Tleunak (Sermon)

Johan 8:12…..Jesuh cun Farasi mi pawl hnenah, “Kei cu leilungih tleunak ka si. Zokhal keimah i thluntu cu a nunnak ah tleunak a nei ding ih khawthim sungah a feh dah lo ding,” tiah a ti.

Thuhmaihruai:

Scientist pawl nih tleunak ih rang zia (speed of light) hi second pakhat ah peng 186,000 a si an ti. Cucu speed hh lakih rang bik a si. Himi hi tthaten kan ruat le cu, kan biakmi Pathian, thleunak ka si a ti tu Pathian kan nei hi a ropi tuk ka ti. Culawng si hrih lo, a nai bikmi arsi ah minung feh thei hman sehla, kum tampi a ttul ding ti a si lala. Cumi mangbang za siar cawklo, arsi le planet 9 le ni le thlapi tuah ttheh tu cu kan biak mi Pathian a si, Amah control a si ttheh. Pathian hming thangtthat in um ko seh. Amen..
Tulai san tthalo, Pathian ttihzah lo le san tthalo zetih kan um bakah, Krihfa ka si tiaw ve mi pawl nih hman kan biakmi a nung Pathian hming hi, duhduh in kan hmang ciamco. Hrekkhat nih capo nak ah hmangna, hnih suahsai nak ah hmangna in a khat. A sunglawi tukmi le a thianghlim bikmi Pathian hming hi upat kan thiam a ttul.
Baibal sungah kan zoh a si le profet le Pathian hnattuan tampi Pathian ih sunglawi nak le larnak an hmu tikah, an mang a bang, zianghman simsal theilo khawpin, Pathian huham in a zel hai. Pathian ih sunlawi nak an hmu tikah, ziang an si lo zia le an fateh zia an thei aw. Cu pawl lak ihsin a tanglam ih Pathian mi hman pawl hi Tleunak a si mi Pathian an hmu tikah ziangtin an um, an experience ti pawl kha a tawizawng in kan zoh ding.

Job. 38-41 le 42:1-6 pawl kan zoh a si le, Job in Pathian sunlawi zia le Pathian a si nak a hmu fiang tikah nat nak a tuarmi pawl kha nep tuk in a thei aw si kha. 42:5-6 ah .. “Culai ah cun ka hna lawngin ka lo thei, a tu ah cun ka mit rori in ka lo hmu zo. Curuangah ningzat in ka fih aw ih, leivut le vutcam lakah to in ka sir aw a si.” a ti ta riai.

Isaiah 6:1-4 ah hitin a um lala…. Cutikah kei in, “Ka cem a si! Ka ruahsan ding zianghman a um nawn lo. Ka hmur ihsin a suak mi ṭongkam hmuahhmuah cu a sualmi ṭongkam a si ṭheh; misual lakah ka um ih hmurka thianglo lakah ka leeng. Atu ah ka mit rori in siangpahrang, cungnungbik BAWIPA ka hmu fawn,” tiah ka ti. Pathian mihman profet tumpi nih hman hi vekin a hmuhaw ah cun, kan nih mi menmen tla cu sim ding a um lo.

Ezekiel 1:27-28 le Daniel 10:8-9 ah khal Pathian sunlawinak an hmu tikah an thi zik si kha. A va ropui em…Ezekiel nih, 27Cuih pianhmang cu meisa sungih a tleumi dar vaam bangtuk a si. A kiangkap hmuahhmuah cu vaangzet in a tleu. 28Vaangro bangtuk in pianzia phunkim a nei. Hi tleunak cu BAWIPA ih umnak langtertu a si. Tleunak ih a khatmi Pathian cu a va ropui em, Amen..Daniel khal lar aw nak a hmu tikah, a tha a cem ih, a it that cih rori si kha. Pathian huhma a va nasa em. Hitluk ih ropi le thil ziangkim tuah thei Pathian kan nei ko nan, vawi tampi kan thin a phang ttheu. Thin phang nawn hlah uh si. Tleunak ih khat kan Pathian cu sunglawi in um ko she.

Himi Baibal hlun san laiih, profet le Pathian mi hman pawl cu Pathian ih sunlawi nak an hmu tikah, an nun a danglam tir ttheh. Baible thar san ah cu a fapa Jesuh in a rung lang. Jesuh khal a dung thlun tu hrekkhat in larnak an hmuh tikah, an lungawi tuk ah mangbang vansang in an um thotho. Matthai 17:6 ih Peter, James le John hruai in, hmel danglam nak tlang ih a feh pi laiah, Elijah le Moses thawn an lang an hmu cu, nuam an ti tuk le sunlawi an ti tuk ah, thlam lamlam sak sak an tum ciamco kha. Ttih tla an ttih fawn. Cuvek Pathian huham neimi kan nei cu mi vanttha kan va si lawm mam em?

Luke 5:4-8 ih Peter le a rualpi pawl zanvar nga an awk thei lo ih, an beidong laiih Jesuh in nga tampi a awk tir tikah, Peter cu a sualzia le ngakaih thiam a rak tiawk nak a ziaza hlun hh kha ningzat nak le siraw nak ah a cang ta riai. Sualnak neilo tuu fano Jesuh a hmaiih a vun hmu cu, “Bawipa, tlangaw, misual ka si” a ti ta riai si kha. Asinan, kan Bawi Jesuh cun zohman in tansan dahlo ih, Peter tla kha a dung thluntu le a mah hrangih rinum pakhat ah a cang tir sawn si kha. Unau nang le kei teh Jesuh mithmai hmu sehla, kan sualnak le kan si nak pawl kan zoh ngam pei maw?

Paul khal Damaskas khualam pang in zumtu pawl hniksak ding a feh laiah, tleunak a si mi kan Pathain in thleunak in a lam zin a kham sak daih mai si kha. Nithum sung khua hmu thei loin, a mit a caw ta riai. Mifel, mifim, cathiam, pa ralttha, lalfa ra tiaw ve pa, duhaw ve emem pa hmankha theunak in a sun cun, nithum sung rori rawlei lo ti in lo le mit khua hmu thei lo ah a cang riangri. Pathian in minung in hmang duh tikah, minung lamih kan thil ti theinak le kan uaraw nak pawl a lak hmai sa ttheu. Culawngah, Pathian mi hman kan si thei. Pathian in minung hnenah a lar aw tikah minung si nak in a tuarlo ttheu ti a si ruangah, “Ttih hlah” tin in ti hmai sa ringring a si.

Thutawp

Tu sun ah u le nau nang le kei teh kan Baibal sungih zumnak lamih kan pu le pa pawl vekin maw Pathian koh nak kan co hlan ding. Tleunak ih a khatmi Pathian cu ziangtin nang le kei in kan biak ve ding. Paul nih cu kan Pathian cu Lal hh lak ih Lal bik, bawi hh lak ih bawih bik a ti. Nang le kei in the a thianghlim mi le huham thawn a khatmi kan Pathian hming cu ziang tin kan thangtthat ding? Pathian hming sunglawi cu a sunlawih kan thiam pei.

Leilung pumpi tleunak dingah ni pakhat lawng a tawk ih, misual le minung pawl tleunak ih kan um theinak dingah tleunak bawi a si mi Jesuh a tawk. Tleunak sungah sual tuah a theih lo ih, tleunak in thim a hua. Theunak maw thimnak ah kan um? Pathian in a siartu zaten thlasuah in pe hram seh….Amen
(July 23, 2008)

Thla kan cam tawk maw? (Sermon)

Jimmy Carter, USA ih president 39th nak rak ttuan dah pa cu, mi piangthar ngaingai a si. Democratic party hi liberal deuh leh Pathian theilo deuh in an hmu tlangpi nan, Carter cu Democrat party lakih Pathian theibik president a rak si. President a ttuan veten (interview) an tuah nakih an sut mi cu, "president na ttuan hnuah nikhat ah vawi ziangzat thla na cam?" ti a si. A simmi cu "President ka ttuan hnu cu duh vekin caan ka nei thei nawn lo ih ni khatah vawi 24 lawng thla ka cam thei thlang" a ti ta riai. President a ttuan hlanih a thlacam tam dan ding zia cu.....????

Tutum cu Bible cangthlan tam deuhin ka rak ngan ding. Daniel 6:10, 3:16-18, Tirhthlah 8:22, Rom 12:12, 1Thesolon 5:17, Matthai 26:41, Mark 11:25. Daniel 6:10 lawng ka rak ngan lang dingih Bibal bung cang dang pawl cu, nangmah ten rak siar dingah ka lo dil.

Danial 6:10Siangpahrang in a hmin a khen zo, tikha Daniel in a theih tikah a inn ah a tlung. A inn tlunta khaan ahcun Jerusalem lam hoi in sangkate an um. Cutawkah a tuah ringring ṭheu vekin a ong awmi sangkate pakhat kiangah cun a khuk a bil ih ni khat ah voithum Pathian hnenah thla a cam.

Daniel hi Pathian mihman zetmi (major profet) profet picang timi pawl lakih pakhat a si ve. Daniel cu tlangval ttha, mirin um,Pathian ttihzah zetmi a si. Babylon san tthat laiih, cathiam pakhat tla a si. Daniel cu mifel le cathiam a si vekin, Darias timi ram uktu pa cun, ramkulh 120 uk dingin mi pathum lakah a hril ve. Curuangah Daniel cun ramkulh 40 parah thu neih nak a nei tinak si cu, a ropi nasa. Ramkulh cuzat uk ding cun fim le thiam nasat a ttul nasa ding ti auh. Man khal a man lo nasa ding. Asinan, nikhat ah a malbik vawithum cu, sangkate ongin Jerusalem lam hawi in nitin thla a cam thei lai. Nan le kei, ramkulh pakhat hman uk lomi in teh nikhat ah vawi ziangzat ha thla kan cam?

Daniel ih rualpi pathum, tlangval hmelttha Shadrak, Meshak, Abenego pawl tla milem biak duh loin an um ih meidil sa ngaingai sungih an thlakzikah ziang an ti..Meisa alh sungin in hum theitu Pathian a um a si ahcun kan biakmi le kan rianmi kan Pathian lawnglawng a si ih amah cun na cahnak huham sung khal in in hum ko ding. In hum lo a va si hmanah, siangpahrang bawipa, na khawzing pawl cu kan bia lo ding ih na sui milem tuahmi hmai khalah kan kun lo ding, ti cu in theihsak cia aw,” tiah an ti. An va ral ttha lawmman ve ti auh. Fala hrangah cun, hi pawl vek thlangval hi si pasal dingih nan hril dingmi. Mi ral ttha, huaisen ka timi cu hi te pathum vek hi an si. An biakmi le an zummi zo a si, ziang a tuah thei ti an thei tuk si hi. Hi te pathumih zumnak vek hi kan va ttul em. Mitam pi cu Pathian hi kan hrangah hlawknak a um lo ah cun, kan biak ttha duh lo, kan phunzai theu. Asinan hi te pathum cun, Pathian in in hum lo hmanah, Pathian cu kan phatsan dahlo ding an ti si kha. Nan le kei teh kan tingam ve kem?

Vawikhat cu South Korea ih Pathian hnattuan mihming thang kawhhran member 700,000 lenglo neitu Dr. Yong Ki Cho ih (spelling ka sual ding) fapa (food poisoning) rawl a ei sualih sizungah a thleng. Dr. pawl in a ril pawl in an tuar loih, zinghman kan tuah thei nawn lo an ti ih, a fapa te cu a thi ta riai. Cu veten, Dr. Cho cu zisung in tlunlam ah a kaiih, khukbil in nasa zetin thla a cam ciamco. Thla a cam laiah, setan cun, "Na fapa cu a thi zo, thla cam man a san tlailo, Pathian hna ttuan pa na mualpho riai" tin a hniksak rero. Asinan, Dr. Cho cu thla a cam rero thotho ih, a fapa te cu nasa zetin a thil ei mi pawl a luak suak ttheh salih, arak nung sal. Himi a thlacam sung hi nazi kar tam ngaingai sung a si an ti.A fapa in a sim mi cu, "Ka pa ziangah thla na cam ee, kei cu Bawi zisu nih ka kut in kaiih, Sui ih tuahmi khawlipi mawi ngaingai mi sung kan lut zik fangah, Zisu in 'na pa thlacam ka hnial theilo, va ttum hrih aw la, neh hnuah ka lo ko sal leh ding' in ti" a ti. Unau tusun ah nat nak na nei maw, cancer, TB, Hepatitis tvp le mi rel hmang natnak, mi huatnak natnak, mi iksik natnak, hurnat nak, rittheih thil duhnak, duhham nak, sual tuah duh nak natnak tvp. Cu pawl cu kan biak a nung Pathian in a dam tir ttheh thei. Zumtu thlacam nakin tih theilo mi a nei lo.

Zumtu nun ah thlacamnak neilo cun, umzia a neilo. Thlacam lo nun cu tidai le dawm pe lomi antam hmuan thawn a bangaw. Thlacam nak nun um lo cun, thlarau lamah a thangso aw theilo bakah, hnangam nak ngaingai a um theilo. Bible tlawng ka kai laiah, nikhat ah a malbik nazi pahnih sung tal Bible siar le thlacam in caan ka rak hman dah. Kha laiih, ka nun hlimzia le ka thawveng dan kha ka ngai cuahco. Tu ah cun zingtin Bible (Our Daily Bread) "Nitin thlarau rawl" siar le khuhbilih thlacam bak lo cu, ka ti thei tuk nawn lo. Hihngakin can tam ka pe tum rero lai. Asinan um men khalah ka thinlung ten thla cu ka cam ringring. Sim duh sawn mi cu ca kan zir laimaw, mawtaw kan mawn lai maw, hna kan ttuan lai maw khalah, kan thinlung ten thla kan cam thei ringring a si. Kan Pathian hi a va ttha em, kan mah kan siarem naknak in thlacam in kan biak thei. Pathian hming thangtthat in um ko seh! Nupi pasal nei, fate nei kan si ah cun kan nupi/pasal fate parah kutsuang in thlacam sak uh si. Thlacam kan ttul. 1 Thesolon 5:17 ah "Thlacam ringring uh" a ti.

A net nak ah.....

@Khawlvelih lalbik a simi, (super power) neimi USA president hlun Mr. Jimmy Carter cun nikhat ah vawi 24 thla a cam thei lai......
@Profet Daniel, Babylon san tthat laiih prime minister tluk simi cun, nikhat ah khuhbil in vawithum thla a cam....
@Dr. Cho cun nazi kar tam zet sung thlacam nak in thihnak tur a net......
@Kan Bawipa Zisu cu Gethsemani hmuan sungah thlanhri thisen suak in thla a cam...

Unau nan le kei tuni ah kan mai hrang, kan inn sungsang hrang, kan fa le hrang, kan nupi/pasal hrang, kan rualpi hrang, kan ral pawl hrang, kan kawhhran hrang, kan miphun hrang le kan ram hrangah vawi ziangzat mithli tlak, thlanhri tlak le lung kekkuai in thla kan cam? Nikhat ah second, minute, nazi paziat sung thlacam nak ah kan can kan hmang? Thla kan cam tawk maw?

Pathian in a siartu zaten thlasuah in pe hram seh...

Lungawi,
Piangte
(Oct.12, 2007..12:26pm, Indianapolis)

Raithawi nak hngakin, Thungai nak! (Sermon)

Sept. 1, 2007

Seemtirnak 22:1-15
1Cuih hnuah Pathian in Abraham cu a hniksak ih, “Abraham,” ti ah a ko. Abraham in, “Bawipa, hinah ka um,” ti ah a ti. 2Pathian in, “Na duh zetmi na fapa neihsun Isaak cu hruai awla Moriah ram ah fehpi aw. Cutawk ramih a ummi ka lo hmuh dingmi tlang parah Isaak cu mei-ur thawinakah pe aw,” ti ah a ti. ……………………………….

Thuhmai hruai:

Minung (Zumtu) pawl hi vawitampi cu kan hlawhtlin le kan lungawi can lawngah Pathian thangtthat kan thiam theu. Cucu minung dan a sinan, khatlam ah cumi nun cu zumtu nun dik taktak a si lo. Keimah lala khal ka nun ah vawitampi cu thih ka thlang can a tampi. Nun ka paih nawnlo can hi a tam zet. Asinan, Zumtu hmaisa pawl nun thawn ka tahthim aw tikah, ka tuarmi le a har tuk ka timi pawl hi an rak nep te. Paul cun, thawnginn sungih, natnak maksak a tuar lai ah, “cat banglo in Pathian hnenah lungawi thu sim dingin” kawhhran pawl hnenah caa a ngan thei lai si kha. Cuvek thotho in Jacob, Joseph le midang tampi nun ah kan hmu theimi an tampi. Kan hlawhtlin lai le kan nom laiih, lungawi thusim cu a ttha tuk ko ee, asinan kha hngakih ttha sawn cu hlawhtlin lo lai le riahsiat laiih ‘Bawipa ka lungawi “ tih thiam hi a si. Habakuk ih “Bawipa theipi in thei a rah nawn lo khalah, lungawi thu ka lo sim thotho ding” a ti bangin tih zuam cio uh si.


Kan Bible siarmi ah feh sehla..Abraham ih nu le pa pi le pu pawl hi Pathian biakmi an rak silo bakah milem biakmi an raksi. Bible thiam pawlih ngan dan vek a si le Abraham hi a nauhak lai ihsin a pa le pawlih milem a biak duh lo ruangah nasa zetin hrem tiang a rak tuar ti a si. Ziang khal va si ta sehla, Abraham cu anau hak lai ihsin mifel le Pathian nung hawl mi a si ti a lang. A nu le pa hi Pathian zum an silo ruangah a si ding Pathian in “Na ram, na miphun le na pa ih inn taanta awla ka lo hmuh dingmi ramah feh aw” a ti nak san. Abraham cu kan thei cio vekin a feh nak ding a theicia lonan, Pathian thusim mi ngaiin a pok suak mai si kha. A zum vekin tla Pathian in thlasuah a pe.

A tawi zawng cun, a beidong hnuah Pathian ih a tiamkam mi fapa Isaac a pek si kha. Vawitampi cu, kan bei a dong tiang Pathian in in hngak ta a ttul theu. Ziang ruangah tile cumi in tuarthiam nak le pitlin nun ah in thleng theu ruangah a si. Fapa cu Pathian in a pe nan a dil sal lala fawn. Himi lai ah Isaac hi duhnung lai tak, nauhak ngaingai si nawn lo, tlangval taktak le si hrih lo lai fang a si. Tu lai san vek si sehla, a nu le pa cun, kan fapa hi a upa vivo dingih, tlawng tthattha ah kan ret dingih, a ro hrangah cumi khami tin an duat lai tak fang a si ding. Cu laifangih Pathian in na fapa in pe sal aw ti tawngkam vun theih cu, hna sungah a thlum lo nasa ding tiuh…Asinan Abraham cun, “Ziangah ha?” a ti ta riai lo sikha. Pathian in a ttul a ti ve ten, a hnenum pahnih cu a hruai suakih ‘Moriah” ram lam panin an feh mai si kha.

Fa ka nei hlanah cun, nu le pa duhdawt nak hi fapa lam ding hmun in ka rak tahtthim ttheu. Ka nauhak te laiah, hanat ka nei theuih ka nu le pa cun zanvar it loin in pua ttheu. A ttul le zansim khalah Dr. Akui va tthang in si in va lei sak theu. Cu hman cu an fapa neihsun ka si lonan, in duat zia hi a mak a si. Tucun fa ka nei veih, ka fa le ka duhdan hi, fa le in nu le pa kan duhdawt hngakin a luar in ka hmu. Himi laiih Abraham lung nat dan ding hi cu caa ih ngan a harsa ding. A mah hngakih tuar har sawn ding cu a nupi Sarah kha a si, zarhkhat sunglai a fapa zun ngaiah a ttap rero ding ka zum. Ziangah ti le Moriah feh nak cu feh lam tlung lam in ni 6 lai a rei ih, an fapa duhdawtbik le neihsun cu raithawi nakih hlan ding a si fawn.

Tlang tang an tleng cun, Abraham in a hnenum pawl hnenih a sim mi “Laak thawn hitawk ah rak um uh. Kei le ka fapa cu Pathian kan va bia ding ih nan hnenah kan ra kirsal ding,” a ti. Hitawkah, tthaten Bible cang kan siar ah cun “kan ra kirsal ding” a ti ta riai mai si kha. Abraham in a fapa lo ih rak kir sal ding cu a ngai ngam hrimhrim lo a si ding. Culole Pathian in a fapa nungnak a pek sal a zum a si ding kan ti thei. Cubakah Isaac in a pa cu, “Meiṭek le zanthing hmuah kan keng ih thawinak hrangih tuu faate khui-ah so?” a ti betbet cu, pa a simi Abraham hrangah cun, a thinlung kehkuai dan ding hi a mak ding ka ti. Asinan, thiam tak in le zum nak thawn, “Amah Pathian in in pe leh ko ding, ka fa,” tiah a ti. A tawi zawng cun, Pathian in Abraham in Pathian hrangah uimi a nei le nei lo a hniksak nak a si. Cubakah, Jesuh ih in rak tleng nak ding ih thlam a si. Himi “Moriah” timi tlang cu kum tampi rei hnuah in rundamtu Jesuh an thah nak hmun “Calvary” tlangah a rung cang.

Thunetnak:
Pathian in Abraham ih zum nak a hmu tikah, a fapa aiah tuucang a pek sikha. Himi Bible cang Seemtirnak 22:1-15 ah zir dingmi tampi kan nei.

1) Pathian hnen ihsin thlasuah kan ngahmi pawl hi Amah Pathian hngakin kan duh sawn pang theu maw? Si lole Pathian hngilh phah nak ah kan hmang pang maw?
2) Kan neihsun kan ui duahdo mi Pathian in in dil ve sehla, kan pe siang ke maw?
3) Pathian cun, anungmi raithawi nak hngakin a thungai le thlun a duh sawn.
4) Pathain cun Abraham hnenah a fapa neihsun Isaac a dil nan, Isaac nung nak a him sak thotho.
5) Asinan, Amah Pathian lala cun, a neihsun A Fapa Jesuh cu nang le kei santlai lo, meidil ih tla ding mi, duhdawt tlak lo kan si nan, in duhdawt tuk ruangah, A Fapa nunnak liam le harsat tuarin in pe ih kumkhaw nun nak in pek si kha.

Curuangah A Fapa neih sun hman uilo tu duhdawt nak thawn khat kan Pathian hrangah uimi kan nei ve ding mawsi? Kan raithawi nak hngakin kan thinlung muril kha Bawipa in a hlambikmi a si…………

Pathian in a siartu kan zate parah thazang pe in thlasuah in pe hram seh…Amen