmi 3, Chin TV coffee mug le chocolate pawl an si. A tawpzan a siih, bualrawn lamah, lam le concert kan va zoh. Bang deuh thawn, rei umlo in, ka tlung sal.

February 23, 2017 (Thursday): Sianglo cingin puaipi cu a cem ta riai. Zing 8:00 am hrawngah ka Upa Lalte (Pu Van Lal Sak) in motor in in rak lakih, kan innpi ah mal lai sungkhat unau thawn kan ton awk man. Breakfast cu ka rualpi Sum Bik te dawrah kan ei. Rualpihlun Thet Naing tla cibai ka buk phah man. Falam bazaar cu puai sung hmuahhmuah dawr an khar tir ih, tuzing dawr an ong sal cu, dawr nei pawl khal nuam an ti zet a bang ka ti rero.

Mangṭha Falam..

Zinglam 9:00 am hrawngin kan unau 3 le unau hrekkhat thawn Rih lam pan in U Thiamte ih office motor fate thawn khawplo le sianglo cingin ka duhdawh zetmi le ka ngai zetmi Falam cu Lampa lamin ka suahsan. Lamzin ah U Thawm le pawl Tlauhmun feh ding pawl thawn kan tongaw. Ka telpi manlo. Surbung vanzam ṭumnak kan va zoh phah. A ropi in a hmun khal a rem, a nuam zet. Nikhat khat hitawk ih vanzam ih ra ṭum leh ding ni ka hngakhlap zet.

Surbung Vanzam ṭumnak ding..

Kan lan vivo ih Rih ah suncaw kan ei. Rih tili khal ka veikhat hmuhnak a si ih, a mawi in, nuam ka ti zet. Falam ih kan innhnen Alian khal rinlopi in kan tong awk. Lamzin ah a pa khal an motor suai phahmi thawn kan tong. Suncaw ei ṭheh in Ṭio lam kan lan vivo. Ṭio cu a rak picang ngaingai. Inn ṭha tampi le motor ṭha tampi an um. Kan ram ṭhanso lam a pan tin ka lungawi zet. In sim mi pakhat cu Ṭio cu Sodom le Gomorah vek a si, sualnak in a khat in ti. A poi zet!

Rihli..

Ṭio ihsin Tedim lam kan pan vivo ih, kan motor a fate tuk thawn, lamzin le luto tum pipi phah nak a tam zetih, a ke hmailam a kuai ih, ruahsur lakah spared-tire kan thleng ciamco. Zin hrekkhat cu a so tukih, kan ṭum ta ih kan tul phahphah. Nuam ka ti zet. Tedim cu zan 10:00 pm hrawngah kan thlengin ka thei. Ruah a sur nasa. 

Motor tire kuai, thleng nasa lai...

Rawldawr pakhat ah rawl kan ei. U Thiamte te office hnaṭuan pawlin in do. Ṭullo a ti rero le khal an duhlo. Cutin Tahan ah kan lan vivo, motor a niam tukih, a meikhu suaknak cu a tan rori. Tedim le Tahan karlak lamzin cu an kau nasa, lamzin a ṭha zet. Pathian zarah harsatnak tampi pahtlang in zinglam 12:30 am ah Tahan kan thleng.

Tio

Ka riahnak kel te innnuam zetah Desmond, ka U Biak fapa thawn kan riak. Inntek te in rak hngakih hmaisong an um zet. Leikhuu le taksa bal pawl fai takin kan kholh awih, ih hmu thaw zetin kan it. Unau dang cu U Neite (cousin) te inn ah an riak.

February 24, 2017 (Friday): Zinglam kan tho veten U Akhuai in breakfast thawn zet Kalaymyo ah Desmond thawn in do. Cuhnu ah kei sammet dingin U Ding Lawm Puii (Solomon nu ih naunu) dawrah in thlahta ih sam ka met. Suncaw thawzet Mai Far Men Par te inn ah kan kil khawm. A innthar ah si ih, a nuam in ropi lawlaw. Ka nu lam ih sungkhat unau dang pawl thawn tla titi khawmnak Mai Far Men Par inn ah kan nei khawm thei.

Mai Far Men Par innpi ah unau sungkhat pawl thawn..

Nay Pyi Taw lam panin..

Zanlam 4:00 pm hrawng in U Neite (cousin) te innah thlacam khawm nak nei ta in, Nay Pyi Taw lam pan in kan pok suak. Motor cu ṭhaten an rem salih a fai zetih to a nuam nasa.Tire khal feh hlan teah kan thleng ta. Pungṭawng Pungngia lamzin an timi in kan fehih Yagyi lamzin hngakin zin a nuam zet. Lamzin kawl dawrah zanriah kan eiih, an hmeh pawl a dai zetih kaa thaw duhlo nasa..Kan hlum tir nan, a kel thotho!

February 25, 2017 (Saturday): Pathian lamhruainak in tluangten Nay Pyi Taw cu zinglam 10:00 am ah kan thleng thei. U le fa pawl kan tong awk sal thei. Zan cu innsang khawmnak kan nei ih keimah in ka hoha. Pathian hnen lungawithu simnak kan nei.

February 26, 2017 (Sunday): Sun cu Laimi pawl khawmnak Pyimana ah kan sungten kan khawm. Rinlopin Laimi bawi upa hrekkhat ka tong hai. MP Dr Salai Riang Vel khal a tel. Parliament meeting a ra kai laifang a si ih, Parliament building lengnak ding ka lo tuahsak ding in ti ih, ka lungawi zet.

Bawi-upa pawl thawn, Pyin Ma Na biakinn ah..

Myanmar ram Vice President Pu Henry Van Ṭhio khal hitawk ah a khawm ṭheu. Himi laifang hi thlanglam Laitlang a tlawng laifang a si ih, amah tonak hmaisabik ah in to tir ih a ai ka awh ka ti rero (capo)!..:) A umlo zarah tonak nuam deuhah ka to ngah phah. Zanriah cu Lydia nu, ka mo in arsa thaw ngaingai in thah in thaw zetin ka ei. Zan cu innsang khawmnak in caan kan hmang khawm lala.

February 27, 2017 (Monday): Zinglam cu ka U Lalte te nupa le ka tunu (Solomon) fanu thawn “Daingyinta Uyin” ah kan feh. Zoh tlak ciamco a um lemlo. Kawlram sungih state le division pawl ih larmi thil le ri le hmunhman a lem tuannak hmun a si. Laitlang umnak hmun an timi kan thlengah, kan khau le ram mirang ca ih an ngan dan a diklo tete ka hmu cu, ka thin a nuamlo in poi ka ti zet. Zanalam cu ka U Thiamte hnaṭuan nak ah kan va sawmih, dawr nuamzet pakhat ah hotpot in do. Inn kan thleng ih insang khawmnak kan nei.

Hotpot, Nay Pyi Taw..

February 28, 2017 (Tuesday): Zing breakfast ei hnu ah Parliament building pi zoh dingin, U Late thawn U Thiamte a office ih thlah hnuah kan feh. Gate ah U Riang Vel (MP) in list a rak pe cia ih, “foreigner” a tel tin a sim ruangah, motor-cycle thawn a lutnak sangkaa kiangtiang in escort ih an fel nasa. Ka zum hngakin a zalen zet.

 Parliament innpi sungah..

Rinlopin MP Pi Siami , a nu, a naunu le a innsangpa pawl thawn tla kan tong awk ngahih ka lungawi zet. An meeting (session) cu 10:00 am in an thok ih 1:00 pm zik ah an ṭheh. Himi cu Union Parliament Meeting a si. Tikcu caan an upat thiam zet. MP pakhat sim dingih minute an pekmi zat ah an sim ṭheh thei ve hluahhlo. An ṭhehlo le an to tir. An tiṭha zet. Sinan, an thurelmi pawl cu thupi tuk ciamco a um lemlo. Ralkap pawl tla cu an ihthat rero. Mipi a lengtu khal itthat na, a leng suak phahphah na in kan um culci. An ṭheh in, U Riang Vel (MP) thlengnak ah kan feh ih, suncaw cu dawrah keimah in ka do. Thunuam mal lai kan titi man. Mifim cathiam amah vek politics ih kan nei cu ka hnangam zet.

Zanlam cu Laimi numi ih kan neih sun lakih pakhat Anthropology ih Ph.D ngahmi Dr. Ngun Sui Kim, college k arak kaipi dahmi in rawlei i sawmih, Kachin dawrthar nuam zet ah rawl thaw zet ei phah in, a liamcia mi le a r alai dingmi thuhla tete kan titi tlang thei. Amah hi tubai te ih, Nay Pyi Taw ih department on tharmi Myanmar Nationalities' Languages Zungpi ah editor ṭuanmi a si. Kan tongawk thei cu manhla ka ti zet. Zan cu sungkua khawmnak in caan kan hmang sal. Ka caam nehnak zan khal a si.

Dr, Ngun Sui Kim le dawr neitu Kachin nu

 March 1, 2017 (Wednesday): U Thiamte in “Key Stone” timi dawrah breakfast thawzet in do. Cu hnuah a office ah kan va thlah. Lei ṭul deuhmi tete mall ah ka mo (Lydia nu) thawn kan lei ta ih, sun 1:00 pm ah bus nuam ngaingai thawn Rangoon lam pan in ka feh. Ka topi nu cu tlawng sayamah mi ṭhazet a si ih, an nuntu khawsak dan tete in ruah rero. Kum uap lam a si thlang.

Key Stone Restaurant

Rangoon kan lut ih kan nau mifel le mivirvat zet Hauza Thang in a motor maktara thawn in rak hmuak. In hmuak phah ah lamzin tluangih leiram pawl zota an si tivek le kawlram ih milian pawl pursumleilawng an tuah dan in ruah phah rero. A man lo dan tla cu, ph tu le tu a ra, manlo cingin can a peknak parah lungawi nasa. Tlaungten U Akhuai te inn ah ka va thlengsal.

Nay Pyi Taw -Yangon bus station

March 2, 2017 (Thursday): Daniel pa (Pu Akhuai) thawn, tubai ih motor accident tongmi, Bible Society ih GS, Rev Khoi Lam Thang,  private zato pakhat ah kan va veh. Pathian zarah damlam a pan. Zohnak kan pe veve. Cuhnu in mall lam ah kan fehih, pedicure ka hei tuah tir ve. Daniel pa in in pek sak ṭheh. Duh ai in an tuah rei tukih, a ihhmu ṭheh rori. Cuhnu ah Rem Sang Mawi (Sangte) ka unau nu le a rualpi in in ra lakih, kawl rawl dawrah rawl thawn zet in do. Lungawinak sim cawklo si.

Rev Khoi Lam Thang zato ah veh lai..

Sunhnu inn ka thlengsal ih, U Lar Mawi in rak leng ih a pa Rev Dr Thawm Hlei zohnak mal lai le Saṭawm centenary hrang mal lai bawmnak ka pe ve. A pa cu hihnu reilo ah in thihsan ih ka tuarpi zet.

Sangte le a rualpa thawn..

U Lar Mawi & Daniel pa

Zanlam 8:00 pm hrawngin Daniel pa thawn airport lam kan pan. Golden Duck Restaurant ah rawl thaw zet in do ta ih airport lam kan lang. Airport ah USA tlung ding MD lam pawl thawn kan tong aw. International airport sung cu a thar a si ve thotho ih a nuamin, a cangkang ve zet. Sinan, an carpet pawl a siat zik man rero zo lala ih poi zet. Zan 10:10 pm hrawngah kan ANA airline in kan suak. Minung kan lawng pam ih, tonak a tet tuklo ih a zia um zet.

Rangoon in suak zik te..

March 3, 2017 (Friday): Pathian zarah tluangten Tokyo, NRT airport cu anmah caan zinglam 7:00 am zikah kan thleng. Hi tawk ihsin, MD pawl cu transit dang in an feh kei cu airport dang HND airport ah vanzam thleng ṭul ih, $28 in airport ih special bus ticket lei in, thilri pawl thawn ka feh. Nazi 1:30 tluk lai kan fehin ka thei. A hlat nasa. Ka itthat phahphah. Khua ka thlir phahphah ih Japan ram cu a thiangfai nasa. Airport ih hnaṭuan pawl bus a thleng tinten, thil an suahsak hlanah an lu a kuun tlang ṭheh ih, uar an um ka ti zet.

NRT airport, Tokyo, Japan

Vanzam to mi pawl kan tam tuklo. Tonak 3 tlarah keimah lawng ka to ih, a nuam zet. Nazi reipi sung kan to nan, duhduh in ka it that theiih a nuam nasa. Pathian zarah tluangten Chicago cu zinglam 8:00 am zik ah ka thleng. Chicago ihsin, innlam ka ko ih, ziangkim ka tluang zetthu ka sim. Immigration pawl kan ti fel hnuah, tluangten Indianspolis cu kan caan 12:10 pm ah Pathian lam hruainak in tluangten ka thleng sal. Mipi umnak ah, hmel hmuh hmaisabik ka duhmi, David nu aka ka nupi a rak ding cu leitlun ah zianghman ṭulmi um nawnlo tluk a si…..:)

Hmuaktu, duhdawt bikmi, innsangnu thawn..

Zarhkhat sung lai zantin ka mangah khual tlawngin Falam ka thleng ringring..Falam na zunngai a na!...Tlung thei leh sal ding caan hngakhlap zetin!

1992 Falam kum 100 kimnak ah sungkua kim lai a si ih va tlung ve ka duh tuknan, ram hrangih hramlak ih kan umlai a siih, tlun theinak lamzin a umlo. Mitthli tla in ka rak hmang. Kum 125 kimnak talah sinak pakhat khat le Falam hrang tuahsak theimi nei in ka tlung ding tin thlaza cam in saduh ka rak that. Sinan kum 25 rei hnu khalah, duh vekin ka mipi le ka khua le ram hrang simtlak in tuahsuak theimi taktak ka neilo cu poi ka ti tuk!

Meithal kai ih dothleng nak tuah caan..1988-1992

Ni nikhat ah a cangsuak leh ko ding timi zumnak tumpi thawn, sunmang dawi phah rero hrih in.....

Falam, ni suak...